我中出咗副校: 26. 休息期

因爲Chloe係比我教化嘅關係，佢都冇收我錢，所以尋日嗰三千蚊依然完好無缺咁喺我個銀包到。如果佢唔係我學生嘅話，我一定喺度怨緊點解冇得扑佢㗎喇，只不過作爲一個仆街，我都又翻少少良心嘅。

講真嗰句，我袋咗副校嗰三千蚊，同收錢嘅ptgf又有咩分別呀？只不過，佢接少一單生意唔會死，我拒絕副校嘅話，就份工，錢同聲譽都冇嗮咁解囉。點解個天要逼我呀？

見到嗰啲ptgf 做嘢都係爲咗搵個好碼頭之後，我都係唔試新野，玩翻sp 好過喇，戀愛呢啲嘢真係唔係畀錢就可以填補到嘅。

一諗起每個禮拜都要應付副校，我就真係想死喇，仲有咩心情玩sp 呀！

就係我就嚟翻到觀塘嘅屋企嗰陣，車窗隔離閃過一架去緊秀茂坪嘅巴士。係喎！呢排身邊咁多女，偏偏就唔記得咗老母添！都係時候探下佢喇！



「喂？媽子呀？我上嚟食飯得唔得呀？」

「點會唔得啫！你幾點到呀？」

「過多半個鐘，啫係七點半！」

「好啦！拜拜！」

喺落車轉巴士之前，我去咗ATM撳多咗六千蚊，諗住連埋嗰三千蚊一齊俾佢當家用。既然跟住副校又咁多着數，進貢多啲被母親大人都唔係壞事啫。



「仔！你嚟嗱！」明明得我哋兩個人食，佢都可以煮成五餸一湯，使唔使咁誇張呀？

「咁多嘢食嘅？我哋兩個食唔嗮㗎喎！」

「有啲係尋日剩落㗎！食唔嗮可以再留嘅啫！你拜埋你老豆就食飯啦！」啲餸睇落去熱騰騰，賣相亦都好好，應該都唔係隔夜餸嚟㗎喇。我燒咗幾支香俾老豆就坐低食飯。

「你今日咁得閒上嚟嘅？之前你唔係話好忙嘅咩？」

「係呀！呢排忙完咪上嚟食飯囉！我都好耐冇過嚟喇！」屈指一算，原來呢個不孝子都成三個月冇搵老母喇。



「本身仲以爲你咁錯蕩上嚟係介紹新女朋友添，點知又係得你一個。」佢嘴喵喵咁望住我，好似係俾說話我聽咁。

「幾時帶個女朋友仔上嚟呀？對上一次見到已經係五定六年前喇喎！你知唔知呀？隔離左右啲仔女全部結嗮婚生埋仔㗎喇！我仲等緊杯新抱茶㗎！」唉，次次上去都俾人逼婚㗎！

「冇喇！做嘢太忙呀！遲啲先啦！」如果六年前我唔係知自己帶咗綠帽，可能我宜家都結咗婚生埋仔喇。

「唉！仔！你都唔細㗎喇，呢啲嘢唔拖得㗎！」佢永遠都係苦口婆心咁講。

「得喇！總之唔好再幫我相睇喇！個個都甩皮甩骨咁！」我冇貶低佢哋，只不過啲女個個真係甩皮甩骨，唔係個樣毒就係啲性格西到完全相處唔到囉！

「唔好咁高要求啦！你又唔後生，係咁㗎喇！」搞錯呀，連老母都要踐踏我僅餘嘅自尊心。

話咁快，檯面上嘅餸都已經清咗一半有多，話嗮我都好耐冇食過家常飯喇。我都想有條女可以煮得出咁好食嘅飯呀！

「我打包呢碟啦！唔好成日食隔夜嘢呀！」我執嗮啲碟入廚房，求其攞咗個膠外賣盒裝住僅餘嘅麻婆豆腐。



「喂！仔！俾呢支嘢你呀！ 你老豆以前都有用㗎！沖涼嗰陣搽喺個頭到呢，啲頭髮先會生得好㗎！攞去用啦！」媽子點解要二次傷害人喎。邊叫你老公遺傳啲地中海基因嚟啫！

「得喇得喇。仲有，呢到係今個月嘅家用呀。好好袋住呀！」我喺銀包攞咗嗰九千蚊出嚟，好快咁塞咗俾佢。或者將嗰三千蚊俾咗人，自己會好受啲啩！

「你今個月唔係用銀行過咗數比我喇咩？做咩俾多次呀？」佢推走我攞住錢嗰隻手。係喎！我都唔記得咗添！

「唔緊要啦！呢到當係下個月咪得囉！尋日賭波贏多咗㗎！」自從七年前我個ex 鬧我賭波之後，我都冇再掂呢範喇。

「你賭波嘅咩？因住輸嗮成副身家呀！儲錢好過啦！」佢用翻以前吟我老豆個語調講。

「唔講喇！宜家都夜喇，我返去先。你早啲休息喇拜拜！」我拉開鐵閘，費時同佢爲咗一個大話而糾纏。