我娶左個台妹做我老婆啊！: Chapter 18

「傻妹啊，你有冇考電單車啊？」我問嘉欣。

「有啊，我大學嗰陣考晒私家車同電單車，電單車係考重機！」嘉欣好開心咁講。

「弱弱一問，咩叫重機啊？」我問。

「重機即係重型電單車啊，白痴！」嘉欣又打我。

「好厲害喔你這個女孩！」我話。





「你做咩學我用台灣腔講野啊？」嘉欣問。

「學你可以講野嬌嗲啲！」我話。

「屌你啦！呢到係香港黎，唔該同我講返廣東話。Please！」嘉欣好嚴肅咁講。

估唔到嘉欣呢個傻妹真係好入鄉隨俗，知道係香港就要廣東話，但無論個傻妹講國語、廣東話、英文甚至日文都好，我都會比心機去學、會比心機去聽佢講野。好比某啲港女同ABC，懶係外國回流返黎就吊高黎賣，又係到中英混雜，搞到人地聽到半桶水咁。雖然我成日同自己講，學多啲語言係好事黎，但大前提之下要好好捍衛屬於我地既廣東話。咁先會受到人地既尊重。

話時話，今日爹地媽咪要返工，當然冇可能咁就返歸架嘛，我又唔會咁心急即刻帶嘉欣去爆房咁賤格既。但係我真係諗唔到可以去邊。不如比嘉欣話事啦！





「欣，你想去邊啊？」我問。 

「想去新界，欣欣唔想去Shopping。唔可以要賢賢做大嘥鬼。」欣欣話。

既然係咁，我諗到啦！我就知道可以去邊啦！  

於是我同嘉欣就落返地鐵站，去到太子就轉觀塘線，到九龍塘站落車行上去東鐵線。呢個站同美孚站嘅角色一樣，每日都有好多人經呢個站往返香港、九龍、新界，甚至北上深圳都係靠佢。話就話「九鐵」同「地鐵」組係十幾年前已經合併左做「港鐵」，但我始終仍然都會叫佢做「地鐵」同「火車」，如果硬係叫佢做港鐵嘅話點都會有啲奇怪。有啲嘢就係咁，叫慣咗就係改唔到。








「嘩，呢度咪九龍塘火車站？」嘉欣問。

「係呀，好記性喎仲記得呢度係火車站！」我話。

「點會唔記得呀，呢度可以去羅湖㗎嘛！喂喂喂你唔係而家帶我上大陸呀嘛？我冇帶台胞證喎！」嘉欣不懷好意地問。

「梗係唔會啦，我都冇帶回鄉證。」我話。

「咁你帶我去邊啊？」嘉欣問。

「陣間你就知㗎！」我話。

呢個時候，往羅湖嘅列車慢慢咁由紅磡方向駛過嚟，我哋就上車啦，今次我哋就坐咗一個站，去到大圍站就落車。





我地出左去之後，就見到前面有間單車鋪可以有得租單車。我醒起呢到有條單車徑可以直到大埔，不如今日就黎個單車遊啦。

「欣，去唔去踩單車啊？」我向嘉欣提議。

「好啊！一齊啦！」嘉欣微笑。

講完之後，我地就去老板話要租兩架單車，而個老板好好人，比左兩架性價比高既單車我地，仲叫我地可以天黑之前先還車，睇黎今日係我同嘉欣既Lucky Day！

攞左車，我地就由大圍出發，沿住城門河，一直踩到科學園、白石角、大埔海濱公園，最後去到大美督。呢條路全長廿二公里，但我同嘉欣都係慢慢踩，有時踩下又停下打下卡，所以我地都用左三個鐘先到大美督。

「嘩，終於到啦！」我話。

「估唔到香港都有呢啲咁靚既地方。」嘉欣話。

「你第一次黎呢到咋？」我問嘉欣。





「係啊，呢到同市區好唔同。」嘉欣話。

「你鐘意就好啦！」我話。

嘉欣就用一個甜美既笑容黎回應我，我就知帶佢黎呢到一定冇錯架啦！好彩我冇帶佢去新城市廣場都Hea幾個鐘姐，反正香港既Shopping Mall大多數都係差唔多，不外乎都係一式一樣既人流同鋪頭。去邊間都係一樣架姐。與其帶嘉欣日日去Shopping Mall，不如帶佢去多啲香港唔同既地方啦！

去到大美督，我地就泊好架單車，然後就去左一間Cafe到食飯，見到個Style好似70年代同對住個海。搞到我地都忍唔住望多幾眼，有時望住個海食野其實都唔錯，可以將心裡面既煩惱一掃而空。有時係到諗，呢啲日子可唔可以一直Extend落去。

「好唔好食啊？」我問嘉欣。

「好食啊！係呢問你一樣野啦！」嘉欣話。

「咩啊？」我問。





「你以前同你女朋友會去咩地方架？Sorry啊⋯⋯我唔應該咁問。」嘉欣斷斷續續地話。

「唔緊要啦⋯⋯反正都過左去啦。唔知你係咪想同我⋯⋯」我話。

「慳啲啦你！但係⋯⋯如果⋯⋯你想約小女子去街既話⋯⋯我都會陪你既！」嘉欣話。

「係就好講啦！」我話。

我地兩個你一言、我一語咁樣渡過左呢個悠閑既下午。唔知呢啲日子會唔會繼續呢？

食完後，我地就繼續出發，但由於單車徑去到大美督就完，而我地如果再向北行就會係粉嶺同上水，加上禁區我地唔可以入去，所以我地就原路折返返去大圍。

我同嘉欣都係慢慢踩返去單車鋪還車，而嗰個老板都好好人，知道嘉欣係台灣黎就多啲叫佢介紹比台灣朋友黎香港踩單車。搞到我同嘉欣都不禁偷笑。