［愛情純愛］由嗰一個Kiss開始，我地唔再係青梅竹馬: 23. 突破

「冇事就好啦～」李穎容聽到梁玥嘉咁講之後鬆咗一口氣一樣，「仲以為你做咩添～」

梁玥嘉拎起放喺自己面前嘅熱朱古力飲咗一啖，濃濃嘅朱古力香味揮發喺空氣之中，熱朱古力沿住喉嚨滑到胃裏，溫暖嘅感覺亦沿住喉嚨擴散到全身，胃裏都感覺到暖意；梁玥嘉放低熱朱古力喺抬面，右手托住下巴，左手仍然拎住裝咗熱朱古力嘅熱飲杯，熱朱古力嘅溫暖停留喺手心，望向外面嘅大街，雨已經停咗，有少許陽光，天空放晴

「穎容，我呢⋯」梁玥嘉臉上掛上淡淡嘅笑容，佢準備同李穎容講一個佢嘅秘密，李穎容聽到梁玥嘉叫佢便抬眼望望佢，將注意力放到梁玥嘉同佢準備辰講嘅嘢上，「有中意嘅人啦⋯」

「咳⋯！咁突然嘅？」李穎容比突如其來嘅消息嚇了一嚇，真係剎佢一個措手不及，不過對於好姊妹中意嘅人仍然係充滿咗滿滿嘅好奇心，「不過你中意嘅係⋯咁所以你中意嘅人係⋯」

「我中意咗千辰。」梁玥嘉望向李穎容微笑着講道，喺梁玥嘉嘅眼裏睇到堅定，笑容都甜甜的





「吓！？」信息量一下子暴增，李穎容一臉震驚，手掩着口，直盯着梁玥嘉，「真係㗎？定你講笑咋⋯？」

「我講真㗎，我真係中意咗佢，但佢唔知，亦冇其他人知道㗎！你唔好講出去呀！」梁玥嘉有啲緊張咁講道，心跳都加速緊

「Okay～」李穎容比咗個Okay手勢，「我唔會講出去～」

「但呀，好似好難可以好心動咁⋯唔知係咪因為我地太熟呢⋯」梁玥嘉雙手捧住熱飲杯，「小小心動係有，但係要有好強烈嘅感覺又有啲難⋯」

「你如果係中意佢嘅話，你要突破一下先得！」李穎容講道





「突破？突破啲咩呀？」梁玥嘉唔明白李穎容嘅意思

「咁梗係要突破你同佢嘅關係啦！你中意佢，想進一步或者有改變嘅話，當然要衝破你同佢嘅comfort zone！」李穎容心裏有啲興奮咁講道，但佢眼見梁玥嘉又係一臉不解，李穎容嘆咗一口氣，然後又再解釋起嚟，「即係，你同佢嘅comfort zone係青梅竹馬嘅關係，咁你要做嘅係踏出呢個comfort zone。」

「咁我要點做先算係踏出咗comfort zone？」梁玥嘉追問李穎容

「呢個就要你自己諗啦～宜家係你中意佢，又唔係我中意佢～」李穎容聳聳肩，「鼓起勇氣勇敢啲就好。」

「哦⋯」梁玥嘉哦咗一聲，其實佢都係唔太明白要點樣踏出confort zone先啱，有太多疑問





佢唔知宋千辰會唔會都中意佢，佢亦唔知道佢要點樣當宋千辰唔係佢嘅青梅竹馬，因為已經習慣咗好多年，再者佢唔知佢可以點做

梁玥嘉同李慣容講嘅原因係因為來佢幫自己一把，因為佢自己都係第一次感覺到中意一個人嘅感覺，以前都冇試過，豈料李穎容叫佢自己諗，梁玥嘉就更加苦惱

放喺一旁嘅手機震咗一震，螢幕亮起嚟，梁玥嘉拎起手機睇，見到係宋千辰搵佢

「應該都係叫我幫佢買水⋯」梁玥嘉喺心中諗到

一般人見到自己中意嘅人WhatsApp自己嗰陣都會好興奮，但佢梁玥嘉完全冇呢個感覺，仍然好自然咁諗到宋千辰係叫自己幫佢買水，完全冇嗰種心動嘅感覺

正確嚟佢係，有時兩個人有意無意嘅接觸會有心動嘅感覺，但對於呢啲日常事，佢冇咩感覺

宋千辰：幫我買水

「都估到㗎啦⋯」梁玥嘉喺心中有啲自豪咁講道，然後回覆：「Okay」





番到學校之後，梁玥嘉去咗小食部幫宋千辰買咗支細支裝嘅水，反正仲有三堂就放學，都冇咩必要買大支裝嘅比佢，所以揀細支嘅就啱啱好啦

「佢又叫你幫佢買水呀？」李穎容喺梁玥嘉行去小食部嘅時候就已經估到，但係冇問，一直到梁玥嘉買完水先問佢

「哦，係呀，佢平時同霍思傑佢地成日都啱啱好先番嚟，佢邊度買得切呀～」梁玥嘉拎住支水，同李穎容一同踏上樓梯，「咁佢知我唔會咁遲番，咪叫我幫佢買。」

「你唔會覺得係佢信得過你或者覺得自己對佢嚟講特別？」李穎容問道，想睇下梁玥嘉會答啲咩

「唔⋯我只可以話對我嚟講佢係特別嘅存在囉，一直都係。不過我唔會覺得對佢嚟講我都係特別，可能會係囉，但我唔會肯定。」梁玥嘉諗咗一諗之後微微笑講道

「你同宋千辰真係有種好特別嘅相處方式⋯其他人想學都學唔嚟⋯」李穎容一臉無奈咁講，佢除咗咁講之後都唔知可以講咩，「我諗就算你兩個拍拖嘅話，同宜家都唔會有太大差別⋯」

「呿，真係會一齊先算啦！」梁玥嘉挽住李穎容嘅手臂，「到時先算啦～」





梁玥嘉番到課室之後就同平時一樣將幫宋千辰買嘅嘢飲放喺枱角，等宋千辰番嚟嘅時候拎

梁玥嘉坐喺自己位轉身望向後面同李穎容傾計，呢個時候楊楠恩都番嚟，楊楠恩手上抱住一大疊嘢簿行入課室




IG Link: https://www.instagram.com/nd_cotttoncandy/?hl=zh-tw