今日我開始左對公司啲同事進行復仇大計: 第二十五節

「咁多人迫埋一齊，走失好出奇咩，你黑口黑面都無用架。」喺維園年宵，我本身諗住同Daisy兩個人行，但唔知點解Evans同Miki都有黎，又唔知點解行行下變左我同Miki，Evans同Daisy咁分開左行，行左陣我仲要唔見左Daisy同Evans。我身旁嘅Miki因為咁黑晒面，而且好焦慮地不斷打電話畀Daisy想搵返佢地。而我則喺隔離闊佬懶理，仲有心情四周張望觀察下果啲擺檔嘅中學女學生。由於喺年宵度有咁多人，Miki打極都打唔到畀Daisy佢地，見到咁，我忍唔住繼續講：「你咁緊張做咩姐，唔通你真係鍾意Evans？你有無理過我同阿油嘅感受架，枉我對你痴心一片，你就當我痴鳩……」「收聲啦你，我而家唔想聽到你把聲呀。」Miki講完之後就繼續打電話，而喺一邊嘅我就笑得好開懷，見到Miki小有咁焦躁不安真係令我心曠神怡。但其實另一方面，Daisy同Evans行開左其實都令我心入面有小小異樣，不過我唔可以喺Miki面前示弱，Miki表現得越焦躁不安，我就要表現得越開心。喺行左一行檔鋪之後，我地都未可以同返Evans Daisy佢地會合，Miki有見及此佢拉左我去一邊坐低等佢地。「新年我可唔可以去你屋企拜年呀Miki，你知啦幾日見唔到你我會好掛住你架嘛。」「你可唔可以收聲呀，你好煩呀。」「唔係喎，不如你去拜年果陣我扮係你男朋友呀，到時你咪唔洗畀親戚問長問短囉。我啲戲幾好架，為左迫真，要我同你喺啲姨媽姑姐面前法式濕吻呀，摷埋我都唔介意架。」佢都係唔理我，我繼續講：「Miki呀，十二年後如果我地已經結左婚兒女成群，不如我地到時一家投返檔年宵黎做呀，我名都諗好架啦，就叫蛇鼠一窩啦。」「其實你而家都係擔心緊Daisy，只不過你又要扮晒嘢，不斷同我講埋啲無聊嘢想分散自己嘅注意力姐。」我唔敢講話Miki係一語道破左我，不過佢講嘅嘢某程度上都算係合理……過左一陣，我地終於搵到Daisy同Evans，佢兩個買左好多嘢，睇黎頭先佢地行得好開心，完全忘記左我同Miki。

 

行完年宵，Evans提議佢車晒我地返屋企，不過我話自己想周圍行多陣而拒絕左佢。喺臨分開前，Daisy塞左啲嘢畀我，我一睇原來係個Q版蛇造型嘅鎖匙扣，雖然我唔知呢個鎖匙扣有咩特別意思，不過知道佢頭先原來都唔係完全忘記左我嘅存在，我都不禁心頭一暖。而喺同佢地分別之後，我自己一路喺銅鑼灣行去北角散步。突然，一個熟悉嘅身影喺我面前出現，呢個人就係阿油。唔洗問，呢條變態毒男頭先肯定一路吊住我地尾啦。佢行埋黎質問我：「點解你要畀佢地上阿Evans架車，你知唔知咁樣好危險架，一陣Evans唔知車左佢地去邊點算呀。」「咁你即刻上的士跟住佢架車呀嘛，你黎搵我把鬼咩。」「我唔同你講呢筆住，我問你，點解你地行年宵都唔叫埋我？」「唔好迫我講到咁白啦好唔好？點解無人叫你行年宵呢樣嘢你年年都要經歷一次架啦，由中學到而家你都仲要問……」阿油聽到我嘅答案之後無再追問落去，佢只係好悲傷咁仰望長空，深深咁嘆一口氣。學阿鍾仔講句，佢此時此刻，真係無語問蒼天。由於唔想就過年都要同呢個毒男糾纏，我無再理佢就走左。呢個時候我諗起而家一定坐立不安嘅Judy，所以我whatsapp佢：「Judy姐呀，我知年年農曆年對你都係折磨，次次畀啲親戚問你肯結婚字你一定好難受架啦。不過唔緊要，今年你有第二樣嘢擔心啦，你快啲諗下你可以點樣顯出自己嘅誠意畀我睇，等我可以早日諗到點樣處理我手頭上嘅嘢啦，你知啦，有無差池，你喺呢行唔洗再立足架啦。」隔左一陣，佢回我：「我求下你放過我啦，我最多唔同你爭阿Kate個位呀，你唔好亂黎呀。」我決定唔回佢住，等佢驚埋個新年先再慢慢同佢玩。