今日我開始左對公司啲同事進行復仇大計: 第二十四節
由於今日係年廿八，實際返工時間唔係太多，我決定喺臨放假前送份大禮畀Judy。由一開始進行我復仇大計開始，我已經將Judy視為我嘅頭號敵人。佢雖然係一名不折不扣嘅典型港女，又貪慕虛榮又好勝而且妒忌心又重；但另一方面佢既世故又冷靜而且目標清晰，令佢每次喺遇事之際都可以處變不驚，就算情緒偶爾有好大波動，佢都可以好快平復返心情。作為佢上司，你會好驚畀佢篡位；作為佢下屬，你會恐怕自己有日會無形中得罪左佢；作為佢朋友，你要成日留意自己有無咩得意事令佢心生妒忌。而我作為佢敵人，我對住佢經常都係老鼠拉龜，無從入手。不過阿油憑住交畀我嘅武器，我相信我今次必可重創Judy。
為左準備今日嘅行動，我尋晚徹夜無眠，雖然天寒地涷再加上睡魔不斷來犯，但由於想喺蛇年黎到之前送份大禮畀Judy，所以再辛苦都係值得。我預計今日下晝兩三點就會放工，呢個行動可以話係分秒必爭。再加上我要專心對付Judy，所以我決定唔同Daisy佢地幾個食早餐，當我喺返工途中whatsapp通知Daisy時佢雖然有啲失望，不過好快佢就將個話題轉左去行年宵，佢仲乘機叫我聽晚一齊去行維園年宵，雖然我真係好怕自己會喺呢一刻對Daisy泥足深陷，不過我又不忍拒絕佢，所以我都唯有應承佢。本身專心備戰緊嘅我畀呢件事搞到有啲心神恍惚，不過由於今日呢一擊我不容有失，所以我又大大力兜巴星自己令自己清醒，雖然喺地鐵上兜巴星自己係有啲異相，不過我呢個行為除左可以令自己清醒之外，但仲因為我前面本身坐緊喺度個OL見狀即刻起身行去第二卡，令我有個位坐下，都算係一舉兩得呀。
尋晚我一夜無眠，將左係要將Judy嘅罪證入落我嘅小器系列之外，我仲另外將所以罪證抄左落兩本簿上面。第一本簿我故意將罪證入面牽涉嘅人物用化名表示，但第二本簿我就係用返真名。喺返到公司大約過左一個鐘，我借故話有工作上嘅嘢要交畀Judy所以行左去佢個位度。我拎住一大疊文件同果本寫左真名嘅罪證去佢個位度。為左分散Judy嘅注意力，我一見到Judy就問佢：「Judy，其實你而家去拜年仲會唔會收利是架？啲細蚊仔問你攞你又會唔會畀架？雖然話你仲雲英未嫁，不過幾十歲人仲問人攞利是真係需要啲勇氣架…」佢強忍住佢嘅怒火打發我：「你放低左啲文件就走啦，唔好阻住我做嘢。」聞言之後我就將疊文件，連埋果本罪證簿放左喺佢枱面。我好有信心Judy一定會按捺不住佢嘅好奇心打開本簿黎睇，原因我專登用返平時用黎做小器簿嘅硬皮記事簿黎做呢本罪證，Judy一定會誤以為係小器簿而偷偷地拎黎睇。我一直匿喺暗角留意Judy會喺幾時見到本簿，過過左半個鐘之後，Judy終於發現到本簿，喺佢偷偷地打開黎望幾頁之後，佢面色一變。佢即刻環顧四周搜索我嘅蹤影，不過我有心匿埋伏佢佢又點可能搵到我呀，佢見我唔喺視線範圍之內，就即刻將本簿收喺自己個袋度。
過左一陣，我突然行出公司中間，聲稱自己唔見左本記事簿。當時大家都唔係好理我，除左一面神色慌張嘅Judy。Evans問我本簿入面係咪有啲咩重要野，我答佢：「好重要，重要到我另外手抄左個副本出黎，唔信我畀大家睇下。」正當我返埋位拎本所謂副本出黎果陣，Judy好慌張咁衝左埋黎，一手搶左我手頭上果本副本。佢話：「等我睇下係咪緊要到令你要阻住大家上班時間。」之後佢就飛快地將手上本記事簿飛快咁去睇一次，當佢發現呢本簿上面全部都係用假名，佢萬分驚訝。阿油呀Evans佢地之後都拎左本簿去睇，當阿油見到本簿上面係用左假名，佢都非常錯愕。喺呢個時候我同佢地講：「無呀其實本簿上面係我嘅劇本嘅一部份，我準備拎呢個劇本去我樓下嘅街坊福利會搵埋班街坊一齊演呢套劇姐。」當其他人聽到本唔見左嘅記事簿係咁無聊嘅嘢之後，佢地無再理我，除左Judy同阿油之外，佢地望住我一臉大惑不解。
阿油拉住我去後樓梯度質面我究竟搞緊乜，我答佢：「你交得畀我就唔好問咁多，你都係專心諗住Miki去劣你條賓周仔啦。不過喺拜年果陣你記住洗左手先問長輩攞利是呀，唔好到時隻手又腥又臭嚇親人呀。」講完之後我就無理佢行返入公司。到左下晝一兩點果陣，全公司嘅人都準備放工。我故意慢條斯理咁執嘢，其他人陸逐走晒，而Judy見我唔走，佢當然都留返喺度唔走啦。到其他人全部走晒之際，Judy行埋黎問我：「你想點？」「我想世界和平，人人安居樂業，同你早日嫁得出。你呢，你又有咩新年願望呀？」Judy聽到我敷衍佢之後怒不可遏，佢大力拍枱問我：「我問多你一次，你想點呀？」我先用淫邪嘅眼光由上至下掃晒佢全身，之後再答佢「如果我話我想你而家喺度跳脫夜舞畀我睇，你係咪都會答應？」Judy聽到之後即刻退後左兩步，而且佢面色慌張。我繼續講：「不過你放心，我本身無煲開老藕，而且又唔鍾意淘古井，我對你無乜興趣。至於我想點，我自己都未知呀。不如你諗下你有咩方法可以表示誠意，令我早日可以知我自己想點對你啦，唔洗急呀，有成個新年假畀你諗呀。」Judy聞言之後，呆左喺度連反擊都唔識。我相信成個新年假，Judy都唔會過得安樂，睇住Judy呢副又驚又慌嘅樣子我心入面有種說不出嘅快感。