我娶左個台妹做我老婆啊！: Chapter 11

我同嘉欣就落左車，知今次插翼難飛，於是就乖乖咁樣投降。而我識左佢地六個咁耐，知佢地性格好家長，一定會問東問西。希望佢地大人有大量，放過嘉欣啦！

「點啊各位大佬？」我問。

「呢位係⋯⋯？」Andy問。

「Hello！我叫嘉欣啊，或者叫我Ally都得。」嘉欣好熱情咁講。

「Oh！阿嫂啊嘛？係咪啊Leslie哥？」Aaron問。



「閘住，佢就想啦！」我話。

「慳啲啦屌你！我先至唔會做你老婆啊！」嘉欣MK妹上身，係咁對我打鬧。當然大家又係到食花生，忍唔住笑。

我知道嘉欣咁講，只不過係講下笑。但而家既佢一啲唔似溫柔可愛既台妹，變返一個粗口爛舌既MK妹。如果我唔識佢既話，以為佢真係香港土生土長，從來都冇係台灣生活過。總之個反差好大啦！但佢咁粗口爛舌其實都有個好處，就係顯得出佢同我好熟，講野唔會有顧忌，咩都講一餐。而且嘉欣個適應能力都好強，一返到香港就即刻轉Channel，講返屬於我地廣東話，唔會諗一諗先會明白我地講既日常用語。我估世伯同嘉欣一定係成日用廣東話溝通。

行去火鍋店既途中，嘉欣同班女仔有講有笑，不斷係到問嘉欣係台灣既野，而我地男仔當然都係粗口爛舌，講下公司既八卦野，當然大家既另一半都係到，溝女同阿Jane啲野就唔講啦！

「好野啊！之前同阿Jane分左手，而家就有新女。仲要係台妹添！」Jacky話。



「佢唔係我女朋友黎架！而且嘉欣係香港人黎架，又唔係100%台妹！」我話。

「呢啲女仔先好啊！識廣東話、國語、英文。你執到啦！」Danny話。

「係既係既。」我話。

「不過阿嫂係返香港玩，定係咩？」Leon問。

「佢係黎香港Exchange工作架，遲啲你地係機場見到佢架啦！」我話。



「係咪空姐先？CX？華航？長榮？」Samuel問。

「No⋯⋯全部都錯，佢係跟我，都係機管局到返。」我話。佢地聽完我講之後就係到嘩然。

過左一陣，終於到我地入去食飯。基本上都係分男女坐，而嘉欣就同班女傾得好開心，好似閨蜜咁樣。仲好快交換晒電話、Facebook、IG嗰啲。