今日我開始左對公司啲同事進行復仇大計: 第七十一節
莊神出左一份功課畀我，佢要我憑一己之力去做一份人類行為觀察報告，而觀眾對象要係公司入面嘅其中一個人，當然我本身已經熟果班就唔算啦。唓，咁咪即係得返果個唔知叫Katy定Kathy嘅物體畀我去揀。但我本身同佢真係無咩交集，就算有都係交惡，我諗左好耐應該從何入手，不過好彩，早兩日喺佢目擊我同Valarie嘈果陣，佢暗示自己有片喺手，雖然我真係無care過佢係咪真係有片喺手，不過我打算用問佢拎返條片嘅名義黎接近同觀察佢。呢件唔知叫Katy定Kathy嘅物體(為免麻煩，下稱阿畸)嘅女人由過年前已經話自己打算辭職，但到而家都仲喺度賴死唔走。佢聲稱係要睇到最後究竟主誰勝誰負先肯走，但我其實懷疑佢根本係搵唔到工先喺度做住先，試諗下一個存在感咁薄弱嘅人，見完工之後五分鐘個interviewer都唔記得左佢係咩樣啦，仲點會請佢喎。Anyway啦，為左完成呢份功課，我唯有抵諗啲去理下呢個空氣人啦。我女朋友Daisy同我講左阿畸佢每朝都會早半個鐘喺公司樓下間老麥食早餐(我又真係無留意過佢)，我覺得呢個係我接近佢嘅好機會，所以我今日仲早多佢個幾鐘去到間老麥守候佢。由於間老麥一朝早有好多學生哥同阿公阿婆喺度食早餐，我一去到連位都搵唔到個，無奈之下我唯有搭枱坐左喺一個學生妹面前。果位天真清純嘅學生妹見我問都唔問坐左落黎有啲愕然，佢好似想開口，但又唔多敢，我望多佢兩眼之後佢就紅都面晒咁埋首食早餐同望住佢疊厚厚嘅notes。由於阿畸佢尚未出現，我喺等佢果陣又悶悶地，我忍唔住撩下個學生妹講嘢，我問佢：「小妹妹，讀書辛唔辛苦呀？」佢估唔到我會撩佢講嘢，佢面紅紅咁呆左好耐，之後用蚊咁細聲咁答我：「小小辛苦啦。」「雖然讀書好辛苦，不過你都要努力讀書呀，我有個朋友細個唔努力讀書，佢大個左之後畀度自動門夾死左呀。」「下咁關唔努力讀書咩事呀？」「如果佢有努力讀書的話，佢就會知道連自動門呢啲咁常見嘅嘢都會暗藏危機，唔會掉以輕心呀。」學生妹佢呆左一陣，之後細細聲答我：「知道啦哥哥。」
唔知點解，等待嘅時間特別無聊，我忍唔住繼續問學生妹：「係呢點解你要咁早黎食早餐，而家先六點幾咋喎？」「我屋企好多細佬妹，成日都好嘈溫唔到書呀，所以我咪自己早啲出黎溫書囉。係呢哥哥你係咪等緊人呀？」「呀你又知我等緊人嘅？」「無呀我見你一坐低已經望左好多次錶，咪估你咪等緊人囉。」睇黎眼前呢位純情學生妹觀察力不錯，喺訓練下之後，大有可能成為一位優秀嘅人類行為觀察者……呀仆街啦，點解我會諗住人類行為觀察者呢樣咁痴線嘅嘢架呢？唔通我真係近得莊神條死癲佬多，搞到連我都開始short short地？但唔知點解，我忍唔住繼續想去了解呢位小妹妹：「係呢妹妹呀，有個陌生人無端端撩你你唔怕咩？我可能係懷人，想捉你去賣架喎。」佢忍唔住笑左出黎，嘩啲學生妹連喺笑果陣都sweet過人，佢之後話：「哥哥，我五歲就開始幫屋企看鋪，間鋪頭仲要喺深水埗，我雖然得中六咋，但我好人衰人都見過呀。雖然你一開始無端端同我講嘢我真係有少少嚇親，不過我一眼就睇得出你唔係有惡意嘅。」