我娶左個台妹做我老婆啊！: Chapter 26

「你估到架⋯⋯」我話。

「我知啦，係你個⋯⋯Ex，係咪啊？」嘉欣突然係我耳邊細細聲地講。

「係⋯⋯」我話。

「下次等我有機會見識下佢先。但逃避唔係辦法架，你要學識去點樣面對。」嘉欣話。

聽完嘉欣咁講，我覺得其實自己唔可以再逃避，始終大家仍然會係機場見到。既然我都已經唔再鐘意Jane，咁自然會對呢個人已經冇晒感覺，點解唔比自己舒服啲姐。就好似Eason既「少見不怪」，裡面既其中一段歌詞：「而既然分開了 問好亦不必要」。大家都分開左，就無必要去掛住。

突然間，有一班華航機組人員同地勤人員向著我同嘉欣既方向走近，其中啲空姐一見到嘉欣就好熱情咁同佢打招呼，而嘉欣仲用返佢熱情既台灣腔國語同返佢地擁抱。係喎，個傻妹以前係華航空姐黎架喎，今次仲要係香港見返佢華航啲舊同事，自然會好開心啦！話時話個傻妹講國語特別好聽，不過⋯⋯我都係鐘意佢講廣東話多啲。

而我都識DO，比佢地傾左一陣，更加叫我幫佢地一齊合照，為左令嘉欣開心，我點會托佢手踭啦？其實只要遵守自己既工作守則，又可以去幫到人開心既？Why Not？

幫嘉欣佢地影完相後，啲華航空姐們亦都要夠鐘入Aircraft，臨走前仲向我同嘉欣講Bye Bye。見到嘉欣有啲眼濕濕，我諗佢應該係開心到喊。於是我就比張紙巾佢。

「唔該你啊，衰人。」嘉欣話。

「唔捨得啊？」我話。

「係啊，以前我同佢地一齊入職。一齊飛去日本、韓國、香港、歐美架。但係最早離職既就係我。我真估到係香港會見返佢地，更加估唔到⋯⋯我而家係香港機場返工。下次返台灣一定要搵佢地先得。」嘉欣話。

「證明你有人緣，而家返香港都見到啲舊同事，又同我一齊拍擋。」我話。

「本公主做得好事多，你估好似你啊！見到某某人好似遇到老虎咁。」嘉欣話。

「係既係既！最威係你啦！！」我話。

「請問親愛既盧主任，下一站去邊呢？」嘉欣問。

「下一站就帶你出Control Center同Apron啦。」我話。

「Yes Sir！」嘉欣話。

我地講完就坐返列車，去中央控制中心，呢到就係我地成個「赤鱲角公司」既重要部分，好似人類既大腦咁重要。