我中出咗副校: 94. 乾淨返嘅tg 對話

「宴會？好多有錢佬嗰啲呀？介紹埋我吖嘛，我都想做上等人，哈哈」

「真心㗎？可以嘅，嗰啲宴會好雜，乜人都有，有人介紹就入得，不過我唔覺得你噉嘅樣入到去就可以晉身上流囉！」

「講吓笑啫，你去到要小心呀，冇人救到你㗎」

「車，我仲熟手過你啦，話嗮都去過咁多次，喺度懶勁噉」

「唔同你講咁多廢話，開會先」



噉就offline 咗。

最衰而家係返工時間，想同班波友吹水又唔得，佢哋個個又一副成功人士噉款，次次約出嚟都唔得閒，得返我一條友好煤噉喺度。

我望住以前同呀靜嘅對話，諗返之前嗰幾個月嘅相處。

「唉，我應唔應該去美國探屋企人呀？佢有啲事，但係我又冇面目見佢哋……」記得佢講呢句嗰時，係佢第一次講自己啲私人事。

「屋企人邊有隔夜仇㗎，你叫得佢哋做屋企人，啫係你心底仲認同佢哋嘅」



「以前反叛，冇跟佢哋去嗰邊，仲要嗰時掛住拍拖，連家姐喺嗰邊出咗事都冇理到，最尾咪反咗面囉」

「但係佢哋而家係咪有啲咩急事，你先要去搵佢哋先？無理由令到佢哋同你家姐有一樣嘅遭遇啦，反面呢啲咪自己傾返掂佢囉，都幾吖歲人喇，喺時候解決呢啲問題。」

「都係嘅，不過如果係噉嘅話，我應該成個禮拜唔喺香港，你ok 㗎可？」

「ok，屋企人要緊」不過我對佢私事淨係知道噉多，反正自己都冇咩提到自己啲私人嘢。

「係喎？你知唔知有呢舊嘢啫係可以點做呀？」



「哦，啫係佢個system crash 咗，可能你閂咗個application 先，等多一陣，如果唔係嘅話就restart 啦」而家睇返，先發覺自己同嗰啲觀音兵一樣義不容辭噉解答娘娘嘅問題。

不過，我冇心追佢，正常嘅娘娘派軍糧都唔會係扑嘢咁高級啦。