眼前呢個睇真啲有幾分似初出道嘅張柏芝嘅學生妹雖然人仔細細，但已經咁有文有路，我不禁對佢心生欣賞之情，我主動伸出手同佢講：「你好呀妹妹，我叫James呀，唔知你點稱呼呢？」佢喺同我握手果陣，又開始有啲面紅，佢又變返細細聲咁講話：「James哥哥，啲朋友同學都叫我做阿秀嘅，你都叫我做阿秀啦。」「阿瘦？你邊度瘦呀，等哥哥睇過。」喺講出呢個爛gag，再賴誇張咁上下打量下佢之後，我先發覺對住一個學生妹咁做，我應該係過火左。阿秀佢塊面比之前更紅，我連忙同佢道歉同轉開話題：「係呢，你屋企開鋪頭係咩啲咩架？」「都係賣下雜貨做下街坊小生意咁啦，我地啱啱返左一啲飛機杯呀，我畀你睇下呀。」我聽到之後呆左唔敢出聲，我怕我講錯嘢會畀佢和我性騷擾，到佢拎左部電話畀左啲相我睇，原來佢口中嘅飛機杯係真係Q版飛機造型嘅杯，我先鬆左一口氣。
喺阿秀妹妹交談之際，阿畸佢已經到左，不過可能間老麥實在有太多人，佢好似發現唔到。呢個情況都幾諷刺，通常都係人地發現唔到佢，估唔到而家竟然調轉左。阿秀佢見我突然咁專注咁望住阿畸，佢問我：「果個姐姐就係你等緊嘅人？」「係呀，不過我唔想畀佢知道我等緊佢……你放心，我唔係啲咩變態咸濕佬跟蹤佢呀。」阿秀輕輕一笑話：「哥哥你放心啦，我好清楚果啲咸濕佬係咩眼神嘅，我睇得出你唔係果啲人。不過果個姐姐我其實日日黎食早餐都見到佢架，我初初都覺得奇怪，因為就算我星期六日黎溫書都會見到佢，佢又唔似係住附近呀，不過之後我就知道左原因，哥哥你想唔想知點解呀？」我點一點頭，點知阿秀露出左個奸狡嘅笑容話：「你要話畀我知你點解要跟呢個姐姐，我真係好好奇呀。」阿秀呢種對陌生人嘅好奇心再加埋佢不乎年齡嘅觀察力，簡直就好似天生注定佢要成為人類行為觀察者，我心念一轉，決定學莊神咁培育一個屬於自己嘅Robin。我拎左莊神畀我嘅人類行為觀察者卡片畀阿秀，同佢講：「如果你想知詳情，你可以喺放左學之後打電話畀我，我到時會再解釋畀你聽。不過我而家想知道你口中嘅原因係咩先？」阿秀望住張卡片，深思左一陣之後，就將張卡片小心翼翼咁夾左喺本貼滿卡通人物嘅記事薄入面。佢之後指一指企喺櫃檯入面嘅一個老麥男經理，果個男經理高大英俊，而且仲好好笑容，我都估到佢應該係女性會幾鍾意果type男人，我之後再望一望企喺人龍度咀角含春嘅阿略，我即時明白阿秀口中嘅原因係咩。
我冒住遲到嘅危險，等阿畸上返公司一陣先再上公司。阿秀話怕我失信唔講返件事嘅來龍去脈畀佢聽，佢堅持跟到我去公司門口先知，因為佢話就算我畀佢個電話係假，佢都仲知道可以喺邊度搵到我咁話喎。其實我心入面同樣疑惑點解佢好似唔怕返學遲到咁，不過由於要專注喺同阿畸周旋，所以呢啲小事我決定留待之後先問佢。一入到公司，我就見到Valarie繼續喺度死纏住阿畸，不過阿畸又好似唔多想理佢咁。我見狀當然即時加入佢地兩個啦，Valarie見我行近即時好緊張，相反阿畸就好似一面得意，覺得我最後都要低聲下氣去求佢咁。點知我一行埋去就開始挑釁佢話：「喂阿唔知邊個，你點做嘢架，我等住你upload條片上去架喎。我恨左成名好狠耐架啦，你如果係有片就快快趣趣做嘢啦，你睇下阿Valarie姨姨幾心急，佢日日都催你啦。」