［愛情純愛］由嗰一個Kiss開始，我地唔再係青梅竹馬: 35. 嘴角

「拜拜⋯」梁玥嘉一下子就推門入屋，佢只想盡快逃離呢個唔知點嘅同時又好尷尬嘅現場，佢覺得自己嘅臉頰一定紅紅的

梁玥嘉一入到屋就係將把遮拎咗去廚房掛起吹乾，然後入房拎住居家服去廁所打算直接沖個涼，梁玥嘉將襪除咗落嚟掉入去衣籃入面，然後將校服除落嚟掛喺門後

宋千辰推門入房行到書枱前將書包放喺書枱上面，打開書包拉鍊將放喺書包裏吧縮骨遮拎出嚟

「我今日有睇天氣報告，又點會唔帶遮？」宋千辰望住手上拎住嘅縮骨遮，嘴角上揚掛上滿足嘅笑容，「不過件衫都濕咗都值得～」

宋千辰將校褸除落嚟然後用衣架掛住喺衣櫃嘅把手上，佢拎起放喺床上嘅居家服然後行去廁所沖涼



熱水打喺梁玥嘉嘅身上，佢嘅腦袋變得特別清醒，啱啱嘅事仍然心有餘悸，喺梁玥嘉嘅腦海中刻下咗剛才嘅畫面，距離好近，佢直視着宋千辰深遂嘅雙眸，總覺得有一種懾人嘅魅力令佢移唔開視線

沖完涼之後梁玥嘉就番咗房閂上房門，拎起手機睇

「下個月就係聖誕節，再下個月就係千辰生日。」梁玥嘉坐喺書枱前面托住腮，「今年送啲咩比佢好？聖誕節同佢生日各送一份好唔好呢？但送啲咩好呀⋯」

梁玥嘉平時都冇送生日禮物、聖誕禮物比宋千辰嘅習慣，佢都唔知可以送啲咩比宋千辰

「千辰會想收啲咩禮物呢？」梁玥嘉一臉苦惱地輕皺起眉頭，「但我突然送禮物比佢會唔會顯得好奇怪呢？唉⋯」



梁玥嘉嘆咗一口氣，然後打開手提電腦上網search下男仔會想收到嘅禮物，但搵番嚟嘅結果唔係手錶就係啲電子產品，梁玥嘉更加無奈，佢都唔知宋千辰會想收到咩

「問下佢想要咩咪知囉！」梁玥嘉靈機一動拎起手機打算直接問宋千辰，但拎起手機兩秒都唔夠，梁玥嘉又放低手機，再次苦惱起嚟，「直接問嘅話仲邊有suprise呀⋯」

梁玥嘉想比個驚喜宋千辰，但又要喺唔可以比宋千辰知道嘅情況下搵到宋千辰會想要嘅嘢，睇起嚟好似好簡單咁，但其實都好難，唔係想象中咁容易搵到

「哎呀⋯！」梁玥嘉直接投降伏喺枱面，「之後先再諗啦⋯反正仲有成個月⋯」

梁玥嘉雙手捧住自己嘅臉頰，腦海中仍然諗緊要買啲咩比宋千辰做聖誕禮物好，除咗聖誕禮物之外仲有生日禮物，12月係聖誕節，1月6號係宋千辰嘅生日，所以梁玥嘉要一次過諗晒兩份禮物



「要觀察下佢中意咩先得⋯！」梁玥嘉對自己講道，然後忽然間又諗到一個好好嘅idea可以觀察到宋千辰想要啲咩，「我點解唔約佢出街然後留意下佢中意啲咩呢？」

正當梁玥嘉因為覺得自己好醒咁搵到解決方法而笑緊嘅時候，下一秒笑容就塌咗落嚟

「我忽然咁樣約佢出街會唔會好怪⋯？佢會唔會覺得我中意佢之類然後疏遠我㗎⋯」梁玥嘉獨自諗太多，佢怕自己嘅舉動會顯得好奇怪，突然間約宋千辰出去會令宋千辰有所察覺，「唔⋯但我平常心咪得囉！搵日放學話想去行下咪得囉！咁咪會自然啲囉～」

梁玥嘉一諗到呢個解決方法之後即刻又笑容滿面，差啲就想再讚多自己一次好醒

「心動不如馬上行動！」梁玥嘉對自己講道，仲要喺心裏同自己講一聲加油，「聽日放學就拉佢去行下！」

拎喺手上嘅手機忽然間響起嚟，嚇得梁玥嘉差啲將手機都掉埋落地，不過幸好梁玥嘉只係嚇得將手機微微拋起然後瞬間接番住，成個人都只不過係震咗一下，嚇得心臟離一離

「喺唔喺屋企呀？」宋千辰喺梁玥嘉一接咗電話就開口問道

「喺呀，做咩呀？」梁玥嘉問道



「過嚟呀。」宋千辰講道，佢正企喺雪櫃前面將一個貼上咗memo紙嘅蛋糕盒拎出嚟，「過嚟食蛋糕。」

「宜家？」梁玥嘉一臉疑惑地問道，「突然有蛋糕食嘅？」

「原來我媽琴晚又買咗蛋糕番嚟，佢放咗喺雪櫃仲要貼咗memo紙提我叫你過嚟食。」宋千辰將盒蛋糕拎出去飯廳放喺餐枱上面，「過嚟啦。」

「哦。」梁玥嘉哦咗一聲之後宋千辰就收咗線，梁玥嘉將鎖匙同手機放喺外套袋中，著對人字拖就過隔離屋

宋千辰開咗門之後就行去餐枱前坐低，然後打開蛋糕盒；梁玥嘉將大門閂上之後順手地拎咗睡拖著上行入屋坐到宋千辰對面

梁玥嘉拎咗一件一啖咬落去，宋千辰都拎咗一件，梁玥嘉一臉幸福嘅樣子，一食嘢嘴角都會自動上揚

「噗⋯」宋千辰見到梁玥嘉好似為食貓咁，食到嘴角都沾到cream時都不禁笑咗出嚟，「你睇你隻為食貓呀～食到變花面貓啦！」



梁玥嘉伸手抹一抹嘴角但又抹唔中，宋千辰從紙巾盒中抽咗張紙巾，身子前傾同時伸手幫梁玥嘉將沾喺嘴角嘅 cream抹走




IG Link: https://www.instagram.com/nd_cotttocandy/?hl=zh-tw