故事一：殭屍之城: 四：月圓之夜－獵殭編

倩瑜：「真係吖，咁個燈籠點算呀」「你咪拎去玩囉」倩瑜：「但係」個燈籠中間係要點火發光嗰種。

我去搵隔離個阿叔「唔該，可唔可以借個火機俾我呀？」 阿叔：「哥哥仔食煙呀？」我指住倩瑜手上嘅燈籠

阿叔：「原來幫女朋友點燈籠，好啦，拎去啦」突然唔想同你借。但算啦，你冇誤會我係佢隻兵已經好好。

倩瑜：「好靚呀～」「你鍾意？」倩瑜：「嗯～」又想扮純情呃我落搭做兵！？唔洗指意！！！！！不過我又有真係啲緊張...心跳加速嘅感覺......

前方傳嚟：「啊！」係三個殭屍！嗰個人就快被咬啦！





［拎出褲袋嘅木筆變成桃木太刀］奔過去。跳起劈落嚟，但冇劈中，係一隻毛殭同兩隻綠殭。

我係咁劈，佢哋就係咁跳走，佢開始分散...弊啦！人群啊！

［拔刀斬］跣去前面劈一刀，唔中、跣返返去後面，背向佢、將刀放喺腰間，喺正佢靠近我嘅時候，拔刀斬向佢條腰間。［隻綠殭火化成灰］。

嗰兩隻已經好靠近人群，我跑過去...［突刺］刀柄放喺心口，刀鋒水平指向前、一衝過去，刀穿過另一隻綠殭［火化成灰］

個毛殭已經去到人群，群眾嘅奔跑造成混亂，家雯跌低咗， 毛殭想跳向家雯，倩瑜：「家雯！」





左手手錶對住毛殭［撳掣］手錶射出墨斗線，墨斗線拖住咗佢嘅行動。但我已經冇咩氣啦......

畢竟我的招式全部都係喺魔物獵人度學嘅，唔太識得調節運動嘅呼吸......

毛殭比綠殭強，我以前亦只係打過一次，而且係苦戰，今晚月圓就更加強啦......

打橫左斬丶右斬丶一個轉身全力斬。一般斬只係可以斬出一條痕，全力斬亦只係傷痕比較深啲，但我就冇咗好多體力！

出絕招！［手指公撳落刀柄嘅指紋位］刀柄流出血，透過刀身上面符文嘅凹位流滿全部符文位，成把刀發出紅色嘅光。





呢一招會用到我嘅血，所以一般唔係特別情況都唔用。

左橫斬「啊！」隻毛殭向我跳過嚟，對方手臂一收丶再向我伸出。

［跳後＋由右上劈落左下］再一個前刺穿過咗佢［毛殭火化成灰］太刀回復原狀、變返支筆。

倩瑜：「多...多謝你救咗我哋，好彩有你」

家雯嚇到喊，倩瑜抱起家雯安撫佢：「冇事啦～冇事啦～」個畫面好有愛...「行啦」倩瑜：「去邊呀？」「家雯呀～哥哥帶你去食雪糕～」

家雯：「嗯～」

［M記]
「朱古力新地 三個 thx。吖，其中一個走花生」倩瑜：「你唔食得花生㗎？」「我其實只係唔鍾意食」





倩瑜：「家雯仲驚緊？」家雯：「唔驚！有哥哥，有哥哥、唔驚！」唔？家雯：「哥哥會保護我」倩瑜：「咁哥哥唔係度呢？」

我起身，家雯：「哥哥唔好走！」「等我一陣，好快返」五分鐘之後返嚟，拎出一個小火龍公仔「嗱，送俾你～哥哥唔係度嗰陣佢會保護你㗎～」

家雯：「嗯～」倩瑜係我耳邊講：「你喺邊度整返嚟㗎～」「文具舖隔離個夾公仔機」

待續