今日我開始左對公司啲同事進行復仇大計: 第八十四節

「我絕對唔承認我係一個罪犯，因為嚴格黎講，我並無直接勒索Sam姐。我只係分別透過幫Valarie搵返個阿婆，但幫Sam姐取回被Valarie揸住嘅痛腳，而得到Sam姐嘅酬金。所以我認為我係做緊好事，不過我唔同其他虛偽嘅道德人士，我施恩係望報咁解姐。而且我仲有崇高遠大嘅理想，要將小器簿呢個可以幫到咁多人嘅系統推廣至全球。唔好講其他人，你咪一樣係靠偷我橋去幫Evans上位。」我望住突然出現喺我間房嘅Miki，面不紅氣不喘地向佢解釋我點解突然會多左筆錢。而呢個失蹤左幾日，我以為呢一世都唔會再見返佢嘅女人，好似無事發生咁突然出現喺我屋企。我有過衝動想鬧佢，又或者想呵護下佢，不過喺呢一刻突然見到佢，我心底其實異常激動，我好努力按捺住自己，唔追問落去。良久之後佢同我講：「其實你都知道我已經做完我返香港想做嘅嘢。」我忍唔住大聲答佢：「你唔係好似啲十九電視劇咁，做完呢啲嘢之後就一走了之，去外國批薯仔呀開餐館呀養下牛呀咁？Come on Miki，可唔可以唔好咁老套先。」Miki面帶微笑咁問我：「就算我係去外國又點？關你咩事，你做咩要咁緊張呀，我本身都係喺外國讀書返黎架啦，我其實都唔多鍾意香港嘅生活節奏，我之前留喺香港嘅理由，都係為左Evans咋嘛。而家大功告成，我如果要走又有咩問題。」我口硬住咁話：「即係唔係話我想你留低，不過呢，我覺得你仲咁後生。唔應該搞掂左一件小事，就用呢啲死而無憾，可以收得山嘅態度同我講嘢囉。你睇下我幾咁上進，捧完Evans上位之後，已經立定志向啦。我呢啲年青人真係好值得你呢啲無知女人學習架。」Miki搖搖頭話：「你咪當我嘅志向係想過平靜生活囉，我而家真係諗唔到留喺香港仲有咩意義。」我心底非常焦急，我好想留住佢，但又唔知可以點留住佢，我見佢好似想起身走，我諗都無諗就上前拉住佢，之後好大聲咁講：「我想你留喺度幫我。」

 

佢無畀我嚇親，依舊微笑住咁望我，我口疾疾，面都紅埋咁話：「咁……咁之前我同你多次交手，都覺得你喺女人黎講，都算係一個人才呀。而家我James哥就畀個機會你跟我學嘢，我同你講呀，機會難得呀。你估我咁易畀人同我共事架，我呢啲做大事嘅人好揀擇架。拿你一開始就幫我執下頭執下尾，斟下茶服侍下我先，好過你返到去美國on QQ咁鬼早退休呀。」Miki笑笑口咁話：「睇黎你似係想娶我，多過想我幫你喎。」「你呢啲女人真係呀，一黎就講埋咩娶呀嫁呀果啲，咁鬼恨有人要。不過我好抵得諗架，而家你做住我奴婢，服侍得我高高興興，老爺我咪納你做妾囉。」Miki都忍唔住笑得好大聲話：「你份人都幾奇怪，我從來都無講過我要走，我只係話如果咋嘛，你就已經咁緊張。放心喎，我仲未走住架，我今次上黎係聽聞有人好擔心我，所以先黎睇下果個傻佬咋嘛。原來佢真係傻架喎，我一黎到已經自己幻想左咁多嘢出黎。」我惱羞成怒咁將佢推左落我張床，之後話：「我係傻架，我無自制能力架，你而家自己自投羅網，唔怪得人架。我而家就要你做我嘅人，到時上到庭我都係同個官自辯話你明知我係傻，都要上黎引誘我。」今次到Miki嚇親同面姐，佢推開我之後話：「乜你咁矛架，名份都未畀我就要我做你嘅人。唔玩啦，不過你放心啦，我唔會走住架。如果你真係有心去做你自己想做嘅嘢，我都會支持你嘅。但我同你講呀，唔准三分鐘熱度，你係男人黎架，要有啲志向同目標架。係呢，你係咪打算會離開公司架啦？我諗你都唔會想做電燈膽阻住你嘅前女友同你嘅好朋友架啦。」原本慾火焚身嘅我，聽到Miki突然提起呢個問題，就好似畀人一盤冷水淋落你咁，我頹然地道：「Evans同Daisy就算喺我面前造愛我都唔會care啦，不過我係唔知而家離開Evans嘅話，佢條廢柴會唔會搞唔掂姐，你知你個男神架啦。你啲咁假嘅大話佢都會信以為真，慒到咁，我怕佢好快又會畀Valarie一個反擊收佢皮呀。我係無咩所謂呀，不過你付出左咁多先令佢有今日，我唔想令你心血付之一炬咋。」

 

我嘅答案令雙方都陷入左沉默，我地大家都知道，我而家未係時候走，但我個已經唔喺公司度。我知道Miki呢一刻比我更加矛盾，我信佢係真心想我可以做返自己想做嘅事，但又唔怕佢果個一生中最愛會搞唔掂。所以話Evans呢啲超齡港孩真係好麻煩，都成幾十歲人啦，都好似無自理能力咁。我喺送Miki走嘅時候，不斷喺度暗自思索，我幫佢幫得幾耐呢？或者我係應該及早抽身，等佢自己可以早啲自立唔洗靠人，去到Miki屋企門口之際，佢突然搶左我個電話，拎黎send左個message畀所有同事，大意係話我要辭職。我如果想搶返部電話的話當然可以搶到啦，但唔知點解，我竟然企左喺度，任由佢拎黎send出呢個message，可能我其實都好高興，同好感激佢幫我下呢個決定。既然總有一日要放手，其實早定遲都只係時間問題。