［打鬥/靈幻/鬼怪］《輪迴。道》/《噬魂》我由古惑仔變咗做現代道士: 371《第二季》

「唏！仁仔！」英叔見事態發展不對勁馬上上前搭著啊仁，阻止他繼續說下去

「咁係啊嘛….」啊仁被英叔截住後，開始意識到剛剛自己在做蠢事

「講多咗啦，返去啦」就這樣，英叔搭著啊仁慢慢走回九叔家，而啊武則跟著在後

九叔看著前方的啊仁，搖頭嘆息

「九叔啊…其實真係啊仁贏，不如…」我正想說時





「唔洗講，我話你贏就你贏」九叔先截住我的話，說完後他也往家走回去

「…..」唉…看來之後就麻煩了

回到去後，九叔解開了結界，淡淡的綠霧消失，我們的世界又回復原狀

而九叔的所謂「懲罰」就是老土到不得了訓練，雙手每邊各掛着一個盛滿水的水桶，手要向前伸直，然後雙腿紮一個四平馬，即是大腿平行於地面，大腿和小腿要垂直成為直角，呈現出90度

而屁服放著一大束點燃的香燭，稍一放鬆，馬上「火燒後欄」





「依到啲香嘅時間係一個時晨，即係兩個鐘，依兩個鐘內你兩個好好地同我紮馬，對手都唔好放低」九叔站在啊武和啊仁面前說

「係！」啊武對於訓練從來都沒有怨言，反而是喜歡訓練

「……」而啊仁從表情上就知道，他還是因為結果而感到不忿

「你幫我睇住佢地」九叔跟英叔交帶一聲就回到房間去

一見九叔關門，我馬上去到英叔旁邊





「英叔啊，不如唔好罰啊仁啦….咁樣對佢真係有啲唔公平」

「你條友仔，想我都比人鬧埋一份啊？」英叔高低眉的看著我

「唔係啊…但…」我看一看啊仁，再看著英叔

「你唔好咁嘅表情先，你話對仁仔唔公平，咁點解唔公平？」英叔蹺起手問我

「咁啊仁真係自己搵到三條白布帶，我就搵到兩條，點計都係啊仁贏啊」

「結果你係四條啊，𡃁仔」

「咁係因為啊武比我姐」

「呢個就係重點，你師父點解會堅持話係你贏唔係仁仔贏，就係咁解」英叔邊說邊點頭





「下？！」但我完全不理解

「點解武仔唔將佢個兩條比仁仔，要比你？」英叔問我

「因為我同佢一齊對待嗰對母子鬼….」

「因為你救咗佢，佢先將佢嘅白布帶比你，你救佢係你種下嘅因，你得到佢嘅布帶係你得到嘅果，明未？」

「哦….」我似懂非懂的點頭

「其實你師父注重嘅唔係你地得到幾多白布帶，而係點樣得到，聽武仔講，係佢決定回頭搵你嗰陣，仁仔係決定去搵布帶，我諗依樣係令你師父最失望嘅原因」

「點解啊？」





「佢為咗勝負，放棄咗同伴」




「原來九叔諗到咁遠….」英叔這樣一說我才懂

「講真，我都有啲失望嘅，不過我信仁仔心裏面唔係咁」英叔看一看啊仁

「不過之前都唔覺啊仁係咁嘅…」我回想這幾個月跟啊仁的相處，也不見得啊仁是放棄同伴的人

「𡃁仔，有時做人唔可以淨係睇表面，人唔去到緊急關頭都唔知邊個先係真同伴」英叔拍一拍我的後背

「喂仁仔！個馬紮低啲！好似武仔咁先啱啊嘛！要90度」英叔再看向他們二人並向啊仁叫喊





「……我根本都唔應該要受罰」啊仁在口中碎碎念的

「仁啊，唔好咁啦，咪當訓練囉，訓練先會進步㗎啦」一旁的啊武大概也猜到啊仁在說什麼

「得啦….」啊仁不耐煩的說

「特別訓練」結束後，九叔也宣佈今天的所有訓練都結束，真是漫長的一天啊….