因為ex，我決定向全世界嘅女人報仇: 回到現實

「呀文...你要信我....」
「呀文，我要走啦...我司機係出面等緊我了」
「再見啦....」我講完呢句之後就轉身走..我知道我一踏出候機大堂，我同呀文嘅故事就會好唔同。我要堅強，我忍住眼淚，因為我叫左司機嚟接我，我唔想比佢見到我喊。我叫司機係因為如果我冇咁做，我知呀文一定會送我返去，但我唔想，因為我驚我老公發現。

我返到呢個所謂嘅「屋企」，自己沖左涼，返返去呢間空無一人嘅房。我望住房入面嘅結婚相....我諗起呀文....呢個真真正正比到開心幸福我嘅人。呀文，你一定要信我，我會盡力。我上左床，係手機睇返我地嘅合照。一張又一張咁睇，相入面我地一齊放天燈，我望到自己好幸福嘅樣。究竟結左婚之後，我幾耐冇笑得咁開心？

「呀文，如果可以嘅話，我想一直都同你係埋一齊」我望住相入面呀文嘅笑容自言自語。以前嘅我渴望結婚，好想擁有一個屬於自己嘅家庭，始終我嚟自單親家庭。我一直對愛情都有好憧憬，自從我媽媽出左事之後，我先發現現實世界入面，淨係有愛情係唔夠嘅。我冇專登去搵一個好有錢嘅人，但我遇到而家嘅老公。佢嘅出現，拯救左我嘅愛情同我嘅家庭。我都曾經一直好愛佢，亦都好天真咁以為我同我老公結婚之後會幸福...但冇諗過，結婚真係可以令一個人有好大嘅轉變，原來到頭來都只係一個笑話。

對唔住呀..呀文....我真係唔知可以點算......。我好辛苦.....我唔想再留係呢個「家」，我甚至每次返嚟都有少少厭惡。我一直睇我地嘅相，一張又一張...慢慢，我忍唔住流眼淚...。我真係好想搵佢...但我唔知應該點做。我打開手機，開左wtsapp，我望住我同呀文嘅對話。
「我想見你..」我打完又即刻delete返。


「呀文...」
「陪我....」
我不停打完又delete..我唔敢send出去，而家嘅我根本比唔到承諾佢，我唔想比假希望佢，咁樣只會兩個人痛苦。但我又好想佢睇到我「Typing...」，好想佢拯救我。我最後都係忍住冇搵佢，至少係我搵佢之前，我要解決到我嘅問題，唔係以我一個有老公嘅人根本冇資格同佢係埋一齊。我要諗辦法，一定唔可以再係咁。為左呀文，我一定要堅強。

第二朝起身，我老公都仲係未返嚟，我司機車左我去公司。我入左office嘅ceo房，我見到我老公坐左係度。
「坐呀」佢話。
「嗯」我坐左係佢對面。
「我想你幫我做一樣嘢」
「你講」我冷冰冰咁話，我地已經習慣左。
「我地公司要派人去歐洲，我想你幫我跟住佢地，我唔想見到有咩差錯」


「幾時去？」咁突然要去歐洲，我仲未有心理準備。
「兩日之後」
「好」佢叫我做嘅嘢我從來都唔敢唔做。
「係咁啦，你可以返去準備下，呢幾日返公司都得」佢話。我出返去坐左係自己個位，我又開始糾結我應唔應該搵呀文...。我又打開wtsapp，禁左入呀文個對話，我望住部手機...我好似唔知要打啲咩咁。但我就嚟要去歐洲，因為我都唔知要去幾耐..我係咪應該同佢講一聲呢。唉算啦..我都係去到嗰邊先再睇下點，反正而家搵佢都冇用...。

我坐左一陣就走左，司機車我返屋企。我已經習慣左佢叫我做咩就做咩，只要唔係啲好無理嘅要求我都會做。而家我嘅婚姻就好似同工作、同所有嘢綁埋一齊咁。我同佢嘅關係變到好似上司下屬咁，冇再有感情。但今次佢叫我去歐洲，我就當俾個機會自己散下心。

我一定會爭取返屬於我嘅愛情