因為ex，我決定向全世界嘅女人報仇: 傷左兩個心
又經歷多一次自己坐左係張床上面on99咁...。中午就因為我想冷靜下而趕走左Nicole，夜晚就變左Rachel想冷靜下而自己走左去..。如果你同我講因果係冇報應，我真係唔會信。當我想wtsapp比Rachel同佢道歉，我見到Nicole覆我。
「唔緊要呀..係我太衝動走左上嚟炸...。你想搵我就直接打比我啦..我等你」
「嗯..唔緊要，我冇怪你」我覆佢。
「咁就好..」
「你而家得唔得閒」我問，我想講清楚。
「得..！你係邊？」
「九點半銅鑼灣等啦」
「好！你等我，我好快過嚟」佢話。
「唔急呀，慢慢」
「嗯！一陣見！」
「好～」我話。我承認我係唔想自己一個係度，但我都唔想再拖住兩邊...我點都要有個選擇。
我同時都Wtsapp左Rachel：
「你係邊呀...」
「我想自己靜下」佢話。
「我同佢冇做，我地淨係錫左...，錫完我就推開左佢」我即刻話。
「我唔想聽...你可唔可以比我靜下先？」
「好...Sorry...」我send完出去就發現已經得返一個tick，我唔知佢會唔會返返我地屋企，我都冇心情自己再係酒店。所以我即刻執哂我地嘅嘢就返屋企，我張我地啲相一張張咁拎返落嚟再放入袋。望住我地兩個嘅合照..我一定要追返Rachel返嚟。
出左酒店我即刻就返屋企，我拎住條鎖匙嘅時候先醒起..我係咪應該收返Nicole條鎖匙。既然我係想專心同Rachel一齊嘅，我就唔應該再比佢上嚟。我嗱嗱臨拎左條鎖匙出嚟，然後開...！一開....冇人。死啦....佢去左邊呀...，我想打開部手機打電話比佢..但即刻諗起佢叫我比佢冷靜下。算啦，我都係去見一見Nicole先。
「我到左啦」Nicole打比我，我遠處已經望到佢背影。佢今日都著左件好精緻藍色嘅短裙仔。
「嗯..我係你後面」我講完佢即刻擰轉面。
「Hi」
「Hi..」我話。好尷尬。
「我地去邊呀..？」佢問。
「去..灣仔海旁行下？」
「嗯，好」佢講完我地就平排咁行。我地兩個冇拖手，冇講嘢，淨係靜靜地咁行去海旁。
「你記唔記得呢，當初你帶我去奧運個海旁呀？」Nicole突然間開口問。
「我記得呀，你約我睇戲吖嘛」我話。
「哈哈，我嗰陣已經覺得你好特別」
「點解嘅？」
「冇呀，你比我嘅感覺好舒服。好難解釋～」
「哦...～」我講完，然後我地又靜靜地咁係海旁行。我個心思其實冇咩focus左係Nicole度..，因為我好擔心Rachel。
「係呢..你記唔記得嗰陣我講過啲咩」
「我記得...你話你唔係好似表面咁...。嗰陣我都真係唔知你結左婚...」我話。
「嗰陣我都冇諗過自己會離婚.....」
「嗯..」
「呀文....」
「嗯？」
「我地..係咪冇機會啦....」佢有少少忍住喊咁講。
「我唔可以對唔住Rachel..」
「佢對你好好..？」
「嗯，..你唔係度嘅時候佢每一日都陪住我。如果冇佢..我真係會崩潰。嗰陣我同你一樣，要食安眠藥先訓得著。我每一晚都等你返嚟但你竟然打左過嚟都唔講嘢...」我有少少激動。
「嗰陣佢已經陪緊你咁我可以點..我返唔到嚟，只可以幻想你兩個每日一齊。但你有冇諗過我.....，我唔係度你就搵第二個女仔..」
「我地嗰陣都冇做啲咩..，係你唔見左咁耐，佢先想要同我一齊..」我話。
「我....我想搵你嘅時候你都block左我...！」
「咁你有其他方法嫁嘛...！」
「我都未離婚...我唔知可以比咩承諾你」佢有啲委屈。
「我唔係要承諾...，你至少比我知道我要等你幾耐。係！就算我介意你有老公，但我都唔介意做醜人呀。但你一次又一次咁係我眼前離去，一走又走幾個月冇哂音訊，你想我點樣再有心去等你返嚟..！」
「我....我.........」佢坐左係海旁嘅櫈仔喊。我唔知應唔應該安慰佢..我個心都好亂，我唔想怪責佢，但我又好想發洩呢咁多個月嘅等待...。
「對唔住...對唔住..呀文......」
「....搞到而家咁，我都有錯.....」我都有啲內疚。
「咁你可唔可以比次機會我..」
「我地...呢排都係唔好見住啦...，你比返條鎖匙我啦」我有啲狠心咁講。
「咁..咁遲啲呢...」
「遲啲再算.....，我唔想再瞞住Rachel，我唔想佢受傷害」
「咁我呢..？....嗚...你就冇愛過我咩？」
「有...！你點可以否定我對你嘅愛....，但係Nicole...太遲啦...你返嚟返得太遲啦....」我講完自己都好心痛....
「你明明就仲愛我...你忍心放低我咩」
「....我唔知，我唔知呀！唔好再問我..！」我有少少覺得煩，唔想再諗。
「.....對唔住..」佢話。佢再道歉我又有少少心軟..。
「..我下次再搵你啦....，你下次帶埋條鎖匙出嚟」
「咁你要返去同佢一齊住..？」
「我而家自己住」我講完就走左..，我唔想再留係度。我唔想逼自己決定，上一刻我仲好堅決咁想同Rachel一齊..，但而家嘅我見完Nicole又變到好迷惘。我開始搞唔清究竟我真係鍾意邊個，我唔知應該點樣做先唔會做錯。或者，我都需要時間比自己一個。