我中出咗副校: 98. 楊枝甘露

我哋去咗一間甜品鋪坐低，佢就嗌咗個楊枝甘露，我就嗌咗個涼粉。

「啱啱冇嚇親你吖嘛？」佢殷切噉慰問。

「點會，幾吖歲人有乜未見過，啱啱嗰啲小兒科啦。」

「都係嘅，我都試過再誇張啲。」

「其實，我一路都好好奇㗎，點解你做到高層仲係要去呢啲場應酬嘅？唔係見啲再勁啲嘅客嘅咩？」要搵大老細都唔會去呢啲酒吧搵啦。



「再勁啲嘅客嘅話，佢直頭做咩都得啦！我就寧願搵啲中層嘅細客算喇，費事再拋個身出嚟。」再拋？睇嚟佢都有啲過去。

「都係嘅，嗰班人更加有權有勢，真係乜嘢都做得出，你仲要冇得反抗。但係應酬係咪會好多呢啲情況㗎？冇個客係正經啲嘅咩？」

「都有嘅，不過嗰啲就未必要親自見嘅，佢哋多數忙嘅，可能間唔中出嚟食個晏噉。基本上都係啱啱呢啲情況㗎喇，好似上次喺club 嗰次又係噉。」咪住，佢上次喺club 度見到我同副校？原來佢都記得我？

「你講club 嗰次……係……」我口震震噉問，但未講完成句說話，兜楊枝甘露就嚟咗。

「我明㗎喇，大家都係做緊同樣性質嘅嘢啫。」佢眼神閃出一絲失望，冷淡噉拋下呢一句，就食住佢兜嘢，冇再出聲。



唉，就連佢都睇唔起我。

算啦，sp 啫，或者我哋對對方嘅日常生活都唔應該干涉咁多。

「我自己走先喇，拜拜！」佢食完個楊枝甘露，擺低咗啲錢就走咗，我叫都叫唔住。

諷刺嘅係，副校呢個時候 send whatsapp 畀我。

「記得聽日10 pm!」仲要加埋個心心emoji，成個呀蟬噉嘅樣仲打啲噉嘅嘢，核唔核突啲呀。



原本已經麻木，習以爲常嘅我喺呢一刻竟然重拾一開頭嗰種覺得嘔心嘅感覺。

點解做人會做到咁折墮㗎？

------
唔好意思，呢排比較忙，兼且部電腦成日壞，所以啲文會比較短，有時甚至會斷更，希望各位諒解，我儘量都會日更㗎喇。