我中出咗副校: 92. 自由

佢拉埋窗簾，好似真係要開始噉。

「唔係，我只係想自由。」啫係搏畀人炒？噉又係，佢可能唔夠膽自炒。

「其實你唔使錄音㗎喇，我跟住落嚟講嘅嘢唔關工作事。」佢噉都知，莫非係我技術唔夠熟練？

「我都唔明白，我只係想追求愛情嘅快感，未想穩定落嚟，畀一段關係綁住有咩問題……」

「點解個個都當我係雞喎，係我同個社會追求嘅嘢唔同啫……」



「我都係支持性解放啫，鍾意嗰種自由啫，又唔係得罪你哋啲咩，點解個個都要用有色眼鏡望住我？我知你之前喺韓國見到我㗎，我大概都估到你點諗……」聽到呢度，我已經諗唔到點樣回應佢，只可以由得佢繼續講。

「最好笑嘅係，呢種嘢竟然成爲咗我嘅把柄，如果繼續嘅話，就會冇咗份工。結果，而家咪要畀人控制住嗮，一世都離唔開呢間學校囉。」

「真係諷刺，明明係追求自由，點知因爲呢個目標，加埋錢，就活活成爲咗人哋嘅奴隸。」

「你講得啱，我真係糟質緊自己，明明我唔想同某啲人扑嘢，都要因爲工作或者唔同嘅原因而格硬嚟。」

「我真係好攰好攰，但係有住呢啲黑材料，我想辭職都唔得，所以只可以借你哋過橋，真係唔好意思喇。」佢收起啱啱嗰副感性嘅表情，轉爲佢一直以嚟，嗰個禮貌嘅笑容。



「我連橋都諗好㗎喇，因爲佢哋有人喺下面捕住，你一陣間扮嬲爆爆噉行出去就得，我會自己同佢哋解釋。」佢淡然噉講。

「明白，多謝你噉坦白呀。有咩困難嘅話你都可以同我講㗎喎，幫到嘅我盡幫。」

「多謝你至真，你應該係我工作上見過最好嘅男人。」

「邊係吖。唔知你介唔介意我噉問，但嗰日你飲醉酒，同男朋友散咗係咪已經係引我落搭嘅一部份？」如果係噉，我唔覺得佢會似係個搵啲噉嘅男朋友嘅人。

「唔係呀，嗰個係真㗎，嗰個變態仲要係校董介紹嘅，都係嗰啲政治操作嚟嘅啫。」



「哦。但而家先係年頭咋喎，你而家係噉得罪佢哋實冇好運行㗎喎！使唔使幫手呀？」

「唔使啦，佢唔即炒我，基本上都冇咩問題嘅，你唔使擔心嘅。我又唔係真係好等錢使，有咩冬瓜豆腐都應該唔會太嚴重嘅。」

「係喎，都差唔多夠鐘喇，你快啲落去啦，記住要扮嬲呀。仲有，過咗今日之後，你都係遠離我好啲喇，儘量都唔好見喇。」佢又表現嗰個招牌嘅溫婉笑容。

「再見。」佢……竟然……