因為ex，我決定向全世界嘅女人報仇: 救生稻草

「....」Rachel好似唔知點比反應。
「...我...唔想一個人係度....我...想你陪我。你放心...我訓梳化...你可以訓床」我話。
「.....咁..好啦」佢除返對鞋，慢慢行過嚟。
「你..等我一陣，我落去買啲嘢！但如果你攰就訓啦..」我話。我講完就入廁所換左件衫，然後落樓。好彩附近有間開廿四嘅惠康，我入左去買左套旅行裝嘅牙膏牙刷，買左支護髮素，再加啲卸妝用品。我見Rachel有化妝，佢應該冇帶卸妝..同埋我屋企冇護髮素，我冇用開，但女仔應該要。我再執左啲杯麵，嘢飲，水。我返到上去，見到Rachel趴左係我張床上面睇緊劇。
「睇咩睇得咁入神呀？」我行左去佢隔離。
「哇....你嚇死人咩！」佢話。
「下..我開門咁嘈你聽唔到嫁咩...」
「我..太專心睇劇...」
「韓劇？」
「台劇嚟嫁傻仔！」


「車～鬼知咩..你暫停左點睇喎」我話。
「你落去做咩？」
「幫你買左啲嘢」
「下？」
「你都要沖涼刷牙嫁嘛～」
「嗯..我岩岩都諗緊呢個問題」
「我買左啲嫁啦，你去啦。如果你唔介意..我都有啲女仔T恤」我話。雖然..啲T恤係原本留比Sophia但係Nicole著過....但我廢時同佢講啦..
「好..咁我去沖涼先啦」
「嗯，我拎毛巾比你」我話。
「係喎！」


「嗯？」
「你有冇卸妝水..」
「卸妝水，卸妝綿嗰啲我都買左啦，我求其買左啲，你睇下」我指住個袋。
「咁細心嘅！」
「基本嘢啦～」
「你都係變左個細心嘅呀叔炸～」
「你..！」我扮想打佢。
「嘻嘻～」佢拎住啲嘢衝左入廁所。佢去沖涼嘅時候我拎左啲被同個攬枕出去梳化，之後又拎返入房...我唔想訓梳化...。最後我放左個攬枕係張枱，諗住今晚趴係枱度訓就算。突然間又諗起當初Nicole係我度過夜...唉..唔諗佢。

Rachel沖完涼就濕住頭髮咁出嚟，髮尾啲水珠整濕左件T恤少少，但見到透左少少bra。佢帶bra訓？但都合理嘅..始終唔係自己屋企，唔會除啦。


「風筒係邊？」佢問我。
「係梳化隔離個櫃～咁我沖涼啦」
「嗯，你去啦」佢講完我就去左沖涼，沖完涼佢都仲未吹完頭。我望住佢，又諗起我幫Nicole吹頭...見到佢吹頭我都有股衝動去幫佢吹頭.....但..唔會啦。佢好似覺得阻住左我咁，就話：
「你吹先啦～我有排呀」
「唔洗呀你慢慢，我唔吹都得，都唔多頭髮」我話。
「好啦」
「你肚唔肚餓呀？我買左啲杯麵」
「哇你好邪惡呀....但我要食！」佢好興奮咁話。
「哈哈，唔食飽邊有力減肥」
「我肥咩！」佢用凶狠嘅眼神望住我。
「唔肥...超瘦...」
「誇張～」。之後我地食左宵夜，又飲左啲嘢，就返返入房。

「你今晚真係訓呢度..？」Rachel坐左係床上面問我。
「係呀...我唔想訓廳」


「嗯...其實...你想嘅..都可以訓床嘅」
「唔洗啦..」我話。
「唔怕啦..張床咁大」
「....嗯」我拎住個攬枕，慢慢行返上床。我盡量靠住床邊行，驚掂到佢。放低左攬枕同被我就挨左係床邊..
「咁..我訓啦」
「嗯...我..去熄燈」我落床熄左盞燈，然後好小心咁一步一步摸黑上床，事關我好驚摸錯嘢.....上左床，擰側個身背對住佢，然後我合埋眼.....

「呀文...你要信我...」.....Nicole....Nicole...你話我知...我要點做......
「呀文....我愛你」..我都愛你.....Nicole.....你返嚟啦...好冇呀...我成個細腦都係Nicole...根本訓唔到...Nicole...你好靚....Nicole..冇事啦我係度.....Nicole..你唔好走.....唔好走.....Nicole..！！！！

「呀文...？你冇嘢呀嘛...？呀文！」Rachel叫我。
「.........嗯？」
「你..打哂冷震咁..，冇嘢呀嘛...」
「冇事......冇事...」我話。
「你真係冇事..？」佢好擔心我。


「呼...呼........冇事.....」我而家先發現我背脊濕哂，我飆冷汗...。突然間，我feel到Rachel隻手，係被下面捉住我。
「冇事..冇事...我係度..我係度....」佢話，佢隻手輕輕摸我隻手，然後捉實我。
「...嗯......嗯」我個人慢慢咁震...然後嘗試再訓。

佢隻手好細，但好有安全感

「乖...冇事...訓啦，我係度」佢一句一句好溫柔咁講，好似媽媽細細個氹小朋友訓教咁。慢慢..我就訓得著了..

願明天 能不再為妳痴纏
明白改不變 妳亦離開很遠
就算花光心機守每一個諾言
最後誰又會可憐

極危險 連思覺像也失調
無辦法接受現實 自製假想能延續故事


妳的聲線還仍言猶在耳
已分不清楚我位置