［愛情純愛］由嗰一個Kiss開始，我地唔再係青梅竹馬: 22. 下雨天

星期一嘅時候，大家如常番學，喺每一個課室嘅門外放滿仍然滴緊水嘅遮，今日係落雨嘅日子，雖然只係毛毛雨，但喺冬天落雨簡直就係雪上加霜

「呢排已經夠凍啦，仲要落雨！」梁玥嘉側住身住，手上拎住暖包，望住一個又一個同學番嚟喺門口放遮然後行入課室

「你已經拎住暖包啦，仲話凍⋯我連暖包都冇呀！係咪想食凍柑呀！」李穎容嘅雙手都插喺校褸嘅嘅口袋中，佢抽出一隻手朝梁玥嘉嘅臉頰伸去

「縮手啦！」梁玥嘉頓時伸手擋住李穎容嘅手，豈料李穎容直接握住梁玥嘉嘅手，「你隻手好凍呀！」

梁玥嘉縮都縮唔切，但係李穎容緊緊地握住梁玥嘉嘅手，梁玥嘉係想縮都縮唔到



「咦，楠恩番嚟啦～」梁玥嘉望向外面時見到楊楠恩喺課室外面放緊遮，將遮放好之後轉身行咗兩步到課室嘅門口撞門鎖，推門入嚟

「早晨～」楊楠恩見到梁玥嘉同李穎容，經過佢地嘅座位時同兩人講道

「早～」梁玥嘉微微一笑，視線不自覺地就往宋千辰嘅方向望去

宋千辰一隻手插喺褲袋入面，另一隻手騰出嚟滑手機，因為宜家未到早會時間，所以大家都喺課室，而宋千辰平日都係一番到學校就睇手機，除非有未做完嘅功課就會好努力咁做埋份功課

「好凍呀⋯」李穎容捉住梁玥嘉嘅手搖咗兩下，將梁玥嘉嘅視線帶番嚟，「點解今日會咁凍㗎？」



「我都覺得好凍，但冇辦法。」梁玥嘉捉住李穎容隻手，哭喪著臉講道

梁玥嘉悄悄地再一次將視線移向宋千辰，默默地記起上次宋千辰將圍巾圍喺佢頸上嘅舉動，心中頓時一暖，耷低頭微微一笑，心中都忍唔住笑意

「笑咩呀？」李穎容見到梁玥嘉偷偷地笑着便問道，呢個時候剛好要去早會，因為外面都已經停雨

「冇笑咩。」梁玥嘉瞬間抿着唇搖搖頭

「笑得咁甜，做咩呀？中意嘅人搵你呀？定係最近有中意邊個咁呀？」李穎容講嘅時候宋千辰同霍思傑、張子萊啱啱好行過，宋千辰亦聽到李穎容講嘅嘢



宋千辰望向正企起身準備落去嘅梁玥嘉一眼，心裏有啲在意；梁玥嘉望到宋千辰時，宋千辰剛好撇開臉

「笑得咁甜，中意邊個⋯？」宋千辰喺心中默默地諗道，難以掩蓋心中嘅在意

「冇呀，你唔好亂講！」梁玥嘉講道，但呢個時候宋千辰已經出咗課室，冇聽到梁玥嘉講嘅嘢

「喂！」喺梁玥嘉同李穎容踏出課室時，李子迪拍咗梁玥嘉一下

「點呀？抄完啦？你唔好抄到咁足呀，唔好連累我都比人罰。」梁玥嘉望向李子迪講道，李子迪笑了笑

「我當然唔會啦，我都唔想比人罰！」李子迪伸手拍咗梁玥嘉嘅額頭一下，「我咁醒，梗係唔會抄足啦～」

「喂呀！」梁玥嘉輕皺起眉頭，輕力地打咗李子迪嘅手臂一下，「冬天唔好打我啦！又凍又痛呀！」

「睇在你借咗份News cut比我份上，唔恰你啦！」李子迪行喺梁玥嘉身旁，笑着比一個Okay手勢，李穎容行喺梁玥嘉身後，同楊楠恩一齊行



「你早就唔應該恰我，再恰我嘅話我下次就唔借功課比你！」梁玥嘉細聲咁哼咗一聲，以功課作為威脅，「你下次就問第二個借啦！」

「呿！你唔會見死不救嘅～」李子迪笑道，「大家咁熟，你唔係唔幫我呀嘛。」

宋千辰行喺前面，距離並唔係真係相隔好遠，但係都可以聽到從後面傳嚟嘅嬉笑聲，聽到梁玥嘉嘅笑聲，佢心只係覺得有啲不爽，唔係因為佢唔中意李子迪，只不過係，佢唔可以否認佢的確介意李子迪同梁玥嘉咁熟⋯宋千辰唔擔心自己嘅位置會比人取代，因為佢知道喺呢一刻係冇可能嘅事，佢知道亦肯定自己係特別嘅存在，即使梁玥嘉冇講都好

聽到從後面傳嚟嘅嬉笑聲，佢只覺得自己比起以前更加在意，在意，只係因為佢中意梁玥嘉

「行快啲啦要，差唔多打鐘啦！」張子萊一句提醒，佢地連忙落樓梯到操場集隊上早會

Lunch time嘅時候，今日只有梁玥嘉同李穎容一齊食飯，楊楠恩因為有啲事所以冇同佢地一齊食飯

李穎容同梁玥嘉今次去咗一間cafe，食個下午茶然後再番學校，兩人坐喺落地玻璃窗邊嘅一張小圓枱，枱上放咗兩隻空碟，同兩杯熱飲



「呢間cafe啲嘢都幾好食，下次可以再食呢間～」李穎容講道，佢抬頸望向梁玥嘉，只見梁玥嘉托住腮望住外面嘅大街上來來往往嘅行人，雨水打喺落地玻璃窗上，一副若有所思嘅表情，「玥嘉？」

李穎容見梁玥嘉發晒呆咁，便伸手拍一拍梁玥嘉嘅博頭，梁玥嘉先醒過嚟

「做咩呀？」梁玥嘉問道，李穎容輕皺起眉頭，心中有啲擔心

「你係咪唔舒服呀？」李穎容擔心地問道，「定係太凍啦？」

「冇事。」梁玥嘉微微一笑，搖搖頭，「只係今日又落雨呢～心情都好一般。」




IG Link: https://www.instagram.com/nd_cotttoncandy/?hl=zh-tw