故事一：殭屍之城: 七：第一天上學－新家人編

事前我已經教咗芊雪一啲小學嘅知識，可能因為有殭屍嘅能力，佢學得好快，所以大概會成為資優生，但我擔心嘅唔係呢樣......

今日我同學校請假，去睇佢喺學校嘅情況。

［隱身符］
老師：「各位，我哋今日有位新同學～你介紹吓自己吖～」芊雪：「各位同學，大家好，我叫魏芊雪，今年10歲，我嘅興趣係運動，屋企得一個哥哥」

老師：「要同大家做朋友吖～你坐嗰個位啦～」芊雪：「嗯～」佢坐咗係個女仔隔離。

直到小息都仲好正常。一個男仔拎張紙揸成一個波揼佢：「喂～」





你係咪想冇命啊！

芊雪：「哥哥話唔可以打交...」佢忍緊... 佢隔離個女仔：「行開啦你！做咩蝦人呀！」個男仔：「車～同佢打招呼啫～」

隔離個女仔：「打招呼咁打嘅咩！正一衰人！」芊雪：「算啦～」個男仔行開：「都唔好玩嘅」隔離個女仔：「我叫BoBo呀～我哋做個朋友吖～」芊雪：「好吖～」

好彩...

上晝一切都好正常，Lunch我同佢訂咗學校飯盒。 芊雪：「好好食吖～好食過杯麵」BoBo：「你成日食杯麵㗎？杯麵好唔健康㗎」





最緊要醫肚啫～今朝嗰個男仔想叉落芊雪個飯盒上面個雞髀走。

𡃁仔係咪想學做人！

芊雪：「哦？」BoBo：「老師，鄧世強又蝦人呀」老師：「鄧世強出嚟」BoBo做得好！

之後係視藝堂，畫下畫啫應該冇事嘅
老師：「大家有冇帶素描筆吖～」大家：「有～」芊雪耷低頭...好，我明白。［拎出素描筆筆盒放喺佢書包、再推跌個書包］





芊雪執起個書包嘅時候，發現咗個筆盒：「點解會有個筆盒嘅？唔通係尋日哥哥放嘅？」

好彩我係讀設計，呢啲嘢長期喺書包。
.
.
.
［屋企］
「第一日返學點呀？」芊雪：「好開心呀～仲識咗個好朋友～」「咁咪好囉～」芊雪拎出一張通告：「係啦哥哥，我想報興趣班呀」「哦～我睇下～」

乜而家小學啲興趣班咁多嘅咩？？「你想報咩？」芊雪：「跳舞～」「跳舞～我睇吓先」

我hi你個hi hi！學費咁貴嘅！？「有啲貴喎...」芊雪搖我隻手：「哥哥...」冇辦法啦......「好啦，要俾心機學㗎」芊雪：「係～」

［whatsapp－蔣倩瑜］
蔣倩瑜：「你今日無返，抽籤同我同一組做project」






理性上我知道同佢同一組會引嚟好多麻煩，但唔知點解我有啲喜悅......

芊雪：「我哋今晚又係食杯麵呀？」「係呀」 芊雪有啲唔情願：「唔...」

「聽日先帶你出去食啦，今日食住呢啲先～」 食完之後，芊雪入房做功課。

我繼續攤係沙發開PS3玩魔物獵人，反正聽日星期六，夜啲瞓都冇所謂。

待續