因為ex，我決定向全世界嘅女人報仇: 唔習慣冇左你

我無無聊聊咁睇YouTube，一個人真係好悶。唉，做咩好呢..搵下賢狗打機先。
「喂，打機？」我直接打比佢。
「唔得呀今晚，陪女」
「下？你幾時又有女？」
「有好撚耐啦！係你唔知姐～你近排都唔知忙咩」佢話。
「唉，有機會再講，你唔打就由佢啦」
「再打啦屌」
「好」我收左線之後又自己一個碌下手機....點解今日啲時間過得咁慢。我掉左碗米線，抹下枱，再返返房。
八點三十二分
我決定執一執張枱...我將啲唔要嘅嘢掉左佢，再拎左塊布嚟抹，我順便抹埋其他有塵嘅位，飯枱、電腦..有塵嘅地方都盡量抹下。


八點五十六分
...有冇搞錯呀..做咁多嘢都係過左廿幾分鐘。點解今日啲時間真係過得咁慢....。Rachel應該差唔多食完飯？問唔問下佢呢..。唉問咩呀..人地出街撐枱腳..點好意思阻住佢，唉算啦自己打下PS4。我隨便開左隻單機game嚟玩，但玩左一陣又好冇癮...人大左就冇咁鍾意打機，好多時候都係當消磨下時間又或者當同FD吹下水。熄左部PS4之後我再望一望手機..
九點四十分
......我決定聽一陣歌..再攤上床玩下手機。當你平時習慣左一種生活節奏，有一日突然間轉變左，你就會變得好百無聊賴。唔知Rachel佢食完飯未呢..應該點都食完啦..？但係食完仲唔返嚟嘅...。我開左IG，見到佢post左新story影住啲嘢食。佢地兩個食西餐喎，但佢冇影個男仔個樣。死啦搞到我好好奇，係咩仔先吸引到Rachel同佢出街，等佢返嚟問下佢先......我睇睇下就訓左...

起身嘅時候我望一望手機........
十一點零九分
佢仲未返嚟嘅？冇理由嫁..應該點都食完啦...。屌！唔通佢地開房？...唔會掛...Rachel應該唔係呢啲女仔...？唔係喎......都唔一定喎..佢而家都冇男朋友。佢之前話過佢都想試下反叛...死啦..咁咪益左條契弟..唔得，我點都要搵一搵佢。
「仲未返？」我係張床上面wtsapp佢。
「我地去左飲酒呀..你唔洗等我啦，你快啲訓啦」


「小心啲呀，唔好玩太夜..」屌..我成個老母咁。
「嗯，知道啦，我再搵你啦，真係唔洗等我呀」
「冇等你呀，我問下炸～」
「哦～好啦」佢話。....原來去左同人飲酒，佢地第一日出嚟食飯就一齊去飲酒會唔會有少少唔好..。唉屌，我理得人地咁多呀..佢又唔係我條女...，算！刷牙訓教！我刷完牙就返左上床訓..........訓唔著喎...。我打側望住Rachel個枕頭同床頭櫃...
—————————————————
「我想買個床頭櫃呀」佢係ikea話。
「咁突然？我房咪有囉」我話。
「唔公平！得你嗰邊有，我點放手機喎」
「...我搬過嚟比你囉，我有冇都冇所謂」我話。
「唔得～咁盞床頭燈點算呀」


「.....咁搬埋盞燈比你囉..」我好無奈咁話。
「唔要..我唔鍾意盞燈咁近，好光」
「好好好～買啦...怕左你」
「咩喎～明明就好有用！」佢話。
「係～」最後我地就咁就買左呢個床頭櫃。
—————————————————

唉..Rachel返嚟未....真係有啲唔慣要自己訓...。「唔好飲酒啦，快啲返嚟訓啦，我訓唔著啦」..我真係好想咁樣send比佢。咁當然，我唔會啦。平時佢沖完涼訓教會有陣香味，係佢洗頭水嘅味，我甚至已經習慣左聞住呢陣味訓教。習慣有時候可以係一件好可怕嘅事，因為你會分唔清楚你係習慣左同佢一齊，定係你鍾意左佢。但對於我嚟講，我個心仍然仲未放到另一個女人。我仲係好想Nicole返嚟.....，高曉琳......我好掛住你了..你可唔可以返嚟呀....。Nicole....而家你一定係係人地屋企訓緊教了....係咪？你有掛住我嫁..我知嫁...係咪？你一定係有好多苦衷了..如果......如果真係仲有下次見面....可唔可以唔好再離開我啦....。我諗諗下開始發現眼角有一滴眼淚滴濕左枕頭...原來Rachel一唔係度我個人就會變到咁脆弱.....屌！呀文！..可唔可以似返個男人，唔好喊啦......。唔得.....我做唔到........你由我喊啦.......我真係好辛苦呀..........。當一個人悲觀嘅時候..所有嘢都可以變得好負面...我甚至有一刻諗..點解連Rachel都要離開我....佢明明都有應承過我唔會走......。Nicole...唔知你而家係邊度呢...我好掛住你.......

突然好想你 你會在哪裡
過得快樂或委屈
突然好想你 突然鋒利的回憶
突然模糊的眼睛