［愛情純愛］由嗰一個Kiss開始，我地唔再係青梅竹馬: 07. 不可能一輩子的友誼

「宋、千、辰。」梁玥嘉壓低聲線，再叫多一次宋千辰嘅名

宋千辰忽然感覺到背後發涼，佢回頭一望，見到梁玥嘉正直勾勾地望住佢，臉上仲要一啲笑容都冇

「咦！？你幾時企咗喺度㗎？」宋千辰嚇咗一跳，將手上嘅嘢放入書包

霍思傑同張子萊見到宋千辰呢個反應笑咗出嚟，正喺佢背後偷笑着

「你估下⋯」梁玥嘉反咗一下白眼，無奈咁問道，「行得未呀？我肚餓。」





「行得啦。」宋千辰孭起書包，然後將張櫈拍番埋，然後皺起眉頭望向梁玥嘉，「你可愛啲得唔得啫？咁厭世會搵唔到男朋友。」

「關你鬼事⋯」梁玥嘉又反咗一下白眼，「你顧好自己先啦！」

「好啦好啦，唔好打情罵俏啦，單身狗無罪。」霍思傑開玩笑講道，張子萊則喺隔離笑了笑

「吓話～」宋千辰望向佢兩個，笑咗一笑，「走啦，拜。」

宋千辰同梁玥嘉都慣咗大家拎佢地嚟開玩笑，一開始都會否認，但久而久之就習慣咗呢個玩笑，因為都聽慣咗大家咁講，而且大家都只係講笑





「我話咗比穎容知，我地唔係couple。」梁玥嘉講道

「吓！？」宋千辰好大反應，頓時望向梁玥嘉，「陣間佢講比Joshua知，Joshua又講比Ashley知我咪大獲？」

「唔會，穎容信得過。」梁玥嘉平靜地講道，「但如果佢係講咗嘅過，我都冇辦法⋯」

「想錫多次呀？」宋千辰嘅手繞過梁玥嘉嘅背搭到佢肩上，「想錫多次咪直接講囉～」

宋千辰微微低頭望向梁玥嘉同時，梁玥嘉抬起頭望佢，兩個人嘅視線瞬間對上咗





宋千辰莫名其妙地怔了一怔，慢慢地收起咗佢嘅嬉皮笑臉，梁玥嘉抿唇，移開視線，宋千辰收回搭喺梁玥嘉肩上嘅手，然後望一望四周分散注意力

「總之，如果Ashley又嚟找我麻煩，你要同我一齊搞番掂。」宋千辰撇開了臉，佢忽然覺得自己耳根發熱

兩個人之間忽然瀰漫著一種難以言喻嘅感覺，呢種感覺好新鮮，係一種講唔出口嘅尷尬，同普通嘅尷尬又存有少許差別

「嗯⋯」梁玥嘉耷低頭，因為佢覺得自己嘅臉頰發熱中，心跳加速嘅感覺隨之而來

兩人又再一次靜咗落嚟，只係安靜地並肩而行行番屋企

梁玥嘉嘅腦海中空白一片，行緊嘅時候一不小心就比地上翹起咗嘅磚絆倒

「嘩，比你嚇死啦！」宋千辰反應好快，喺梁玥嘉成個人失重心向前跌時，一下子就伸手捉住梁玥嘉嘅手肘然後再往後拉咗一下，「行路就唔好發夢啦！」

「嚇到我⋯」梁玥嘉提起手放到自己胸口前輕力咁拍咗兩下，「差啲心都飛埋出嚟⋯」





「行路就睇路啦！」宋千辰嘅語氣中帶着一絲訓斥，「下次我唔喺你隔離或者我扶唔到你，你就做好親吻大地嘅準備啦。」

「唔好講到自己好重要咁⋯」梁玥嘉聽到宋千辰嘅說話就忍唔住反一個大大嘅白眼

梁玥嘉忽然加快咗步伐，宋千辰摸不著頭腦咁望住梁玥嘉嘅背影

「我講錯嘢⋯？」宋千辰心諗，然後默默咁追上梁玥嘉嘅步伐

宋千辰再一次行喺梁玥嘉身旁，梁玥嘉冇望佢，一直望住前面行，宋千辰嘅視線悄悄地落喺梁玥嘉身上

忽然有種感覺，眼前嘅女仔好似唔再係同自己青梅竹馬嗰個女仔，好似變咗另一種存在一樣，梁玥嘉比佢嘅感覺都唔同咗

「望住我做咩？」梁玥嘉望向宋千辰，頭微微側着





「冇⋯」宋千辰搖搖頭，然後撇開了臉，因為覺得尷尬所以故意唔望梁玥嘉

「哦。」梁玥嘉見到宋千辰嘅反應之後都冇特別在意，視線再一次落喺手機嘅螢幕上

梁玥嘉睇緊喺IG follow緊嘅啲語錄ac，一直順住睇落去，梁玥嘉嘅手輕撥着手機嘅螢幕，移到下一個帖文

下一個帖文嘅圖中寫着一句話：「青梅竹馬不可能一輩子」梁玥嘉怔了怔，然後點了「更多」二字睇完整嘅caption

「冇可能一直一齊⋯」梁玥嘉幾乎係用喉嚨發音般細聲講，幸好宋千辰冇聽到佢講咩

梁玥嘉望住帖文嘅內容，一行一行嘅字慢慢地印喺佢嘅腦海中一樣，梁玥嘉睇睇下就好似慢慢咁醒覺一樣，佢一直以嚟都冇諗過其實佢同宋千辰唔會一直一齊，總有一日會分開

沿路行番屋企，梁玥嘉都冇出聲，宋千辰見到梁玥嘉忽然間嘅改變，宋千辰覺得有啲奇怪，但始終都冇問出口

直到行到番屋企門口，兩人各自行到家門前都冇再講嘢，佢地都已經習慣咗唔講「拜拜」、「聽日見」之類嘅說話，宋千辰本來仲想喺入屋之前問梁玥嘉咩事，但一望過去時就見到梁玥嘉行咗入屋





木門一下子就閂上咗，宋千辰心裏覺得怪怪，但始終去到最後，一個字都冇問到出口




IG Link: https://www.instagram.com/nd_cotttoncandy/?hl=zh-tw