因為ex，我決定向全世界嘅女人報仇: 我想知道你點諗

我成晚都訓唔著，不斷係度諗呀文同Nicole嘅嘢。我好驚就算我地一齊返，Nicole 都會不斷纏住呀文。咁我地就算一齊返都冇意思，我都係會每日提心吊膽，好似一直有個心結解唔開咁。我唔知呀文會點決擇，但最後我都係接受唔到三角戀。我甚至乎已經做定心理準備要離開呀文...，唔係我只會傷得更加深。我有啲掛住我同呀文一齊訓....，同佢一齊嘅時候，我訓唔著佢就會播歌同唱歌比我聽。佢唱攰左我地就靜靜地聽歌，傾下計。而家我自己一個人係床上面戴住耳機聽歌，好寂寞...。呀文，你可唔可以搞清楚..我先係你女朋友..。Nicole根本都唔值得你愛...，佢傷你傷得咁深。但我一直陪住係你身邊，我先係值得比你愛嘅人。

我將梁靜茹嘅《情歌》不斷loop不斷loop，因為我同呀文都好鍾意呢首歌。用呢首歌做背景，我個腦不斷亂諗嘢，精神到我完全冇睡意。天已經慢慢開始光，而我一陣仲要返工...。我嘗試訓一兩個鐘，但係我真係訓唔到。我合埋眼就係幻想呀文同Nicole錫嗰一幕，好自虐，但我冇辦法唔去諗。之後嗰兩個鐘都係諗住嘢咁過，望一望手機，已經差唔多夠鐘起身。我知道呀文會打過嚟叫我起身，但我唔想諗佢住...，一聽到佢把聲我又會諗起佢同Nicole。所以我send左個wtsapp比佢。
「我起左身返工啦，唔洗打比我」
然後我去刷牙洗面，食早餐...。我好耐冇係屋企食過早餐，有啲唔慣唔係同呀文去茶餐廳食。佢應該未起身？我有啲擔心佢遲到..。唉....我send message震下佢先..
「出左門啦，唔會遲到」我話。
「咁就好，我都起身啦」佢過多幾分鐘就覆左我。
「嗯」
「你食左早餐未..？」佢問。
「yes」


「好啦」佢話。我出門搭車嘅時候仲係好精神，好彩今日應該唔算多嘢做，因為唔多booking。返到去啲同事話想約今晚食飯，因為有個同事生日。

「Rachel應該唔嚟啦？你同男朋友出街？」Christy問，佢係我其中一個女同事。
「我..可以嚟呀」
「真係？你唔嚟我都冇所謂喎」呀Tom話。佢今日生日。
「你生日喎～點好意思唔比面」我話。
「你男朋友唔嚟接你咩？」Christy問。
「我地..嘈左交」我話。
「下點解嘅？」Christy問。
「唉..好難解釋」我唔想比佢地知呀文同Nicole嘅關係，唔想佢地覺得呀文係仆街..


「唔緊要啦～今晚食飯！」Tom話
「好！咁我諗下食咩先～」Christy 話，
「又唔係你生日！」Tom話。
「我鍾意諗喎～」
「係係係，你揀你揀」
佢地兩個成日都打打鬧鬧，有佢地係度我個人都冇咁唔開心，但係我...開始眼訓啦....

「食lunch未呀傻妹」呀文lunchtime 嘅時候搵我。
「食緊啦」
「今日食咩呀？」佢問。


「食飯」
「好啦～記住飲多啲水..，你前排喉嚨痛」佢話。佢又關心我...唔得...我唔可以咁易原諒佢嫁..。
「嗯，知道啦」
「乖～錫哂你」佢話。點解佢可以扮到冇嘢咁..，明明佢琴日先做左啲咁過分嘅嘢...。我唔知應該點面對佢，但我冇辦法扮咩事都冇發生過。我地兩個中間好似有道牆咁...，道牆就係Nicole。一日唔打爛呢道牆，我地兩個中間都係有啲嘢隔住。

但我真係冇諗過，佢放工會過嚟接我收工....
「Hi..」
「你點解係度嘅？」我問佢。
「想接你收工嘛～」
「我約左同事食飯，你返去啦」我望一望佢地，今晚真係約左。
「Hello...」佢同我啲同事打招呼。
「你返去啦，我地去食飯啦」我見到佢都係未冷靜到。
「....凝凝」
「你唔好搵我住啦，你比我靜下好冇」我有少少惡咁講，但我講完就有啲後悔...，死啦我會唔會太惡。
「好..好..我走」佢話。


「行啦」我同佢地講，一見到佢我個心就好亂。我唔係唔想原諒佢...我好掛住佢...，但係佢同Nicole嘅問題唔解決，我就冇辦法再同呀文一齊。冇人會接受到自己男朋友同另一個女人有咁樣嘅關係...。我唔知可以做啲咩，所以只可以逃避...。我岩岩甚至乎諗，如果我惡啲，呀文係咪就唔會追返我....。我想試探佢，我想知道..

想知道佢究竟有幾愛我