［愛情純愛］由嗰一個Kiss開始，我地唔再係青梅竹馬: 82. 再主動點的話⋯

「你食得咁快嘅？」梁玥嘉望住宋千辰手上已經幾乎食完、只剩低雪糕筒個尖尖嘅甜筒

「你估我係你？」宋千辰無奈地講道，然後幾最後一口都食埋，「雪糕都要溶啦⋯」

「宜家係冬天呀，你當我蠢㗎？」梁玥嘉反一下白眼，大口地咬一口雪糕筒，伸手輕擋喺嘴前免得比人見到佢兩頰好似倉鼠咁脹卜卜，「楠恩你唔係嚟買嘢咩？」

「哦，係呀～」楊楠恩微微一笑，但佢嘅笑容睇起嚟有啲唔自然，「咁我去揀嘢先啦，我地下次見啦玥嘉。」

楊楠恩對梁玥嘉講完之後下意識望向宋千辰，但卻只見宋千辰耷低頭睇手機，好似完全都冇在意過佢嘅存在一樣



梁玥嘉對楊楠恩微微一笑，然後將佢嘅注意力再次落喺宋千辰身上，楊楠恩行咗兩步回頭，見到兩人有講有笑，自己根本就係可有可無嘅存在一樣，心中感到失落同時覺得妒忌

楊楠恩企喺貨架前，但根本就冇挑選貨品，而係專心地聽着喺貨架另一邊嘅兩人嘅聊天內容

「行啦，我地番去啦。」宋千辰見梁玥嘉都食完手上嘅雪糕便講道

「哦。」梁玥嘉點點頭，「去同楠恩講埋拜拜先啦！」

楊楠恩聽到梁玥嘉嘅說話，心中一顫，有啲開心，有種宋千辰主動見佢嘅感覺，即刻梳番好頭髮，將髮絲繞到耳背後，想比宋千辰見到自己最好嘅一面



「吓⋯」宋千辰難以掩蓋心中嘅無奈吓咗出聲

梁玥嘉繞到去貨架後面，見到早就準備好嘅楊楠恩

「楠恩拜拜～」梁玥嘉嘅楊楠恩笑着揮揮手講道

「拜拜～」楊楠恩露出柔和嘅微笑，目光偷偷地落喺宋千辰嘅身上

「拜。」宋千辰淡淡地講道



「拜拜⋯！」楊楠恩開心地講道，心跳都因為宋千辰一句拜拜而加快咗跳動嘅速度

「行啦。」宋千辰一手攬過梁玥嘉，手繞過梁玥嘉嘅後頸搭喺佢嘅博頭上

楊楠恩本來上揚嘅嘴角緩緩地塌咗落嚟，梁玥嘉微微嘟一嘟嘴，然後回頭望向楊楠恩微微一笑、揮一揮手，楊楠恩見梁玥嘉回頭，頓時強擠出笑容同梁玥嘉揮手講拜拜

楊楠恩望向門口，見到宋千辰同梁玥嘉兩人親密地行出便利店，不禁緊握了手上拎住嘅薯片袋

「真係⋯黑人憎⋯！」楊楠恩嘅神情變得有啲猙獰，諗起啱啱宋千辰一把攬過梁玥嘉嘅舉動同兩人嘅對視就覺得討厭到極致，「梁玥嘉⋯！」

「番屋企～呵～欠⋯」梁玥嘉打咗個大喊露

「咁快又眼瞓啦？食完嘢唔係應該精神啲㗎咩？」宋千辰眼見梁玥嘉仍然一臉疲乏

「食完嘢飽咗同暖咗，仲想瞓⋯」梁玥嘉搖搖頭，雙手捧住臉頰，感覺到臉頰暖烘烘的



「懶到死⋯」宋千辰細聲地講道，「做咩捧住面？」

「啱啱食完雪糕，隻手凍冰冰⋯」梁玥嘉講道

宋千辰聽到梁玥嘉咁講之後忽然朝佢伸手，梁玥嘉見到宋千辰嘅舉動時不禁摒住呼吸，心裏亦突然緊張起嚟；宋千辰捉起梁玥嘉嘅手腕，梁玥嘉嘅心跳頓時跳得仲快

「佢、佢要做咩⋯！」梁玥嘉望住宋千辰嘅一舉一動同時喺心中講道，心跳完全冇辦法平靜落嚟

當梁玥嘉嘅心跳加速中嘅時候，宋千辰捉住梁玥嘉嘅手⋯將佢隻手塞入梁玥嘉自己件Hoodies嘅衫袋入面；梁玥嘉怔了一下

「你咁緊張做咩？」宋千辰見到梁玥嘉嘅臉頰上有淡淡嘅紅霞，不禁忍笑一問

「冇、冇緊張呀！」梁玥嘉反應極快，頓時就回答宋千辰，梁玥嘉嘅心覺得有啲尷尬，佢仲以為宋千辰要拖佢隻手，但原來唔係，搞到自己會錯意，「想快啲留去瞓多陣，行快啲啦！」



梁玥嘉甩開咗宋千辰嘅手，頓時就小跑起嚟，宋千辰一臉疑惑咁望住梁玥嘉跑背影，然後邁步跟上梁玥嘉嘅步伐

「唔好成日都掛住喺屋企瞓覺啦！得閒都出下街嘛～」宋千辰行到去梁玥嘉嘅身旁

「都冇約人又冇人約嘛，出咩街啫，難得唔洗番學，咁梗係想做下屋企嘅寄生蟲㗎啦！」梁玥嘉打咗個喊露

「我咪約緊你⋯」宋千辰喺心中無奈地講道

宋千辰自己都有私心想見梁玥嘉多啲，明明大家已經咁熟，又見咗咁多年，而且仲要係鄰居，但面對住自己嘅心上人，無論見幾多次都唔會覺得足夠

「我係唔係應該再主動啲⋯？但再主動啲嘅話⋯」宋千辰獨自苦惱着，一諗到關於應唔應該主動嘅問題就覺得好苦惱

行喺宋千辰身旁嘅梁玥嘉察覺到宋千辰忽然間安靜咗落嚟，偷偷地用眼尾瞄咗宋千辰一下，卻見宋千辰一副專注嘅模樣

「諗緊咩⋯？」梁玥嘉今次光明正大地望向宋千辰，但宋千辰都冇察覺梁玥嘉嘅目光已經停留咗喺佢身上，「諗咩諗到咁入神？」






IG Link: https://www.instagram.com/nd_cotttocandy/?hl=zh-tw