［愛情純愛］由嗰一個Kiss開始，我地唔再係青梅竹馬: 34. 在雨中

「哎呀！我要比你激死啦！」李穎容用力深呼吸令自己平靜啲，但佢冇辦法平靜落嚟，「唔知呀！你留意下啦！」

宋千辰企喺燈制前面，伸手去開風扇，因為風扇制就喺燈制上方，宋千辰直接就將風扇較咗3度，學校嘅風扇1度係最大風，5度係最細風

楊楠恩蹲喺Locker前面拎嘢，拎出嚟嘅書都放喺大腿上面，喺楊楠恩再伸手入Lokcer拎筆記簿嘅時候，放喺大腿上嘅書都跌晒落去，楊楠恩先執起掉喺地上嘅書，然後用一隻手攬住啲書，另一隻手閂Locker門，喺楊楠恩因為要閂Locker門而將上身向後靠嘅時候，一時失咗重心向後跌坐喺地上，背後撞到啲嘢

楊楠恩回頭望，見到係宋千辰剛好行過，佢撞到嘅係宋千辰嘅小腿

「佢應該會扶我掛⋯」楊楠恩喺心中諗道，但係宋千辰直接邁步行，邁步時仲要縮一縮腳，側一側身先過，楊楠恩嘅內心瞬間有啲失望，「仲以為佢會扶一扶我之類添⋯」



楊楠恩默默用手㩒住地下借力起身，然後行番埋位坐低，獨自喺內心裏失望，佢抬起頭望向宋千辰，宋千辰正同霍思傑佢地傾計，楊楠恩喺心中嘆咗一口氣，默默地耷低頭做自己嘢

「如果係梁玥嘉嘅話⋯」楊楠恩喺心中講道，心底對梁玥嘉嘅妒忌又多咗一分

⋯

「外面又會突然落雨嘅⋯」梁玥嘉企喺自己嘅座位前，望住外面忽然落起大雨

雨水密密麻麻地落下，梁玥嘉一直望住外面，見到天色灰濛濛一片，心中都忽然有一片灰濛濛聚起嚟



「喂！」宋千辰行到去梁玥嘉身後叫咗一聲，但梁玥嘉一啲反應都冇，只係呆呆咁望住出面

宋千辰微微彎下腰，身子向前傾望向梁玥嘉，見到梁玥嘉正放空着

「梁玥嘉！」宋千辰喺再大聲叫咗佢一聲同時輕力推咗佢一下，梁玥嘉即刻回神過嚟望向宋千辰

「你洗唔洗咁大聲⋯」梁玥嘉皺起眉頭，一臉厭惡咁講道，「我聾啦⋯」

「見你發呆嘛～」宋千辰笑了笑，然後又企番好，「番去未呀？」



「嗯。」梁玥嘉點點頭

兩人行到去學校門口嘅時候，梁玥嘉喺書包拎把遮出嚟，宋千辰一臉悠閒咁插住褲袋企喺梁玥嘉隔離

「你唔攞遮？」梁玥嘉將縮骨遮嘅遮套拉出嚟時望向咩都唔做嘅宋千辰

「我冇帶遮。」宋千辰擺出一臉自豪嘅表情咁講道，但梁玥嘉卻係一臉不情願，「最多我擰遮囉～」

「咁大雨⋯！我把遮咁細，點遮兩個人呀？」梁玥嘉一臉嫌棄咁望住宋千辰，將遮套塞咗入去衫袋入面

「得啦！Okay啦！」宋千辰一手搶過把遮，行出去開遮後望向梁玥嘉，梁玥嘉仍然擺出一副嫌棄嘅表情咁望住宋千辰，但都要番屋企，無奈之下唔同宋千辰用同一把遮都唔得

兩人沿路上都冇講嘢亦冇睇手機，雨勢仍然好大，天空仍然係白濛濛一片，樹上嘅樹葉因為風而沙沙作響，雨一絲一絲落下，聽到雨水嘅聲音；宋千辰擔住遮，遮微微傾向梁玥嘉嗰邊，宋千辰嘅博頭都已經濕晒，兩人沿路上都冇講嘢亦冇睇手機

「想和你一齊撐傘漫步雨中 默默牽手走過；你卻將傘拋在風中 擁抱雨和我」



歌詞喺宋千辰嘅腦海中閃過，宋千辰瞄向梁玥嘉，見梁玥嘉一直微微耷低頭時，宋千辰都默默地收回視線

番到去屋企時，兩人冇即刻去㩒密碼推開玻璃門行入去大堂，而係企喺玻璃門前收番把遮，梁玥嘉望向宋千辰，見到宋千辰博頭都濕咗一大片，宋千辰用手潑一潑博頭上嘅水，梁玥嘉喺裙袋中拎咗包紙巾出嚟並抽咗一張，拎住紙巾行到去宋千辰嘅面前幫佢抹

宋千辰先係怔了一怔，然後伸手捉住正幫佢抹乾博頭嘅梁玥嘉嘅手腕，梁玥嘉刻時停下抹嘅動作，微微抬頭望向宋千辰，同宋千辰四目交投；梁玥嘉悄悄地將視線移開咗一秒，然後又將視線落番喺宋千辰嘅身上

喺宋千辰捉住佢嘅手嘅一刻，身體嘅感覺比佢嘅反應嚟得更快，就喺宋千辰嘅指尖掂到佢嘅手嘅一刻，心跳嘅速度已經加快，比起佢嘅反應，嚟得更快嘅係佢嘅心動

有住客行入嚟閂遮，宋千辰一下子就將梁玥嘉拉向自己，梁玥嘉比突然嘅拉動嚇到，佢行前咗一小步，手下意識抬起輕輕扶住喺宋千辰嘅手腕上，同宋千辰之間嘅距離又近咗；宋千辰仍然捉住佢嘅手腕，因為心跳加快而令呼吸變淺咗

「我自己抹得啦⋯」宋千辰腼腆地露出一個微笑，鬆開咗捉住梁玥嘉手腕嘅手，將紙巾從梁玥嘉嘅手中拎走

「嗯⋯」梁玥嘉點一點頭，然後行去㩒大堂密碼



宋千辰拉開門，梁玥嘉先入去，喺上到六樓之後先出咗升降機，再行去另一個大堂前嘅玻璃門拍卡入去等升降機上番屋企

去到16樓嘅時候，升降機門打開，宋千辰先行出升降機，行到屋企門前喺褲袋入面拎鎖匙開門，兩人各自企喺家門前，大家都唔望對方，亦唔講嘢




IG Link: https://www.instagram.com/nd_cotttocandy/?hl=zh-tw