因為ex，我決定向全世界嘅女人報仇: 輪迴
好彩我今日都請左假，但都差唔多將啲AL用得七七八八，老細都開始間唔中的我入房問我搞咩...。而家夜晚六點，我訓左係床上面諗，我驚最近發生嘅事真係影響到自己，但我又抽身唔到，個心成日都諗住Nicole。呢種感覺就好似毒癮咁，你知道佢開始好影響到你正常生活，但問題係你發現你戒唔甩。我琴晚就算因為通左頂，朝早返到屋企好攰，但係我一合埋眼都係諗起Nicole。諗起佢最後係機場嘅背影，諗起佢話要我信佢究竟係咩意思，係咪佢要離婚，咁我又應唔應該等佢....不過就算唔講應唔應該，以我而家嘅狀態，我都會一直on99咁沉左係度....
而家嘅我唔可以話係失戀，但同失戀冇分別。我記起上一次有呢種感覺係同Sophia分手，但嗰次更多嘅係嬲同想報復...。今次我唔會再犯上一次嘅錯，當初話要報復，想玩想搵人陪。但過左咁耐了，我得到啲咩？我唔可以比自己再係咁樣，但我都需要一個人去比我傾訴，唔係我覺得我真係會頂唔順。
「我收工啦，一齊食飯？」Rachel搵我。
「我唔係好想出街..個人好攰」
「咁..下次？」佢話。
「你介唔介意買嘢上我屋企食呀？」
「嗯...都...OK嘅，但你屋企係邊頭？」
「我send個location比你啦，你買嘢上嚟就得啦，我叫外賣」我話。
「好啦，咁我而家過嚟啦」
「嗯，你差唔多到同我講啦」我話。我share左個location比佢，過左半個鐘多少少，佢打比我。
「喂？」我話。
「係咪XX大廈呀？你個location唔係好準」Rachel話。
「嗯，廿六樓Ｄ，樓下密碼係1234」
「好，你差唔多準備開門啦～」
「OK，掰～」
「叮噹」門鐘響，Rachel嚟了。我著住普通一件T恤加短褲去開門，一打開門就見到Rachel。佢好似有少少唔同左...靚左？...好似化多左妝，同埋髮型都唔同左，佢以前係齊陰，而家轉左斜陰。成個感覺就好似由一個可愛Type嘅女仔變左女神Type。
「點呀文少～好耐冇見啦～」佢拎住個外賣笑一笑。
「係呀..發生左好多嘢」我話。
「所以我要企係度聽..？」佢講笑住咁講。
「哈哈，你快啲入嚟啦」
「哇..估唔到你呢度咁靚喎」
「你唔係第一個人咁講啦～隨便」我話。
「我想去一去廁所」Rachel話。
「呢邊就係啦」我幫佢開左廁所門。佢入左廁所之後我幫佢拎左佢啲嘢食去飯枱，然後好簡單咁鋪左張枱，播左少少音樂。
「哇，搞到咁浪漫咁呀～」佢係廁所出嚟。
「冇呀，平時自己係度食飯都會播下歌，悶嘛。同埋我都好鍾意聽歌」
「好啦，食完飯再聽你講你嘅嘢，我都有好多嘢想update」佢話。
「嗯，快啲食啦」我都將我岩岩叫嘅外賣係廚房拎返出嚟同佢一齊食。食完飯我執枱，而Rachel就坐左係梳化玩手機。
「好～你講先啦」Rachel撓住腳坐左係梳化望住坐係飯枱嘅我。
「唉..一言難盡，我諗我同Nicole真係冇可能」
「點解阿...你地去旅行嘈交？」佢話。
「我有冇同你講過佢係結左婚」
「...........冇..」
「唉.......你介唔介意..？」我拎左包煙出嚟。
「唔介意嘅...但唔太鍾意..」
「好啦咁我唔食」我收返埋包煙。
「我都唔知你有食煙..」佢有少少驚訝咁話。
「我唔食嫁..係返左香港先食」
「...嗯..你繼續講..」佢講。我將我同Nicole嘅嘢一五一十咁同佢講哂，佢本身都知道一部份，而家再講埋淨低佢唔知嗰啲比佢聽。
