因為ex，我決定向全世界嘅女人報仇: 醜陋

第二朝起身嘅時候我逼自己唔記得左琴晚嘅事，我好似平時咁同Rachel食早餐、返工。我地落去嘅時候拖住手，大家都冇提及到琴晚嘅事。我個心入面其實好驚，但點都要表現到冇嘢咁。我唔想比佢知，唔想傷害佢。其實換過角度睇，我驚係因為我都重視Rachel。假如Rachel係我SP，我跟本唔會咁顧及佢嘅感受。我重視Rachel，呢一點冇得否認。

至於點解我要出軌，我諗你問一百個出過出軌嘅人都未必有十個好確實咁答到你。貪新鮮？又唔可以咁講，我同Nicole一早就做愛，佢根本唔算係「新歡」。同Rachel厭左？唔係..反而同Rachel相處，雖然平淡，但都仲好有新鮮感。我連自己都唔知點解自己出軌，好似樣樣都有啲咁。可能係因為我仲未放低Nicole，可能係因為衰咸濕，又可能係因為Nicole好主動...。不過我自己一個係度賽後檢討都冇用，場波輸左就係輸左，而且呢一場一輸，就冇得再贏。愛情冇下一季，走左就係走左。所以企係我嘅立場，就算咁做好仆街，我都一樣死都唔會比Rachel知琴晚發生嘅事。
「呀文～你食咩呀？」Rachel問我。
「..」
「呀文～」
「..嗯？係..！」仆街，無啦啦發呆好有嫌疑。
「你食咩呀？發哂呆嘅」佢望住我講。
「哦..照舊得啦～」
「好啦～諗緊咩呀」佢問我。


「冇呀..琴晚訓得唔好姐」
「哦..好啦～今晚唔準咁遲訓呀衰豬！你要陪我訓！」佢扮嬲個樣真係好可愛。但由琴日開始，佢越好我就越內疚，好似唔值得我擁有咁。
「哈哈..知道啦～」我話。
「咁就乖！」佢講完錫左我一啖。因為我地習慣坐埋同一邊，而唔係對住坐。我地食早餐就各自去返工，我一返到office就收到個wtsapp，係Nicole嘅。

「早晨～」佢話。
「早晨」今次佢真係好主動。
「返左公司啦？」
「嗯，返左啦」
「好啦～仲驚你太攰起唔到身添～」


「哈哈..唔會啦」我話。我而家覆佢都尷尷尬尬咁。
「佢琴晚有冇問啲咩」
「冇呀..」
「噢～好啦，你做嘢啦」佢話。
「嗯，你唔洗返咩？」
「我請左假呀」
「哦..好啦」我話。
「定係你想我嚟搵你食飯呀～」佢講呢句再加左個好flirty emoji。
「哈哈..唔洗啦，我帶左飯」我話，但我冇帶。
「玩你炸～傻仔～」


「好啦，我做嘢啦」
「好啦，加油～」佢send左個錫嘅emoji。死啦，佢今次真係好進取。我好驚佢成日無啦啦，wtsapp我會比Rachel見到。我將佢個名改左做「琳@公司名」，等冇咁為意。

唉..而家我對住Rachel同Nicole都好似尷尷尬尬咁，好似兩邊都唔知點咁。對住Rachel就覺得內疚，對住Nicole就即意保持距離。由琴日起，我同佢兩個嘅關係都唔一樣，呢個轉變傳令我而家好後悔...。如果有時光機，我一定唔會拖住兩個...。夜晚返到屋企Rachel都好似平時咁，我地嘻嘻哈哈，有講有笑。但好似做咩戴住個面具咁，不斷用笑掩飾自己嘅錯。呢種慢慢走向畸形嘅關係好痛苦，如果我真係一個好仆街嘅人就好，因為咁我就唔會覺得內疚。但我都係人，我都知自己衰。「早知」、「如果」、「或者」...呢啲詞語往往係事後先會浮現出嚟。冇諗過我經歷過呀婷之後仲係咁..，我認衰仔...我唔要三角戀，我都想要幸福美滿嘅家庭..。定係..我呢啲人，唔配組織家庭...。我訓左係張床背對住Rachel，我連個心都係背對住佢，我唔敢正面對住佢。我望住間屋，本身係諗住同Sophia住，點知呀婷係第一個上嚟，Nicole著住我買比Sophia嘅衫同我做愛，Rachel第一個住左入呢間幾個女人嚟過嘅屋。世事有時真係變幻無常..，我曾經天真到以為自己經歷左咁多會變得堅強，點知反而變得懦弱。

我驚失去，所以我全部都要

望返自己，先發現我一日比一日醜陋。

幾雙手 幾雙腳 方會令你喜歡我 順利無阻
你愛我 別管我 幾隻耳朵 共我放心探戈

情人如若很好奇 要有被我嚇怕的準備
試問誰可 潔白無比
如何承受這好奇 你有沒有愛我的準備


若你喜歡怪人 其實我很美