［打鬥/靈幻/鬼怪］《輪迴。道》/《噬魂》我由古惑仔變咗做現代道士: 466《第二季》

原來這司機碰巧就是英叔跟葉靈一起趕往殮房對付雙生靈那次的司機

「英叔，你地識㗎？」啊武正在扶啊烈下車

「哈，唔知算唔算識呢，你地過去先，葉靈係前少少等緊你地」英叔笑說

「識～捉鬼大師！原來你啲朋友咁富貴嘅！下次再要車，記得搵我啊」司機馬上拉關係

「啊！啊武你咪揸咗車去㗎囉！點解我地啱啱唔揸車走？！」我這才突然想起啊武有車





「我記得啊，但啱啱情況咁亂，就算我地上到車，都未必走得甩」啊武原來在心中已有考慮

「唔好講咁多啦，送佢上去先」英叔拍拍我們說

「捉鬼大師！」司機突然叫住英叔，所以我們先帶啊烈去找葉靈，行前數步後，我們就看到葉靈站在一間名為祺威粉麵的店鋪前得我們

「佢點？」葉靈問我

「佢背脊同腳都比人斬咗刀，啱啱流咗好多血，不過我暫時同佢止咗血」





「咁應該死唔去」葉靈一臉冷漠的說

「啊靈，你可唔可以幫佢回一回先？唔該你」啊武誠懇的看著葉靈

「咁我又冇話唔幫，我企係到都係貪依個位冇閉路電視姐」其實葉靈這個人就是口硬心軟，我都已看穿她

「唔該曬你」啊武露出開心的笑容

「嗯」葉靈輕輕點了個頭





老實說，現時的葉靈已比剛認識的葉靈軟化了很多，就像剛剛那一下點頭回應，以前的她根本不會做

「點啊司機大佬」英叔再次彎下腰靠著車窗

「冇～我唔記得上次有冇比卡片你，依家比張你先」之後司機就向英叔遞上一張卡片

「哦～咁樣，好啊」英叔接過卡片

「喂！好！就咁啦！今日多謝曬啊！下次記得有咩事打比我啊，幾遠都飛過嚟」司機開心的把車駛走了

英叔目送司機離開後，來到我們旁邊

「啊烈哥仔，補一補精神咗好多啦，不過我八卦想問下呢，你啱啱比咗幾多錢個司機？佢笑到成隻狗咁喎」英叔主動問啊烈

「唔係好多，萬一、二到啦」啊烈輕輕說過





「萬一、二？！」英叔聽完後瞪大了雙眼

在旁的我們也是同樣震驚

「啊烈哥…搭的士姐，唔洗比成皮野㗎喎」啊仁口都在震

「唔緊啦，少少錢，佢又得開快啲」啊烈卻像毫不在意的搖搖手

「嘩…犀利」英叔舉起拇指上下擺

「英叔，唔好講咁多啦，同佢地上去先啦」葉靈打斷英叔的話題

「啱啱啱，𡃁仔武仔啊，你地都攰㗎啦，你地抖下慢慢行啦，仁啊，我同你扶佢上去啦」說罷，英叔和啊仁就接手了我和啊武的工作，把啊烈先扶上去





「你點？」英叔他們加快步速後，葉靈主動過來問我

「我….我冇事啊，我打咗幾….」

「嗯，冇事就得」我話都還未說完，葉靈就已經打斷了我，然後自己走了

「呃…」我呆站在原地，無奈笑了一下

「點解佢唔問我有冇事嘅」啊武楚楚可憐可憐的看著我

「呃….或者…佢..」我腦袋一時運轉不了

「我講笑咋！」啊武笑著拍拍我

「死仔！行啦！」





不知為何，我總感覺啊武在停車場擊中頭後就變得有些不同，但你若問是什麼不同了我又回答不上，就是不同了

叮….叮….鈴…..

我看到來電顯示時呆了一下

「做咩？邊個打嚟？」啊武察覺我的表情

我把電話轉給啊武看，是陳一的來電

「喂，陳sir」我還是接通了電話

「你班打靶仔！又搞咁大單野出嚟啊嘛！」





「陳sir ，我唔係好明你講咩喎」

「原來係特登引我過去幫你地執手尾，你唔好比我係閉路電視搵到證據，搵到嘅話你地唔會有好日子過」

糟糕…我們完全忘了閉路電視這回事