因為ex，我決定向全世界嘅女人報仇: 角色扮演

成晚攬住Nicole訓到自然醒，但醒之前我發左個夢。個夢好真，真到好似我有經歷過一樣。

夢入面我拖住一個女仔，我睇唔清佢個樣，但個夢話比我知個女仔係我當時嘅女朋友。我地拖住係旺角街頭行緊，行行下無啦啦見到有一大班人出現左，佢地係度講緊嘢..佢地講咩呢..？點解全部圍住我又望住我嘅..？我見到佢地面上厭惡嘅表情，好似我係千古罪人一樣。突然間，有把刀係好遠飛埋嚟穿過人群插住我心口。好痛...喂...點解......發夢都咁痛嘅....，然後我「女朋友」用力推開左我一下，地下無啦啦有個洞係度，我嘅視角望住我「女朋友」企係洞口笑住望住我。佢越嚟越細，而我就跌左落個洞入面。刀都仲係好痛....而我望住嘅洞口不斷收細..收細....收細.....
「救...我...」我大叫。
「救我呀！！......」我再大叫。冇人應。
「我...我唔要就咁就死....我......我...」....
「哈哈哈哈」周圍傳嚟啲好奸嘅笑聲。

「呼.....」原來係發夢。我起身嘅時候，Nicole已經唔係張床。佢應該返左去了..我諗，唔知點解有啲失落。但突然比我聽到廁所有沖廁聲，原來佢未走。
「我以為你會訓到好晏添～」佢出左廁所行入嚟話。


「而家幾點？」我起身問。
「8點半炸，你攰就訓多陣啦。」
「我以為就嚟中午...唔訓啦我有啲肚餓。」我話。
「你刷個牙先啦，我地一陣落去食早餐？」
「可以呀，你等我一陣。」你地係咪以為好多時候搞完嘢第二朝起身，個女仔仲會煮早餐比你食等你起身。我試過嘅...好少囉，唔係好似睇電視劇咁。因為多數琴晚到好攰，第二日朝早(even中午)係懶得去煮。
落去之前我send左個Wtsapp問狗賢：
「食撚左佢未？」
「btw，妍妍琴晚點？」一個剔，佢應該未訓醒。

我同Nicole落左去食早餐，為左避免會見到狗賢同Judy，我簡左間我同賢狗平時好少食嘅餐廳。


「你今日有咩做呀？」Nicole問我。
「冇呀，本身冇約人，可能一陣返上去做埋啲嘢。你呢？」
「咁勤力～冇呀，我本身約左個Fd夜晚睇戲，但佢琴晚話去唔到。」佢話。
「哦～做咩呀？想約我睇戲呀？哈哈。」
「如果你唔介意同我睇我又冇所謂呀～」佢擺左個好可愛嘅微笑樣。
「睇囉～唔係睇鬼片就得喇。」
「你好驚睇鬼片嫁？點溝女呀！」
「嘩，驚睇鬼片就溝唔到女嫁咩～但係你真係想睇鬼片？」我話。
「唔啦，廢時嚇死你。」
「我未有咁廢！」


「明明就廢..」

我地好似普通情侶咁打打鬧鬧，但我地都知道，我地唔係。更加，冇可能係。佢有佢嘅世界，我有我嘅樂園，大家係兩條平衡線上面行，只係咁岩唔小心掂左一下。當然，我想掂多幾下....我唔係唔鍾意佢，又唔係冇Feel，但係有種感覺係會覺得佢唔會係可以同你白頭到老嗰個。可能係因為冇安全感，佢可以同你一夜情就代表佢可以同千千萬萬個男仔一夜情。

「你唔介意我上你度hea陣呀可？夜啲我再返屋企換衫化妝。」Nicole問我。
「可以呀，我都得。」
「唔會阻住你做嘢？」
「執啲手尾姐，好快搞掂，我自己係屋企都係悶，有你係度可以陪我傾下計呀嘛。」我話。
「咁返上去啦？」
「好～我請啦呢餐。」
「唔洗啦，我又食你嘅訓你嘅好似唔係幾好。」佢話。
「小事啦，下次你請返囉～」
「好啦。」

之後Nicole又上左我屋企，我地好似情侶咁食完早餐返屋企，至少...我地都扮演緊呢個角色。