我中出咗副校: 50. 中同 （唔係中出）

嚟到一間幾有復古風味嘅酒吧到，我已經見到裏面有好多睇落有啲熟嘅人。

「Hi, 你係咪嚟杏壇中學97年 5E 嘅舊生聚會㗎？」一個睇落好熟樣嘅熟女講。

「係呀，我係劉文榮。」Richard 啲咁嘅懶型嘅名係我讀U 先改嘅。

「哦！流氓！好耐冇見喇喎！我係呀欣呀！你幾唔記得我呀？」佢頓時變得更加熱情，可能係因爲當時佢成日同班女同學過嚟睇我哋踢波啩。

「當然記得啦，咁我班波友今日有無嚟呀？仲有呀雯呢？」去啲十年都唔去一次嘅中同聚會嘅目的當然係搵人啦。



「呀雯好似自從佢去外國之後就一直都冇消息喇，我以爲你會清楚啲添！至於呀輝，呀健同呀偉佢哋三個都有嚟呀！就喺嗰邊咋嘛！」佢指住三個麻甩佬講。

睇嚟唔單只得我搵唔到佢，而係佢根本就冇再聯絡其他人。

算喇，搵返青春時期嘅波友阿叔我都心足㗎喇。

「Hello, 我係呀榮呀，認唔認得我呀？」我拘謹咁走去同呢班曾經熟絡但係已經冇乜聯絡嘅朋友。

「喂！大佬！好耐冇見喇喎！過嚟坐呀！」估唔到咁多年之後，佢哋仲記得我係佢哋大佬喎。



只不過，當年風魔萬千少女嘅足球四大天王，宜家搖身一變已經做咗四個中佬。

「華dee」呀輝宜家只係一個留咗鬚，歷經滄桑嘅阿叔，「黎明」呀健呢就叫做冇乜點變，只不過佢嘅潮流觸覺好似仲停留喺九十年代咁着住件牛仔褸，都唔知話佢潮好定係老土好，至於「學友」呀偉就着住恤衫，加副眼鏡，灰白嘅頭髮，十足一個專業人士咁款。

「喂！你哋宜家撈成點呀？我都係普通打份office 工，做下嗰啲濕鳩呀ger 咋。」呀輝問。

「冇，宜家喺政府到撈engine， 都等緊退休㗎喇。呀偉一睇就知發咗達啦！」呀健話。

「邊有喎，不過搞緊啲生意仔啫，普通啦。咁大佬呢，之前佢去咗第二間讀就冇嗮聲氣喇喎！」呀偉講。



見佢哋宜家都咁成功，我都真係有啲唔好意思話自己係一個雖然人工唔差，但撈到宜家仲未攞到長約，仲要比老細騎住嘅小人物。

「哦！我去咗讀IT, 宜家喺中學教緊書呀。」教書人工高，應該聽落唔會咁輸蝕啫。

「竟然？你去教書同教壞細路有咩分別呀！」佢哋個個都笑到趴街。

咁又係嘅，昔日嘅爛仔做當差嗰啲呀sir 嘅機率應該大過做學校嗰啲呀sir 好多，大家難免覺得有啲違和。

「趙！你哋幾條友認我做大佬，咪都係爛仔一個？宜家咪都係做嗮專業人士！睇吓呀健咁樣，着到咁潮，鬼估到佢撈政府咩！」當年嘅四大天王，又唔讀書，又食煙飲酒，成撚日都會比訓導捉去鬧，掙在冇入黑社會㗎咋，鬼會估到四條友宜家都叫做成功人士呀？

有啲嘢，過咗去就係過咗去，冇得返轉頭㗎喇。

「喂唔係喇喎，呢到有啲焗呀，我都係出去條街到呼吸下新鮮空氣先！你哋跟唔跟呀？」呀偉一手拎起西褲袋入面嘅打火機，就企咗出嚟。

「我跟我跟！」呀健講。



「唔喇，老婆逼我戒煙呀。流氓呢？」睇落最頹嘅呀輝竟然咁講。

「我唔食煙㗎。」過咗中五之後，我都冇再食煙喇。嗰時要慳翻啲錢讀大學吖嘛。

「吓？你以前chur 煙chur 得最勁㗎喎！戒咗煙呀？」佢哋幾個都好驚訝咁望住我。

「冇話特別點戒煙嘅，不過過咗中五之後就冇再食喇，嗰度啲老師好麻煩。」唔通話自己冇錢食煙咩。

「搞錯呀，大佬你真係對唔住流氓呢個名囉好冇？對住啲煩到嘔嘅老師梗係鍾佢一拳，再祝佢冚家富貴㗎嘛！呢句唔係你講嘅咩？」

「冇啦，冇咗你哋班兄弟，搞鳩個老師都冇意思喇。」我喺度苦笑。

唉，真係好掛住以前同佢哋一齊吹水踢波嘅日子，想做乜就做乜，唔使對社會妥協嘅時光。



「唔緊要啦，我同呀輝睇住個位啦。」我道。