阿畸一臉不屑咁話：「James哥，你淆底呀？唔洗諗住又用激將法套我說話啦，對我無用架。」我冷笑住話：「阿唔知邊個，你會唔會諗多左呀，我連你個樣都未認得清啦，得Q閒對你用咩激將法呀。你估我係我隔離呢位阿嬸咩，佢恨上位忙到上晒腦先買你怕姐。我本身就係爛命一條架啦，畀人知道係爛仔又點，so what？不過阿Valarie嬸嬸畀人知道私底下原來係咁惡毒又真係大鑊啲啦。」Valarie強忍怒火，佢深呼吸左一下之後同阿畸講話：「我遲啲再同你傾，不過我想話你知，你敬酒唔飲的話，就唔好怪我要你飲罰酒。」阿畸面對住Valarie嘅反臉威嚇一啲都唔怕，佢依舊係一臉不屑。而佔盡上風嘅我更加意氣風發，我笑住咁話：「嘩，既然都畀人知道左真本性，阿嬸你而家連戲都懶得做啦喎。不過咩敬酒罰酒真係好鬼老套呀，阿嬸你果然係六十後呀下，不過你都有返咁上下年紀，我遲啲可能可以奠酒畀你同你阿婆啦。」Valarie一聽到我暗示佢阿婆死左，即刻面色一沉，但奈何佢又唔敢喺眾人面前發作，所以佢都只係可以揸實拳頭咬緊牙根咁離開。阿畸呢個時候都笑左出聲咁話：「你地日日搞咁多大龍鳳，真係好睇過無記啲辦公室劇呀，不枉我唔辭職留喺度做觀眾。」
「挑，唔好扮嘢啦，你賴死唔走係因為唔捨得樓下果個老麥靚仔經理咋嘛。」阿畸聞言即係由一臉得戚變到一臉驚訝，我繼續講：「呀佢叫咩名話？係阿良定阿亮呢？不過我知唔知都唔緊要啦，最緊要係你知姐呵？」「我都唔知你條痴線佬講乜。」「係啦，可能係我誤會左你啦，你可能只係好Q鍾意食老麥姐，鍾意到專登將成個早晨全餐分開買，係啦你一定唔會係想引人注意嘅，你只係嫌錢腥，鍾意將啲錢咁樣洗法姐，食老麥都食得你咁招積，高手呀。」多得阿秀平時有留意開阿畸，我先會知道啲咁有趣嘅情報，阿畸嘅反應當然就係驚到唔敢出聲啦，「不過阿畸你都係死左條心吧啦，人地已經有老婆仔女，個仔仲要讀緊大學架啦。」阿畸即時好大反應咁話：「唔撚係呀話，你講真架？」由於佢呢下反應真係好大，周圍嘅同事都即時望住佢，佢見狀即刻壓低把聲再問：「無理由架，良良B佢最多咪得25,6歲，唔會架。」見到佢又死口唔認，到而家咁大反應我真係忍唔住笑：「你又話唔知我講咩，但突然你又知啦喎，真係有趣啦。呀，我記返起啦，我話結左婚生左仔果個靚仔經理唔係做老麥架，佢係賣炸雞架。你唔洗咁緊張喎，你個良良B應該仲未結婚架，不過你知啦間老麥咁多後生靚女，佢平時除左食薯條之外，蝦條都應該食唔少啦。」阿畸聽到我咁講之後，先係鬆左一口氣，但繼而就好嬲咁質問我：「痴線佬，你究竟知道我幾多嘢？你唔會一直有喺我附近監視住我，你點解連我一個全餐分開買都知架？」「你又黎啦，我咪講左囉，我連你係咩樣都記唔清啦，我點會咁得閒留意你平時做乜呀，作為一個面目模糊嘅二打六黎講，你又真係自視過高啦。」「你點解會知我咁多嘢？」我望一望佢將枱面，靈機一觸：「點解我知你一個早餐全餐分開食？因為你間唔中都會拎住幾張老麥紙巾返黎，仲要係日日都拎幾張喎，仲要你放喺度又唔係用，所以我斷定你唔係主動問佢地攞，而係因為你買左幾次所以先會日日都有幾張。」