「哇....我真係冇諗過係咁...好似電視劇..」
「你覺得我係咪好蠢...明知係冇結果嘅但係都鍾個頭埋去」我話。
「又唔係嘅...我覺得如果係我..真係咁鍾意一個人嘅時候，就算得1%機會會可以繼續發展，我都會試。因為我會覺得唔試我一定後悔..」
「我嗰陣就係咁諗...但我今朝揸車返嚟嘅時候有一刻諗過，如果我冇咁沉佢...或者而家就唔洗咁痛...。我一直都以為自己唔會後悔我做嘅決定，但點解今次我真係有後悔嘅念頭。係..我同Nicole一齊好開心，但每次開心都係好短暫...。如果要我傷心幾個月去換幾日嘅開心..我真係唔知值唔值得..。你知唔知最心痛嘅地方係邊？」我話。
「唔」佢擰頭。
「係我接受唔到有另一個男人日日係佢身邊佔有佢，仲要佢對Nicole咁差。但我只係好似一個旁觀者咁咩都做唔到，你話我係咪冇撚用」
「你唔好咁諗先啦..」佢嘗試安慰我。
「點樣唔咁諗....我根本冇資格同Nicole一齊...」
「....本身我諗住講我近排發生嘅事...點知你比我更加需要人安慰..」
「唉算啦唔好講我了，我再講自己都就嚟癲，你講下你啦」我話。
「我...前排咪跟左啲FD去Shisha飲酒嘅..」
「嗯..你唔好同我講你比人食左...」我話。
「.....」Rachel無言。
「下！！真嘅？」我有啲激動。
「又...唔算係食左...」
「咁姐係點..」
「姐係...冇食...但係.....又.....點講呢..」佢話。
「有摸有錫咁？」
「....嗯..」佢dup低頭唔敢望我，好似做錯事咁。
「....唉............」
「咁我嗰陣醉醉地...個男仔係咁話陪我..我見佢個樣正正常常...」佢話。
「但之後你地冇做啲咩嘅？」
「之後佢想帶我去酒店..但我拒絕左，就返左屋企..」
「..咁都好啲..」我話。如果佢比人食左，我真係會鄧佢唔抵...比啲撚樣食..咁不如比我食算啦.....。
「但係佢拎左我wtsapp....近排係咁搵我想約我出嚟」
「但你覺得佢點先？」
「佢...點講呢..我又唔係鍾意佢，但又唔係特別抗拒..。可能係我之前未試過同呢種男仔相處...佢比到少少新鮮感我..但我又諗，既然都失左戀..咁有機會嘅話咪試下...」佢話。
「你諗清楚呀，好多人都係失左戀是但搵人一齊，最後九成分手收場。如果你好彩遇到個好男仔，都算。但好多時遇到啲仆街，你到時喊都冇用」
「我..唔知..」
「唉...估唔到到你面對呢啲問題了...」我話。之後我地沉默左一陣，我諗緊應該點幫佢解決...應該放手比佢試下跌下，定係保護佢等佢唔洗感受咁多愛情帶嚟嘅苦...。但聽完Rachel講，其實我自己都有少少反思。
愛情好似永遠有個輪迴走唔出去
相遇、相戀、失戀、放縱、又再相戀...。呢個世界究竟有幾多人困住左係呢個輪迴入面，當你好彩走得返出嚟嘅時候已經浪費左好多青春。你發現自己已經唔再年輕，冇本錢比你再去揮霍，冇青春比你再去虛耗，冇機會比你再去尋覓一個人。但更多人去到中年仍然沉淪係呢個輪迴，結婚、生育、離婚、再婚，屢見不鮮，甚至乎害左自己嘅下一代。我好似睇得好通咁，但我知道今晚訓教嘅時候..一樣會諗起Nicole，只不過我唔想再傷害人，覺得向全世界女人報仇實在係太幼稚了。
流淚行勝利道
別再做愛情奴
沒有另一半也願身邊各人都安好
流淚時要自傲
別再為瞬間的愛情跌到
寧願叫蒼生有明早