今日我開始左對公司啲同事進行復仇大計: 第八十五節
當年大學畢業，我好好彩，我幾乎無經過過搵工階段，就直接有嘢做。所以我幾乎係未試過失業，所以我今日一起身，都覺得有啲唔習慣，無嘢做咪即係無糧出？雖然我手頭上係有筆Sam姐畀我嘅錢，但我硬係覺得欠缺實感。我望一望我部電話，我發覺尋晚Miki幫我send出個message之後，Evans就好似癲左咁不斷打畀我同whatsapp我，唉，仲煩過啲女呀。不過一諗起女，我就諗起尋晚表面上好似應承左會幫我嘅Miki，我突然覺得有啲心甜，所以又忍唔住打畀佢想搵佢。點知打左十幾二十次，佢個電話都係唔通。不過我都仲係覺得佢應該係電話無電，又仲訓緊所以先打唔通姐。我一行出廳，發覺間屋空無一人，係喎，今日仲係平日，我個妹應該返緊工，屋企剩返我都係好正常。我望一望個鐘，搞左咁耐都仲係十一點幾，食早餐又嫌遲，去食晏又嫌太早，原來失業嘅時間，係過得咁慢。由於太過百無了賴，我又未有動力去計劃我嘅推廣小器簿大計，所以我決定搵一個比我更加得閒嘅人去打發時間。果個人唔洗講，就係果件有錢阿叔莊神。但佢竟然學人擺款，我不論打畀佢秘書，打畀Robin甚至打去佢最憎人打畀佢嘅直線電話，都搵佢唔到。我嬲嬲地決定直接踩上佢觀塘果個爛鬼單位度搵佢，不過我一上到去，就剩得阿秀一個人喺度埋頭睇書，而阿秀睇緊本書，就叫李天命的乜乜乜乜，後面果幾隻字我無用心睇，因為一見到係李天命我就知應該係啲風水野呀流年運程呀之類。見狀我就問阿秀：「嘩莊神係咪見而家睇風水有前途，隨時做到大富豪所以叫你睇埋呢啲書呀？你幾時生日呀阿囡，我送個羅更畀你呀，羅更唔洗識睇架，我之前都聽聞有個出名風水師連羅更都拎錯呀……」阿秀擰擰頭話：「James哥，睇風水果個叫楊天命，李天命係哲學家黎，同呢本書唔係莊神叫我睇架，我見等你等得悶，自己拎黎睇咋嘛。」我無視自己搞錯左嘅瘀皮事，直接反問佢：「你等我？你大我咋下，莊神咁醒會算到我今日黎搵佢？」
阿秀點一點頭話：「我今朝一起身，就見到佢吩咐我上黎等你門。佢話自己有啲事會行開下先，晏啲先返黎，叫我招呼住你先喎。」雖然我心底裡有啲佩服莊神又捉到我路，不過我都係口硬地話：「挑，都唔知阿秀你係咪近得果條老嘢多，學埋佢啲衰嘢呀。」阿秀無同我爭論，繼續埋首睇書，呢個小妹妹真係相當好學，睇黎佢他日應該真係會成為大器。我暗地覺得自己都算係做左一件好事，阿秀呢個窮家少女有機會跟到莊神呢啲有錢佬學嘢，機會真係算難得。我喺莊神個公司度來回踱步，一邊喺度諗如果我要自立門戶，好唔好喺莊神個單位附近租個細單位呢？反正呢度工廠區租平，而且我又成日可以走黎莊神呢個豪裝辦公室度打發下時間，話唔定佢仲會良心發現，真係傳授我一啲對做生意有用嘅嘢呢。我決定喺莊神返黎之後，就問下佢喺附近會唔會仲有啲單位可以平租畀我。過左一陣，莊神終於返左黎，佢一見到我就不懷好意地望住我問：「我呢度唔係勞工署喎，你失業唔係應該忙住搵工咩？你係咪諗住我呢度會請人清潔所以上黎應徵呀。」「唔係呀，我諗住去應徵做善終看護員，去照顧啲臨死嘅病人，咪諗住上黎實習下先囉，你話晒都有返咁上下年紀呀，都叫行將就木呀，拎你黎實習就最啱架啦。」佢依然帶住不懷好意嘅笑容望住我，我畀佢望得好唔舒服，原本仲串咀緊嘅我，唔知點解有啲心寒，直覺話畀我知一定係發生左啲嘢，令佢咁期待我將會有咩反應，我望一望佢身後嘅Robin，但Robin刻意迴避我眼神，好似恐防我會喺佢身上搵到啲咩蛛絲馬跡咁，我即時衝前左兩步，質問莊神：「你地頭先去左邊？係咪發生左啲嘢係關我事嘅。」莊神聳一聳肩地反問我：「我點知呀，你連辭職都無事先通知我，我又點會知你啲事呀哈哈。我頭先去左邊，應該同你無乜關係嘅，不過當中都涉及過叫做你識嘅人，我都姑且話畀你知啦。我頭先去左送機呀，你估下我頭先係送邊個機？不過估中無獎呀。」
我心頭立刻涼了一截，因為我已經知道個答案。果個人就係我今朝想搵又一直都打唔通佢電話嘅Miki。但佢明明同我講，佢唔會走架？但事實已經擺在眼前，係我太傻，無諗過佢有講大話嘅可能。之前莊神老婆都告誡過我，我永遠都覺得自己講大話好叻，好識呃人。但我無為意過，大把人比我更精於此道，而一直都表現得比我更聰明，更深謀遠慮嘅Miki，就好明顯係比我更識得講大話，而我亦都畀佢呃到透。佢尋晚嘅出現，根本係想了結佢喺香港最後嘅掛牽，佢怕我會搵左幫佢輔助Evans，會一直留喺公司度一事無成，所以佢諗走都要代我解決左呢個問題。佢知道我一定會出盡法寶黎留佢，所以佢選擇呃我，等我無機會去攔截佢。莊神擺阿秀喺度唔係想招呼我，相反佢係幫Miki分散我嘅注意力，等我將心思放喺等莊神度，而無再搵佢。估唔到我又再一次輸左畀Miki，諗到呢度，我不禁苦笑。我原本以為莊神會恥笑我戇居，笑我一剎那變左雙失，工又無女又無。但唔知係咪佢突然搵返個良心呢，佢臉上個不懷好意嘅笑容消失左，相反佢有啲驚惶咁話：「拿唔係我有心唔畀你搵Miki架，不過係佢要求要我幫手留住你，等佢可以走得安心，你知我一向都欣賞Miki呢個女仔，佢走左我都覺得好可惜，原本我仲打算重用佢。」我不發一言理開左莊神嘅基地，原本雄心壯志，諗住可以喺Miki幫助之下大展拳腳嘅我，一下子跌左落谷底。原來之前我有預感會永遠都見唔到Miki，竟然係真。