因為ex，我決定向全世界嘅女人報仇: 同一個夢境
Rachel真係有種神奇嘅魔力，有佢係身邊拖住我，我竟然冇再發惡夢。呢一晚，我訓得好舒服，好似一架小船係狂風雷雨嘅時候有一個避風港。Rachel就係我嘅避風港，佢拖住我之後好似所有風風雨雨都吹唔到我咁，好平靜、好安全、好舒服。我從來都冇諗過佢會比到呢種感覺我，我唔知係因為我純粹需要一個人陪我，定係只有佢先令到我內心平靜。
起身嘅時候我發現我隻手仲拖住佢，佢打側訓正對住我。我望住佢訓教個樣...佢對人真係好好..有佢係身邊真係會少好多煩惱。我忍唔住摸一摸佢個頭，然後我決定煮早餐比佢食。打開雪櫃...屌..好似冇咩好食，個櫃又得啲杯麵...。算啦我打兩隻蛋，淥個杯麵比佢。
「嗶～」我禁著個電磁爐，落左少少油，打左隻蛋落去。我唔知佢鍾意炒蛋定煎蛋，但我覺得食麵嘅話好似煎蛋岩啲。我煎蛋嘅同時打開左個杯麵，再淥熱水。過左幾分鐘就搞掂哂，我為左冇咁頹...專登拎左個碗，然後倒哂啲杯麵落去，再鋪兩隻蛋係上面。唔....咁就即刻冇咁頹了～我再倒左杯牛奶比自己，然後返入房睇下佢醒未。
「起左身啦？」我見到佢已經半醒咁玩緊手機。
「嗯....呵～.......呼.....」佢打左個大喊路。
「我煮左早餐比你食啦～雖然...唔係啲咩好豐富嘅早餐...因為屋企冇咩嘢食..」
「嗯...唔緊要呀，但我唔想郁住..」佢話。
「我驚啲麵凍呀，乖啦食完再訓」
「好啦...你扶我」佢伸左兩隻手出嚟。
「唉....好好好」我行埋去，捉住佢兩隻手拉起佢，然後佢行出房去刷牙洗面。
「你想飲咩呀，果汁、水、定牛奶？」我問。
「水得啦～」佢叫。
「好」我斟左杯水比佢。
「哈哈，點解咁似杯麵嘅？」
「....係杯麵嚟...冇計...屋企冇嘢食..」我話。
「哈哈哈，笑死我，我未見過人用碗食杯麵...！」佢係咁笑。
「...食就食啦！唔食我收埋佢！」我拎起個碗。
「食食食...哈哈」佢想搶我個碗。我地又打鬧左一陣，之後就食早餐。食完早餐佢話要返一返屋企，而我就自己係屋企做嘢。因為公司啲嘢我放低左一排，要catch up 返。
「喂？喂肥仔」
「做咩咁撚早打嚟...屌你今日假期...」公司個肥仔話。
「屌..上次我地team跟緊個客，最後嗰度點搞？個客........」
之後嗰幾日我開始嘗試將我嘅生活重回正軌，至少..我覺得得我做得到。係工作上面我嘗試再主動少少攬多啲嘢做，我諗..我塞滿哂schedule 嘅時候我就冇時間諗起Nicole，就會慢慢放低。我放工之後都約同事食飯，有時約下賢狗，或者其他朋友，就係想盡量減低一個人嘅時間。星期六日去踢波，夜晚打機呢啲我已經好耐冇join嘅活動我都開始玩返。
我以為我可以做得好好
但原來只係「我以為」
Nicole.......你...做咩呀...？你..想走？......你唔係應承過我...你話要我信你....！你而家算點呀！....你講大話！！點解你可以一個message 都冇send比我...你要我點堅持落去.....你....你真係好狠心....我驚....我好驚.....驚有一日..我會憎你.....。求下你....實現你嘅諾言....我唔知我堅持到幾耐...冇左你....我個心好似比人挖空左咁.....點解....我以為我嘅生活可以返返正軌...點解一到夜晚...你又出現係我嘅腦海入面...........。
今晚我又發左個夢，夢入面我拖住一個女仔，我今次我睇清楚左佢個樣..........Nicole？我地拖住手係旺角街頭行緊，行行下無啦啦見到有一大班人出現左...等等先..個夢咁熟面口嘅？..我記得有發過....但幾時呢....？呢個時候我聽到嗰一大班人指住我嚟講...
「就係佢啦..搶人老公呀...」
「唉呢啲仆街，真係死左佢算啦」
「個老婆又係嘅..有老公仲咁樣」
「呀仔，記住以後唔好學呢啲人，衰人嚟嫁」
「哇屌..大大頂線帽戴落佢老公度」
我見到佢地面上厭惡嘅表情，好似我係千古罪人一樣。咦..呀婷同Rachel都係人群入面嘅？突然間，有把刀係好遠飛埋嚟穿過人群插住我心口。好痛...喂...點解......發夢都咁痛嘅....，然後我見到Nicole用力推開左我一下，地下無啦啦有個洞係度，我嘅視角望住Nicole企係洞口笑住望住我。佢越嚟越細，而我就跌左落個洞入面。刀都仲係好痛....而我望住嘅洞口不斷收細..收細....收細.....
「救...我...」我大叫。
「救我呀！！......呀婷...！Rachel....Nicole！！！！」我再大叫。冇人應。
「我...我唔要就咁就死....我......我...」....
「哈哈哈哈」周圍傳嚟啲好奸嘅笑聲。
呼......哈.....呼......................係夢。我記得呢個夢我都有發過....係幾時呢....？....！！我記得啦！係當我同Nicole過第一晚夜嘅時候....。咁....係咪當時個天已經暗示我唔應該同Nicole 係埋一齊...？我打開手機，好依賴咁又wtsapp Rachel....
如果我們不曾相遇
你又會在哪裏
如果我們從不曾相識
人間又如何運行