我中出咗副校: 32. 紅眼睛 幽幽的看着這孤城
「熱情就算 熄滅了
分手這一晚也重要
甜言蜜語 謊話嬉笑
多給我一點 不要缺少」
「喂！雯雯！點解你咁鍾意聽呢首歌嘅？聽落首歌講分手㗎喎？」我地兩個坐喺靜謐嘅觀塘海旁，兩個聽住耳筒嘅其中一端，而耳筒連接住嘅係雯雯嘅 discman.
記得嗰時，discman 都仲算係一件潮物，點知98年，mp3 機已經面咗世喇，我哋呢啲discman 用家就好似夾喺walkman 同mp3 機兩個中間，啱啱先穩定落嚟就要經歷住改朝換代。
「咩呀！你唔好聽到分手呢個字就咁敏感先啦！呢首歌嘅歌詞係講個女仔同男仔分別嘅最後一晚，要珍惜僅餘嘅時光呀！傻瓜！」佢大大力拍我個頭，就好似責怪緊我咁。
「咁我中文唔好呀嘛！點理解到啫！」諗返轉頭，倒不如話我嗰時未大個，聽唔明大人嘅情歌啫。
「關咩事啫！小學生都聽得明啦！」
「車！咁係你讀文科先識呢啲咋嘛！你咪夠係唔識啲小學生數學，要過嚟問我！」點解我嗰時咁蠢，可以完全聽唔明雯雯嘅弦外之音。
「不過分別呢啲都係好表面嘅啫，我聽電台節目話呢呢首歌可以解到去97回歸㗎！咁講都合理呀，唔係嘅話點解女主角咁鍾意男主角都要分手呀！」
對於嗰時嘅17歲少年，主權移交嘅意義只係冇咗雯雯咁解，只不過我冇諗過冇咗雯雯唔係話用啲咩msn 就可以彌補翻，因爲冇咗就係冇咗，正如主權移交一樣，已經無法再逆轉。
「是但啦！我理得佢嘅深層意義係咩呀，總之我剩係知道我宜家要嘴你！」出呢首歌嘅時候已經係四月，而雯雯六月就會走，唔珍惜好好僅餘嘅時間嘅話，我真係會後悔。
「話題盡了 也不緊要
吻我至淒冷的深宵
繁華鬧市 燈光普照
然而共你 已再沒破曉」
兩個少男少女喺呢個冷清嘅海旁到濕吻半晌，有如世間都因爲佢哋而停止運轉一樣，只不過時間仍然係默默地流逝，天色漸暗，街燈都逐一亮起，爲呢對小情人作見證。
「紅眼睛 幽幽的看著這孤城
如同苦笑 擠出的高興
全城為我 花光狠勁
浮華盛世 作分手佈景
傳說中 癡心的眼淚會傾城
霓虹熄了 世界漸冷清
煙花會謝 笙歌會停
顯得這故事尾聲 更動聽」
呢一日，平時羞澀嘅雯雯都主動起嚟，更加進取地吸啜住我嘴脣，對岸嘅商業大廈亦都逐漸變得明亮，回到嗰時仍然繁華，仍然發達嘅香港風貌。我隱約睇到雯雯呢個時候嘅眼眶已經有啲紅。
「紅眼睛 幽幽的看著這孤城
如同苦笑 擠出的高興
瓊樓玉宇 倒了陣形
來營造這絕世的風景
傳說中 癡心的眼淚會傾城
霓虹熄了 世界漸冷清
煙花會謝 笙歌會停
顯得這故事尾聲 更動聽」
「我唔想返屋企。」佢講咗一句，就猴擒地揸住我個頭嚟錫，連我都俾佢嘅主動而嚇怕。
佢平時唔係話六點就要返屋企嘅咩？宜家七點都嚟喇！
但係，喺呢一刻，呢個無知嘅青年都明白到雯雯嘅用意。點解我地拍咗拖短短一年就要因爲環境而分開？
點解呢兩個明明仲有大把時間，大把青春嘅後生仔女會唔夠時間用？
翻到嚟現實，作詞人嘅原稿話咗比世人聽呢首歌係真係講回歸㗎。只可惜，佢最尾都係被迫要改個第二個版本，就好似冇得將歷史記錄落嚟一樣。
我嚟到熟悉嘅巴士站，準備落車，只不過目的地唔係學校，而係酒店。