因為ex，我決定向全世界嘅女人報仇: 離婚

自從嗰一日我決定左離婚，我就已經開始搵左律師行去問，但佢地都建議我最好問老公。始終，雙方同意下，離婚會快好多同簡單啲。對我嚟講，離婚當然越快越好，再拖落去我唔知我同呀文會變成點。最後我有一日返工嘅時候鼓起左勇氣，我同左我老公講要離婚。我一返到公司，就直接衝左入佢間房。
「我想離婚」我話。我講完佢望住我對眼，望左一陣，佢就話：
「好呀」
「下？」我冇諗過佢咁爽快。
「你話離婚呀嘛，但我唔得閒搞啲手續，你搞掂左比我簽」佢話。
「好，咁..就係咁，我出去先」我轉身就走。
「曉琳」
「......」我幾耐冇聽過佢咁叫我....，我停左腳步，但冇轉身望住佢。
「你Auntie嗰度」
「我會諗辦法」我話。


「我幫你比啦」
「唔洗，我搞得掂」我唔想再受佢恩惠。
「好」
「咁..就咁啦」我講完就出左去。

之後嗰兩個月我開始準備我嘅離婚，我要將公司嘅嘢、大屋嘅嘢統統執走。呀媽嘅醫藥費用我同佢之前儲落嚟錢再加上個男人比嘅贍養費都夠支撐住。我亦都一直好主動咁去搵工，我想盡快搞掂哂所有嘢，然後去搵呀文。公司嗰邊我都用左一段時間去搞埋啲手尾，因為始終之前去歐洲嗰邊仲有好多嘢未傾好。我每一日都係度諗，只要我再捱多一陣，就可以同呀文一齊...。

最後公司last day 前我就搵到一份文職做，都係係港島返工。所有手續都搞得好順利，我亦都搬返自己屋企住。我已經好耐冇返去自己舊屋，望住鋪哂塵嘅屋企，唔知點解我反而有一種解脫嘅感覺。我買左啲清潔用品，然後開始清潔打掃我屋企。將全屋好多地方都清潔，我就攰到攤左係度。一個人係度真係好孤獨...媽媽係醫院，呀文又係佢屋企..。我打開手機，望一望日期，原來過幾日就係呀文生日。當初我同佢去旅行，我一早就係佢passport度睇到佢生日日期，然後一直都記住。而我決定左要係佢生日嗰日比個surprise佢。

幾日後，我係我張細床上面等緊同呀文講生日快樂。而家十一點五十分..，距離佢生日仲有十分鐘。


「生日快樂呀！」我已經打定係chat room。唔係喎，我返香港之後用左張新嘅sim卡，所以呀文應該都係冇我電話。我即刻delete返...一定要比佢知道係我。
「我係Nicole呀～生日快樂！」....好似又唔係幾好...如果佢睇到我個名就唔覆我呢...，我驚佢會嬲我冇搵佢。死啦...應該點樣打呢...我第一次試過諗點講生日快樂都諗咁多嘢。....哎呀...五十九分啦....死啦死啦.....，係喎，如果我叫佢個名佢應該會知道係佢識嘅人？然後佢就會覆我問我係邊個..到時再同佢講..。好啦..就咁啦！

「呀文...生日快樂呀～」我係十二點正send左比佢..。我望住嗰句由一個tick變兩個tick...，呢種緊張嘅感覺我已經好耐冇試過。記得中學嘅時候我都試過係我鍾意嘅男仔生日嗰日send sms比佢，然後成晚係床上面望住部手機等佢覆。我一直等佢覆...過左五分鐘、十分鐘、半個鐘...佢係咪忙緊呢..？定係有人同佢慶祝緊..。唉可能佢訓左姐...唔係啦..佢邊有咁早訓。而家我感覺啲時間過得好慢..每一分鐘都望住部電話..就係等佢覆我。呀文..而家嘅我已經有資格同你一齊啦，你可唔可以就比多次機會我。我記得我上年生日係你同我過，嗰次係我成世女過得最開心嘅生日。今次到你生日，可唔可以比我陪返你過.....。我挨左係床上面一直望住手機，我個腦不停不停亂諗嘢....。一點啦..點解佢仲未覆我嘅....。我一路等就越嚟越眼訓.....唔得啦...我好攰......

「叮！」- 呀文 02:47am ..！！！！
佢...覆我啦！？！！！