因為ex，我決定向全世界嘅女人報仇: 三年後

出奇地，之後有成個月Nicole都冇搵我，我當然唔敢主動搵佢。但係我好好奇，點解佢會唔搵我。佢明明嗰日好主動...，唉冇諗過我識左佢咁耐，到頭來完全唔了解佢。佢嘅行蹤唔會話比我知，老實講我有時都唔知佢係咪真係鍾意我。如果真係嘅..點解可以咁耐都唔見我一次，呢種感覺好似當初佢有老公嘅時候咁。我唔知佢係有其他男人定點...，定係佢為左我同Rachel先係咁。唉...佢越係唔搵我我就越心掛掛，明明佢唔搵我嘅時候應該好地地同Rachel一齊。我同Rachel係呢個月都正正常常咁過，佢應該覺得Nicole唔會再上嚟，因為我收左佢條鎖匙。件事好似已經告一段落...，我繼續同Rachel開開心心咁過。而慢慢，Nicole係我心入面嘅地位又越嚟越低，因為佢又再粒聲唔出消失左。

三年後。

「傻仔～我今晚煮飯比你好冇呀～」我地搭緊車去沙灘。
「哈哈...可以呀...」
「喂也！你咁嘅樣..！姐係唔信我啦！」
「唔係呀～我信呀」我話。
「衰人..！唔煮啦..！」
「唔好啦～凝凝～」


「衰人....你呀...成日嫌我煮嘢唔好食..」佢有少少唔開心咁講。的確...，如果講煮嘢..Rachel真係差咁啲。突然間，我諗起Nicole 煮嘅嘢...，就算過左咁耐都咁深刻。
「邊有喎..你煮嘢都..幾好呀，間唔中煮下唔洗日日出面食吖嘛」我笑住講。
「算你啦..！」佢講完笑一笑，撓緊左我。我望一望佢，笑一笑。

Nicole....今次你一走就走左三年，究竟你又去左邊。我而家諗起佢已經唔會好大波動，一開始的確係會掛住佢，但慢慢有Rachel陪住我就冇再掛住佢。而家諗返起，都係回憶下。不過我坐左係小巴入面反思，究竟而家呢啲係咪我想要嘅愛情。我唔係一直都追求緊呢樣咩..？經歷左咁多風風雨雨，唔係就係想搵一個愛你嘅人咩...。但點解而家我得到啦..，又好似唔係真係我想像中咁完美。或者人就係咁犯賤，往往得到左之後就追求更多。我同Rachel嘅生活好快就變到好規律，慢慢冇左新鮮感同激情。Rachel挨住左我膊頭訓緊，我摸一摸佢個頭，係度諗..佢係咪真係我想同佢一齊走落去嘅女人。我地都唔細，呢個年紀拍拖唔再係天真到為左愛情放棄一切。中學拍拖嘅時候我可以為左一個女仔而放棄哂成班fd，大學嘅時候因為一個女仔呷醋就冇繼續住hall。我一向都係一個重情嘅人，你可以話我重色輕友，但係女朋友對於我嚟講就係一個最值得互相依賴嘅人。所以當初我全心投入去愛Sophia就係因為我以為我地會一直行落去...，佢令我對愛情失去左信心。不過因為佢，我先經歷到咁多甜酸苦辣，最後「修成正果」...。我係唔係真係修成正果，連我自己都clarify 唔到。我地嘅愛情好似慢慢同結婚好近...，周紫凝係咪真係值得我用一世去愛護佢呢？咁假設我地結左婚，咁高曉琳又搵返我...應該冇可能。

我望望下，出面突然間落好大雨，明明上一刻仲係陽光普照...。世事就係咁無常，愛情都一樣。有啲人去到中年都未知自己究竟想要啲咩，有啲人以為自己想要穩定，到頭來又係出去玩。我唔知未來會變成點..，我唔敢去預計我同Rachel 嘅將來，但我都係按住人生嘅劇本走。我好快就會同佢求婚，我知佢一直都好想同我組織家庭，而我都好想可以比到佢。
「咦..落雨嘅...！」Rachel岩岩醒。
「係呀..岩岩無啦啦落，我明明check左天文台..」
「咁我地照去..？」


「都冇辦法啦..都上左車」我苦笑一下。
「好啦咁，應該唔會落好耐嘅～去到就差唔多」
「你唞下啦，到我會叫醒你」
「係～」佢講完就錫左我一啖，然後繼續訓。我打開手機，打開相簿，禁入「hidden」....。一張又一張我同Nicole嘅相係入面，我一直都收得好埋。我望住我地曾經係台灣嘅相，係酒店嘅相，係餐廳嘅相....一幕幕回憶出哂嚟..。當初我delete左啲相之後好快就忍唔住recover返，然後一直放係hidden。諗住將呢啲相連埋我地一齊嘅回憶就hidden係我心入面，間唔中拎出嚟望一望...。至少，

我地都曾經有過一次轟轟烈烈嘅愛情

那動人時光
不用常回看
能提取溫暖以後渡嚴寒


就關起那間房

最動人時光
未必地老天荒
難忘的因你太念念才難忘
容易抱住誰十年
最難是放