［打鬥/靈幻/鬼怪］《輪迴。道》/《噬魂》我由古惑仔變咗做現代道士: 465《第二季》

嗚！！！！警車的警笛在外面傳來

「都唔知係陳一定有人報警」我們仨還在努力的跑往出口

「唔理啦，出到去就安全啦」啊武說

「但佢地…應該會拉埋你地返去」啊烈帶點愧意的說

「人冇事最緊要啦，我地走得甩算大命啦」啊武笑說，這時我們已跑到停車場入口的收費亭





滋！！！突然一輛的士在收費亭外的路邊急剎

「喂！上車啊！差佬到啦陳一嚟緊！」是啊仁，幸好他還算聰明，一聽到附近有警笛聲就馬上來接我們

「喂！大佬啊！你有冇搞撚錯啊，要停車你咪出聲囉！你掹我頭髮做乜春啊」在停車場內也聽到的士司機在大罵

身後又突然傳來聲響

「啊！」是西狗的聲音，原來他一早便走到出口處準備伏擊我們





「跑！」啊武把啊烈全交給我，自己轉身應付西狗

「唔信斬你唔撚死！」西狗拿著刀刺啊武的肚皮

啊武看準時機輕輕格手一擋就把西狗的手撞得瘀黑，手上的刀也隨之脫手了

西狗一臉錯愕的看著啊武，啊武當然不會放過面前的西狗

砰的一聲，西狗已被啊武打了一拳上勾拳，整個人在空中打了個翻，而啊武在西狗打翻時，一手按著他的胸口，用力壓下





嘭！！西狗凌空的被按到地面，整個背脊受力撞擊，把他撻得一個「痴肺」

把西狗解決完後就馬上跑往我們

「嘩….咳咳咳！！你老味！咳咳！唔怪得你地對佢唔冧啦….手足！散啦！下次再玩過！」吃了虧的西狗也知道警察快要到了便馬上吩咐手下散去

「上車上車！」啊仁幫啊武開門

「醒目啊！識嚟接我地」我拍拍坐在副駕駛座的啊仁

「緊係啦！不嬲都咁醒」啊仁得戚的說

「喂大佬！你地成身血咁款，整污糟曬我架車，唉！我唔做你地生意啊！落車落車！」的士司機一臉嫌棄和鄙視的看着我們

啊烈默默的在袋中拿出了一大疊千元大鈔





「識做嘅….依啲你嘅」啊烈看都沒有看司機一眼，然後一手把紙幣一下灑到司機座位

「嘩！！得得得！！識做識做！」司機大哥見錢開眼，雙眼像發光一樣

「你唔好講咁多野啦！差佬到啦開車啦！」啊仁從旁拍他的頭一下

「得得得！咁多位老細坐穩啊！」的士司機突然車神上身，將油門踩到最盡

「咁多位老細，你地依家要去邊啊？」

「佢咁樣，係咪應該要去醫院？」啊仁在倒後鏡看著滿身傷痕的啊烈

「唔得，依家去醫院佢會好危險，西狗隨時會搵人去醫院搞啊烈，又或者西狗未到陳一就拉咗啊烈」我嘗試分析目前情況





「直接去九叔到啦」我說

「師傅，直接去象山邨，唔該」啊武有禮貌的跟司機說

「得！收到！」司機繼續踩盡油門，在馬路上飛馳

「有錢真係好」看到司機態度一百八十轉變的啊仁不禁在「葡萄」啊烈的財力

我們沒有答話，車內就頓時安靜了下來，之後我致電給了英叔，告訴他大概的事情，讓他們先準備一些包紮療傷用的用品

而有了金錢的力量下，司機不用二十分鐘就把我們送回了象山

「嘩，又真係幾快喎」啊仁說

「係啊係啊，如果唔係有快相可以再快啲㗎」的士司機「烚熟狗頭」的點頭笑說





「依到，再醒你嘅」啊烈再拿出了幾張千元大鈔給司機

「嘩！多謝咁多位老細」司機笑得見形不見眼的在收拾鈔票

「𡃁仔！」英叔走到我們的車旁

「咦！你咪捉鬼大師！」的士司機在窗口處看到英叔的樣子

「係你啊司機大佬，我地真係有緣啊」英叔靠著副駕駛座的車窗看進車內