［打鬥/靈幻/鬼怪］《輪迴。道》/《噬魂》我由古惑仔變咗做現代道士: 321《第二季》

「我見你啱啱完全冇熱身就開始跑，咁樣絕對唔得啦，咁樣跑法，跑多兩年你就玩完㗎啦兄弟」

「唔係咁誇張啊嘛？！」我驚訝

「嗱，如果你唔熱身就跑呢，你嘅心血管系統同呼吸系統會進入唔到狀態，會導致肌肉血液供應唔到」

「夏天都仲好啲，如果係冬天嘅話，人嘅體溫相對較低較低，肌肉更加難入狀態，咁樣就更容易造成韌帶或者肌肉依啲軟組織損傷」

「無咁樣講一講….好似又真係幾嚴重，咁我應該點做？」我主動問他





「其實好簡單，下次跑之前拉下筋、壓下腿又或者慢跑熱下身先再跑」他提出建議

「好…下次我留意下先」我聽後點頭

「仲有！你啱啱一下就突然急停，隨時暈低啊」

「但好攰喎，唔停咪仲攰？」

「你地好多人都習慣咗一跑完了就突然停低，係依個時候本來有節奏嘅肌肉運動突然靜止，會導致儲存係肌肉入面嘅血液唔能夠通過肌肉收縮而流返心臟」





「咁樣會令到血壓降低，咁大腦就會出現暫時缺血，輕則會頭暈眼花、面色蒼白，重則會出現休克昏迷嘅症狀，所以你以後跑步個陣，如果真係好攰都唔好即刻停低，要轉為慢跑，約莫一、兩分鐘先停，咁樣就最好啦」

他解說得十分專業清晰，一看就知是下過苦功，但不知為什麼這麼專業的形象跟他這個不是很搭配，總是有一種違和感存在



「呃…..好！多謝你嘅意見，我會跟住做㗎啦」我向他道謝

「唔洗客氣，我記得上次撞過你，所以先留意下你跑步」他居然跟我一樣，也記得那晚相撞的事情





「哈！你都記得啊？我都記得你」我笑說

「講返起，我地都未自我介紹，你好，我叫李梓武，平時啲人都係叫我啊武」

「你好，我係陳天航，可以叫我啊航」

就這樣，我多了一個「不撞不相識」的朋友

在之後的日子裏，我由每隔一天就會去運動場漸漸變成了每天都會去一趟，就算有時跟洛兒吃完飯，已經很晚，運動場關門了，我也會沿著旁邊的山路去跑

而啊武基本每天都會出現在運動場，我一去到，他就會變身成我的免費教練，在旁指導我

一個月好快便過去

「條腰直啲！調整呼吸！」啊武陪著我跑，我已快累垮了，但他卻仍是十分輕鬆





三十分鐘過去

「好！慢跑兩個圈就完啦」我們減慢腳步

「嗄….嗄….」汗珠都流到眼睛裏

「頂埋啊！差半個圈咋」

即是只差二百米的路程

到達！！

「啊！！！！」我仰天大叫





「嗄….好攰啊！！」跑到都快要崩潰了

但我側邊的啊武只是輕微氣喘

「嗄….你到底…嗄…咩人嚟㗎….唔識攰㗎？」我坐在地上

「我12歲開始打拳，打到依家做埋教練，日日練野未停過，邊有咁易攰」他自豪的說著

「嗄…咁不如你係到教埋我打拳啦」我隨便說說

「唔得」他一口拒絕

「呃…..」我一時拿不出反應

「想學就好好地去拳館學！」啊武語氣中帶著點嚴肅





「嗯…好啊，去試下」反正我也是打算把自己的身手練好，多學一種武術防身也是好事

於是，我在翌日上班時，跟啊仁討論這件事

「我依排識咗個朋友，佢教人打拳㗎，佢叫我去試下，你一唔一齊？」

「打拳？都好啊，反正九叔都叫我地鍛鍊好自己，打下拳又可以操fit啲，身手又好啲，起碼再遇到好似卓斌咁嘅惡鬼都唔洗完全冇得還手啊」

「咁你今晚得唔得？得嘅話，我同我朋友講聲」

「今晚，我得啊，就今晚去試下」啊仁點頭可以

「有咩要試，要開工個陣講」九叔突然站到我們身後





「嘩！」我被嚇一跳，橫跳向左

「又係冇聲！」啊仁則橫跳向右

「你兩個係咪唔洗做？」九叔分別盯我倆各一眼

「嘩！架車咁污糟嘅？！抹下佢先！！」我拿起抹布，瘋狂的揮舞

其實啊仁也想拿抹布的，但被我快了一步，現在他正眼定定的看著我

我看著他，猥瑣地微笑

「你呢？」九叔看著啊仁

「啊！九叔，你聽唔聽到？office 有人叫我！！」說畢，啊仁就跑走了

「唉，依兩隻馬騮」九叔無奈的搖頭

但又輕輕一笑了

他回想起自己年輕時…..