我娶左個台妹做我老婆啊！: Chapter 1

「爹地、媽咪！我返工啦！」我同爹地媽咪講。

「小心啲Leslie。」

係啦！我叫盧頌賢，Leslie係我既英文名。身高180cm。今年26歲，個樣就好似余文樂，連個髮形一模一樣。

由細到大，我好鐘意飛機同車，所以我係香港大學BBA（主修Marketing）畢業之後即刻申請機管局既MT，由於工作表現良好，所以一完左實習期就被上司擢升左做主任，主要係負責Terminal既Operation，基本上主要係Terminal到處巡邏，睇下啲Equipment有冇任何損壞再寫Report上去。仲不時要同其他部門既同事、地面服務公司、航空公司、政府部門、旅客等等既人接觸。而我為人好隨和，對任何人都好友善，所以基本上啲同事、或者其他公司既人關係好好，大家會互相尊重。

呢一日，我同屋企人食完飯，就準備返最苦悶既通宵更。由於我屋企住係美孚新邨，所以如果由我屋企出發都只不過係半個鐘頭多少少就到。





我換好衫，落左樓下既停車場，去攞返我架本田NSR250（第四代，Repsol拉花）既二衝程電單車。呢架電單車係1995年出廠，係我爹地當年新車Keep到而家，但自從我考左26牌之後就比左我用，佢自己就買多部Honda Rebel 250電單車。無論返工、返學定出街都係靠佢同EG9陪住我。

NSR250示意圖：



不過咁，除左電單車，其實我屋企有兩個車位，泊左兩架H車，一架係2012年出廠既水貨黑色Stepwgn SPADA（車牌號碼：BR628)，另一架就係1994年出廠既Civic EG9（車牌號碼：KA628）。可惜架EG9早半年前係Mega Box個停車場到比架Tesla撞埋牆，搞到成架EG9要Total Loss，就算Insuarce有得賠都冇得整。就係咁樣而家嗰兩個車位就泊左架Stepwgn同兩架電單車係到啦。








我就戴好我既Shoei頭盔，出左門口，我主要都係入青衣再上青馬大橋，再直行去到機場，而夜晚食飯時間多數都好少車，所以用左20分鐘就返到機場啦。


一到左四號停車場，我就用我既月票拍卡，走去停車。然後就即刻走去更衣室換制服打卡同攞返個Permit，又開始準備今晚一連串既Duty。

係Office裡面，好多都係同我差唔多年齡既同事，而我直屬上司Jeff就走過黎同我傾計。佢係我當年做Trainee既師傅，為人十分公道，待人真誠，對下屬就好似自己既仔女一樣般對待。

「Hi Boss！」我同Jeff講。





「老友你今晚守尾門啊？」

「係啊！不過好彩食左野，所以今晚唔使食宵夜！」

「Good！過兩日台北既機管局會外借佢地一個職員過黎我地部門到，你地啊到時要好好照顧人地啊！」

「係仔定女先？」我講笑咁講。

「到時你咪知囉！差唔多出去On Duty啦！我走先啦！拜拜！」

Jeff就同我告別左，我就出去On Duty。係T1周圍行下行下，按時去Check-point到打卡。去左H區，就見到我做機場特警既督察老友Andy係到行Bit，當然要粗口問候下對方啦！

「點啊！老友，又行Bit啊？」Andy問我。

「係啊！今晚通頂啊！你都係啊？」





「冇法啦！機場既治安靠我地把守架啦！係呢？你揸CBR返工啊？」

「係啊！架EG拎左去填海，咪攞住架CBR揸住先，邊似得阿Sir你揸M3咁有米啦？」

「屌！講呢啲！買返架私家車啦！都係H車啊？」

「你知我性格架，非H車不玩！就算買都係買Civic！」

「冇咁好氣啊！搵晚Call埋另外嗰幾條友食飯啦！我去做野先啦！」

「好啊！拜拜！」

我同Andy道別後，就繼續行Bit。行下行下，見到好多唔同Airline既機師同空姐。不過呢排多左好多唔同國籍既空姐就真，佢地有樣有樣，有身材就有身材，但佢地應該都係溝空少或者機師架啦，邊會睇得上我啦。





講起空姐，我以前曾經同一個叫Jane既CX空姐拍拖，佢係我既初戀情人。我地大學Exchange去澳洲嗰陣相見，相識，相愛，亦都因為呢到而分手。我地拍拖頭一年既關係好好，係朋友們既眼中係羨慕既一對。但後來，因為佢成日要飛既關係，變左聚少離多，關係逐漸疏離。直至到上年，我目睹佢背住我出去偷食同其他男人上床。就係咁，我決定即刻同佢分手，將佢所有野都Block晒，唔會再比機會佢。就算而家係機場見到佢，我都會搵個籍口去避開佢。唔會比佢見到我係到。

點知，真係「冤家路窄」，當我走落去T1既Arrival Hall巡邏嗰陣，離遠見到佢同幾個Crew同事向我呢邊過黎。於是我就刻意避開，走過去廁所到避一避，等佢走左我先行出黎。而家每次見到佢，我都會諗起許志安嗰首「男人最痛」。呢一種「痛」，我永遠都會記得。



「難忍再次偶遇於街中　望你忐忑因他出現失控　而男人最痛　男人最痛算這種」

我入左廁格一陣，我諗佢已經走左，就即刻走左出去。屌，真係走遲半秒鐘都死啦。好彩老子我時運高，睇個八婆唔到。行多一陣，我見冇咩特別，就走左去Starbucks到買杯野飲就走返去Office到入返啲野落電腦到。趁呢段時間，當然要聽埋歌，上網睇下車啦。講真，其實我都想買返架私家車，諗住到時翻風落雨都冇咁狠狽。

你話我鐘意啲咩車？當然係H車啦！由細到大，我同爹地都對H車情有獨鍾，特別係四門既Civic大踢同Type R。但EG又已經揸過，而EK副偈又同EG差唔多，就算係最勁既EK9又得三門版，上落客又唔方便。所以我就冇將EG同EK落單啦。另一方面，雖然而家既FK2同FK8好撚型，奈何個價錢太貴，作為一個普通打工仔冇理由要買架30幾到50幾萬既H車架？家陣發左達咩？？？冇理由咁大個仔叫爹地買比我架嘛。

我再上網睇，見到我最愛既FD2，係喎？點解我咁白痴搵唔到既？見到二手價尚可接受，性價比又OK，外表又型。返去同爹地傾下睇下點先。起碼比錢冇咁肉痛嘛，係咪啊哈姆太郎？