因為ex，我決定向全世界嘅女人報仇: ikea

我地兩個慢慢係銅鑼灣ikea行～
「哇！我想買呢隻杯！！」Rachel指住一隻玻璃杯咁講。
「買啦，如果你鍾意就買，反正我屋企冇咩靚嘅杯」
「好呀！你死啦你～女人買起嘢上嚟，我驚你拎唔哂」佢話。
「哈哈，拎唔哂咪叫佢送貨～」
「咁大口氣！你真係死硬了～」佢話。
「你比錢，唔怕」
「喂也！你都有份嫁！」
「哈哈講笑炸，你買啦，唔好太過份就得啦」
「傻啦～AA得啦」佢話。


「咁好？」
「緊係要啦，你又唔收我租...我都有啲唔好意思..」
「哈哈好啦好啦」我講完然後佢又繼續簡。佢好鍾意簡啲好靚嘅家俬，靚嘅碗、枱布、床單...我地好似兩公婆去買家俬咁。只不過，呢「兩公婆」冇拖手、冇甜言蜜語，只係普通不過嘅同居伙伴。

我自己幾鍾意行ikea，因為好似好多嘢可以睇咁，以前同Sophia 拍拖我地都成日行。我記得嗰陣佢同我講話佢想結左婚之後我地間屋要用木地板，佢話如果生仔，bb間房就油粉藍色，生女就油粉紅色....本身我都以為我餘生就係會同Sophia過。我地有哂計劃幾時結婚、幾歲前生仔、買樓定租樓、住邊區、even連校網都有傾過。邊有諗到最後會發生啲咁嘅事...好似所有嘢又要重新loop過，又要識一個人，同佢慢慢了解再相處，然後又要再磨合...

人大左真係唔鍾意有咁多轉變，所有嘢維持原狀就最好。你已經冇咁多心機去再重新認識一個人，然後又怕佢再hurt你。講白啲就係「心很累」，直頭係「很撚累」。唔再係好似後生仔咁，有咁多心思去玩愛情嘅心理戰。以前我地溝女，可以日日mon住佢係咪上線，係咪秒覆我。我會好用心去諗點樣做先可以令佢對我有好感，wtsapp嘅每一句回覆都精心挑選...。只可以講，我已經唔再係考慮拍拖，而係考慮呢個女人同唔同到我行之後嗰幾十年。我只係想搵一個愛我嘅女人，性格正正常常，樣唔洗好靚。咩身高、收入、家庭統統都冇所謂，只要佢唔會背叛我..咁就冇問題了。唉..但我真係唔想開始一段新嘅感情住...我短期內都唔想再focus係愛情上面。

「喂～你係咪睇緊嫁！」Rachel話。
「嗯？？」


「岩岩問你白色好啲定藍色好啲呀..你成個人呆左咁」佢拎起左個收納盒問我。
「你係咪想放係房？」
「係呀～」
「咁藍色啦，襯返」我話。
「好啦，你岩岩諗咩諗得咁入神呀？」
「冇呀...發呆姐」
「哼！有個靚女同你行街你都咁唔專心！」佢叉起條腰話。
「哈哈，有靚女咩？」我周圍望。
「哼！」佢一嘢打落我背脊。
「哇.....頂你，洗唔洗咁重手！」


「鬼叫你亂講嘢！」
「...靚啦靚啦，全世界最靚係你...」我hea鳩佢。
「...！聽完仲唔爽！唔理你！我買嘢！」
最後我地一袋二袋咁拎返上車，我都冇諗過佢真係一買就買左好多。佢話因為買完有排用，所以..佢係真係諗住長住係度？我當然開心啦，但我地又唔係情侶..我真係唔知佢點諗。

「呼～買嘢就係正～」我地返到去，佢心情好似好好。
「哈哈，我真係低估左你」
「都話你死硬嫁啦！」佢話。
「唔緊要啦～當你幫我買家俬～哈哈」
「好！執嘢！」佢興致勃勃咁。我同佢一齊執，我地將啲杯杯碟碟放好，再放啲盒同執啲嘢入去。執下執下已經好晏，然後我地分別沖完涼就返左入房。
「呀文呀」佢話。
「嗯？」
「之前咪話有個男仔搵我傾嘅」
「嗯」
「佢近排搵返我啦..你覺得我同唔同佢出去好」佢話。


「ummmm...你想去咪去囉～」我邊禁手機邊講。
「真係..？」
「嗯..去下冇壞嘅，當識個朋友囉」我話，我真心唔想拖住佢..都想佢搵到個錫佢嘅人。
「下...好啦..你話嫁..」
「小心啲就好啦」
「嗯..有咩事我打比你咪得囉！」佢話。
「哇....你當我係保鏢呀？」我笑一笑。
「車～我平時幫你做家務，你連救我都唔肯！」
「救救救～講笑姐」
「死呀叔！」佢又拎枕頭打我。
「喂..！岩岩先換新枕頭套！..」
「嘻～理得你」佢又打落嚟。

我地今晚又係打打鬧鬧入面過，我地之間嘅相處冇咩磨擦，佢係一個好好嘅住客，更加係一個好好嘅朋友。如果你要問點解我地唔一齊，可能係因為我個心入面仲有Nicole，都有可能係我驚改變，更加有可能係我地之間冇咩火花..就好似好日常、好平鋪直敘。所以...Rachel 暫時都只不過係我嘅”roommate”。冇錯我係口講想搵一個愛我嘅人，但唔代表我會放棄對愛情嘅追求，我仍然係會想要心動嘅感覺，想享受愛情嘅味道。



應該怎麼愛 可惜書裡從沒記載
終於摸出來 但歲月卻不回來 不回來
錯過了春天 可會再花開

一千種戀愛 一些需要情淚灌溉
枯萎的溫柔在最後會長回來
錯的愛乃必經的配菜