［愛情純愛］由嗰一個Kiss開始，我地唔再係青梅竹馬: 08. 不可否認

梁玥嘉拖着步伐行番入房，閂上房門同時將書包放到書櫃邊，佢行到書枱前坐低，手上拎住手機，但冇解鎖，只係拎住

「你們不會一直在一起，縱使認識了很長的時間，從前一直都在一起，但最後你們還是會分開，有各自的一片天地

也許你們都各自認識了另一半，慢慢地愈走愈遠，不再像從前一樣

你們不會一直都膩在一起，總有一天會分開」

莫名其妙地，梁玥嘉因為呢一句「事實」而心中覺得悶悶的，佢心底裏都知道呢個係事實⋯當去到某一日，宋千辰識咗女朋友，嗰個女仔就會取代佢嘅位置，佢唔會再係宋千辰心中特別嘅存在，佢地亦唔可能再好似宜家一樣親近





梁玥嘉明白呢啲係事實，無可否認嘅事實，但係梁玥嘉從來都冇諗過呢啲事，呢一個帖文就好似係「一言驚醒夢中人」一人，以前梁玥嘉唔會去諗將來嘅事，因為佢覺得自己係特別嘅存在，但唔知點解喺睇完呢個帖文之後，諗到宋千辰將來嘅女朋友會取代自己就覺得悶悶不樂

「我地唔再係對對方嚟講特別嘅存在⋯」梁玥嘉喺心中講道，心中覺得悶悶的，或者只係因為一切嚟得太快，佢從來都冇諗過呢啲事

手上拎住嘅手機震咗一震，螢幕亮起，梁玥嘉將手機解鎖，原來係宋千辰喺WhatsApp搵佢

宋千辰：你今日做咩？

梁玥嘉怔了一怔，然後諗緊要點樣回覆宋千辰，諗咗一陣之後都係唯冇扮咩事都冇咁反問：「咩做咩」





訊息喺send出去之後瞬間就變咗雙藍剔，宋千辰嘅狀態由「在線上」變成「輸入中」

宋千辰：你今日好似悶悶不樂咁

「冇呀，諗緊嘢咋嘛」梁玥嘉隨便搵咗個理由回覆搪塞過去

宋千辰：哦～仲以為做咩添，幾驚係因為我做啲咩激嬲你呀

「我唔會嬲你，因為我都唔將你放眼內～」梁玥嘉以開玩笑嘅方式回覆道，宋千辰見到梁玥嘉嘅回覆時都只好無奈咁笑了笑，佢地彼此都知道對方只係講笑，所以冇覺得嬲之類嘅感覺





宋千辰：冇嘢就好啦～

梁玥嘉直接已讀咗宋千辰嘅訊息，佢嘅心情又好番咗好多，梁玥嘉放低手機喺枱上面然後行出房；但另一邊廂就唔一樣，宋千辰send比梁玥嘉嘅訊息中雖然有好笑喊嘅emoji，本來臉上亦輕鬆着，但喺梁玥嘉send過嚟嘅最後一個訊息send咗過嚟之後，本來臉上嘅輕鬆都已經塌咗落嚟

「嘉嘉真係唔同我講⋯唔通佢真係冇咩所謂⋯？」宋千辰坐喺梳化上仰頭望住天花板

今日梁玥嘉睇嘅IG帖文，宋千辰瞄咗一眼，因為嗰個帖文嘅account佢都有follow，宋千辰番到屋企之後無意間睇到同一個帖文，睇完之後，佢好似知道點解梁玥嘉喺放學嗰陣忽然間會有咁樣嘅反應

「佢係咪唔在意？」宋千辰喺心中問自己，佢覺得梁玥嘉唔在意，係因為佢好在意呢個問題同梁玥嘉嘅反應

睇完帖文之後，宋千辰同梁玥嘉有同樣嘅感覺，一言驚醒夢中人，大家都「終於」發現佢地冇可能一直一齊

宋千辰將佢嘅前臂蓋住雙眼，記起上次同梁玥嘉Kiss嘅時候，唇碰上時嘅觸感⋯

嗰個吻就好似一個神秘開關一樣，令宋千辰對梁玥嘉嘅感覺起咗好大嘅變化





本來只會係喺諗起嗰個Kiss嘅時候先會覺得耳根發熱，但宜家就連同梁玥嘉行埋少少佢都會覺得渾身唔自在，嗰種唔自在唔係因為佢討厭梁玥嘉而唔自在，佢唔自在係因為佢覺得一行埋梁玥嘉身邊就好似比電電到咁

宋千辰亦感覺到佢比以前更加在乎梁玥嘉嘅想法，當佢變得特別在乎嗰陣，梁玥嘉嘅態度即使同平日一樣，佢都會覺得梁玥嘉變咗

佢唔敢肯定自己嘅感覺，但佢察覺到佢對梁玥嘉嘅感覺起咗變化，變得同以前唔一樣

門口嗰邊傳嚟開門聲，宋千辰放低手坐好起嚟望向玄關位，眼睛因為已經適應咗黑暗而且啱啱又用手臂壓住，搞到宜家望嘢嘅時候有殘影，仲要有一個個好似圓形珠片一樣嘅殘影喺眼前

「今日好凍呀！」宋千辰嘅媽媽拎住一袋兩袋行入屋

「咩嚟㗎呢個？」宋千辰行到去餐枱前，拎起一個長方型嘅蛋糕盒，「仲買咗兩盒？」

宋千辰打開其中一盒，入面放咗四件精緻嘅蛋糕





「阿辰你拎一盒過去比嘉嘉啦～」宋媽媽拍一拍宋千辰嘅手背，然後拎起其他嘢行去廚房

「宜家？」宋千辰望向宋媽媽，一副欲言又止嘅表情

「係呀，唔係等幾時？」宋媽媽喺廚房講道，「快啲啦！拎一拎去隔離咋嘛！」

宋千辰無奈地拎起未開嗰盒，然後行到去玄關換上人字拖，打開門，行去隔離B室嘅門口㩒鐘

坐喺廳睇緊電視嘅梁玥嘉聽到門鈴響起嘅聲，心中嘅第一個反應係「唔通媽媽冇帶鎖匙？」




IG Link: https://www.instagram.com/nd_cotttoncandy/?hl=zh-tw