我娶左個台妹做我老婆啊！: Chapter 19

由於去程我地就坐左「地鐵」同「火車」，為左特別啲，我今次回程就帶嘉欣坐巴士返美孚。由大圍返去美孚，坐巴士既話就會坐46X。

而呢個鐘數唔係啲放工時間，所以得我同嘉欣，另外幾個人係到排隊等上車。

「做咩帶我坐巴士既？我地唔係坐地鐵咩？」嘉欣問。

「知你好多年冇坐過，帶你回味下！」我話。

「真架，Yeah！」嘉欣話。





呢個時候巴士車長就示意我地可以排隊上車，係香港，識坐巴士既人都一定會揀坐上層既前排位置（繁忙時段除外），點解，因為可以睇下風景，留意下我地身邊既環境有冇變化。

其實我坐巴士真係冇咩Feeling，基本上只要快趣就得，見到嘉欣好開心，搞到我都開心晒。

「嘩香港啲巴士真係好靚啊！又舒服。」嘉欣話。

「你地台灣啲巴士冇雙層架咩？」我問。

「邊有啊，台灣啲巴士全部都係單層架，不過我出去都係坐捷運多，返工既話會自己揸車。」嘉欣話。





「咁我要見識下你啲駕駛技術啦！我去到台灣你要帶我游車河。」我話。

「睇下點。」嘉欣話。

架巴士好快就上左城隧落葵涌同荔景，唔使半個鐘就返到美孚，我屋企樓下個巴士站。

返到屋企樓下就見到爹地佢地，原來佢同媽咪岩岩收工。見到佢地不斷奸笑，我就知佢地不懷好意。

「仔，同嘉欣去邊啊。」爹地問。





「入沙田踩單車！」我話。

「咁好啊！」爹地話。

「仔啊，唔可以蝦嘉欣架！要相親相愛知唔知！」媽咪話。

「聽到未啊！」嘉欣用手肘批我一野。

「知啦！」我話。

我地四個邊講邊笑，而爹地媽咪就話不如一齊出去食晚飯。我同嘉欣都冇意見，就交比爹地媽咪決定，最後⋯⋯爹地媽咪就決定去打邊爐。媽咪仲不斷咁同嘉欣講女人野，將嘉欣就視如己出，當佢係親生女看待。

果然不出我所料，爹地都係帶左我地去平時食開嗰間任食火鍋。雖然呢間野唔算係大型連鎖店，但無論野食、服務質素、價錢都有好高既性價比，所以每晚都有好多人幫襯，連傳媒都成日訪問佢。而我地都不時會幫襯下，所以個老板都認得我地，唔會佔我地便宜。

入到去，因為過左食飯時間既高峰期，所以我地就好快有得坐低，揀左張四人枱。但嘉欣見到呢到，個反應好奇怪。





「做咩啊欣，唔鐘意呢到啊？」我問嘉欣。

「唔係啊，呢到有啲似台灣既火鍋店。唔知有冇無老鍋呢？」嘉欣咬住唇咁問我。

「有啊，呢到有無老鍋湯底啊！」我對佢講。

「真架，我要食我要食！」嘉欣好開心對住我講。

「好啊！」我話。

「Yeah！」嘉欣歡呼！

我地於是叫左一個豬骨湯同無老鍋湯既鴛鴦湯底，其實我咩都食，但由於媽咪唔食得辣，所以⋯⋯都係叫唔辣會好少少。而我地四個依然都係有講有笑，嘉欣仲係爹地媽咪面前不斷幫我打圓場，搞到我今晚可以逃離佢地既魔掌，當然⋯⋯嘉欣又靚又可愛，我點會捨得蝦佢啊？我當然會當佢係妹妹咁錫啦！





過左一陣，野食就到左。我地平時食野基本上都係好均衡，菜類、肉類同海鮮類都會按比倒平分，唔會變成食肉獸既哈哈。而嘉欣就食到津津有味，唔知呢到係咪令佢諗返起台灣呢？

呢個時候，嘉欣既Line突然間響起，我眼尾地偷望一下，原來係嘉欣既爹地媽咪打黎。睇黎佢地對嘉欣太過牽掛⋯⋯⋯

嘉欣就打開左個視訊通話，見到嘉欣既爹地媽咪係到，當然一開始都係問好先，見到嘉欣同佢爹地媽咪有講有笑，我估佢地既感情一定會好好。轉眼間，嘉欣就用手拉左我過黎，叫我同佢爹地媽咪打招呼。

由於有時世伯伯母會返香港探我地一家，所以佢地都認得我，而佢地都好錫我，當我係佢地半個仔咁。我當然要同佢地打招呼啦！當世伯伯母知道嘉欣要同我做同事嗰陣，佢地都開心地嘩然，仲叫我好好照顧嘉欣，搞到嘉欣唔好意思，面都紅埋。睇黎世伯伯母都同爹地媽咪一樣，好想撮合我同嘉欣拍拖。

而呢個時候，爹地媽咪話要攞嘉欣部手機同世伯伯母傾計，我就叫嘉欣不如一齊去舀Häagen-=14pxDazs雪糕同拎野飲，等佢地四位老人家講餐飽先返去。見到嘉欣笑得好Sweet，仲不時向我單眼同伸脷，嗚啊 ！

「好野，有雪糕食！」嘉欣話。
 
「你係台灣唔係成日食架咩？」我問嘉欣。

「邊有成日啊？你又老作啦！」嘉欣話。





「哈哈，你好鐘意食綠茶味架咩？」我問嘉欣。

「係啊！因為我係綠茶婊哈哈。」嘉欣微笑。

「我都係啊 ！」我話。

「你抄我就抄我啦！」嘉欣話。

「返去啦！」

「嗯。」

我同嘉欣就拎住雪糕同野飲，慢慢行返去張餐枱到。跟住落黎我地四個都係邊食飯邊傾計⋯⋯話時話爹地媽咪已經當左嘉欣係佢地親生女般看待，視嘉欣為佢地既掌上明珠。仲揚言會授權比嘉欣去監視我既一舉一動。搞到好似舊時嗰啲指腹為婚、盲婚啞嫁一樣。但有嘉欣係到，我覺得呢個屋企好似比以前溫暖左好多，多左好多既色彩。





食完飯之後，爹地話要試下我部FD2，就叫我地三個返去先。結果一返去，嘉欣同媽咪一齊係到傾女人野。我呢個男人自然乖乖沖涼訓覺啦！