又好似畀我講得通，佢不禁對我流露出敬畏嘅眼神，我繼續講：「你又唔係痴線，你專登分幾次買一定係有所圖，咁我一行入間老麥一望，見到阿良良B算係最四正見得人，再加上你之前講到咁想辭職，但到而家都仲賴死喺度。你呢啲低層人員，要搵份人工差唔多嘅工又唔算係難姐，所以我好肯定你係因為其他原因先留喺度。一個人再鍾意八卦人仆街，都會搵自己嘅工作黎玩姐，所以我更加肯定你留低嘅原因係良良B。」阿畸唔敢再駁我咀，佢只係好驚咁垂下頭，好似怕我會再爆佢啲咩咁。我心入面暗暗感謝阿秀呢個小妹妹提供到咁多有用嘅情報畀我，睇黎我之後都要好好咁報答佢，同引導佢發揮佢嘅潛質。呢個時候Evans好似留意到我同阿畸之間嘅氣氛有啲怪，佢走埋黎問阿我地話：「James你唔係又恰女同事呀下，你快啲返埋位做嘢啦。」叻仔呀下，識得喺呢啲時候扮大佬攞分，我暗地向Evans投以讚賞嘅眼神之後，就轉身同阿畸講：「同事呀，我諗我都係唔阻你咁耐啦，係啦聽朝我都會去老麥食早餐架，唔知會唔會見到你呢？」阿畸口疾疾咁話：「唔……唔知呢，聽日再算啦，我做嘢先啦，唔阻你地兩位啦，Evans你同James慢慢傾啦。」睇黎阿畸呢一刻真係由對我不屑，變到對我心存敬畏。
為左唔想失信於阿秀妹妹，我臨放工就約定佢喺我公司附近等。本身Daisy想約我同佢食飯，不過我唯有就要推左佢啦，佢雖然好似有啲嬲，但一聽到我話係有正經事要做佢就無奈應承。其實我喺耍走Daisy果陣心入面其實都有小小內疚，不過由於阿秀妹妹實在係太有趣，既然我都成為左人類行為觀察者一員，我點可以唔襯機招攬呢個新血，至於Daisy方面，我都係之後再補償返佢啦。一到約定時間，我已經見到仲係著住校服嘅阿秀妹妹喺度等緊我，佢一見到我就話：「James哥哥，我好肯定呢張所謂人類行為觀察者一定係第二個人幫你影，而且影果個人仲係一個好有要求嘅人。」估唔到我都未開口講其他嘢，佢已經急不及待要證實自己嘅觀察係咪正確。「點解呢？」「因為呢張卡片嘅唔係用紙做而選擇左用膠黎整，而且上面啲字體好明顯係搵人執過，呢啲咁優雅又成本高嘅事，同James哥哥你嘅image好唔襯，你連銀包都用到咁舊，卡片盒都無個，證明你自己唔係一個咁著重細節嘅人；而且上面仲要寫住見習兩個字，即係你都只係人地嘅徒弟或者下屬啦。」我聽到佢嘅分析，忍唔住要拍手掌讚下佢，佢繼續講：「至於你今朝跟住果個姐姐，佢一定係你同事，因為我一直有留意佢喺大約邊度返工，佢同你嘅返工地點應該喺附近，而且你地嘅打扮都係似返office工，所以我大膽估計你地應該係同事，而且係同一度返工。但我覺得你地之間唔似有太多瓜葛，因為我睇得出James哥哥你對佢都好唔熟悉下，但你既然今朝同我三唔識七都問左我咁多嘢啦，證明你同我一樣都係好奇心重嘅人，喺你身邊嘅人你無理由會對佢咁唔認識架，咁就證明James哥哥你本身係對佢真係一啲興趣都無。你突然之間又要對一個無興趣嘅人要作了解，我估你一係有求於佢，又抑或係受人所託，但你望果個姐姐嘅眼神似係厭惡多過恐懼，我覺得你都係屬於後者，而且呢個任務似係被迫架啦。」我忍唔住上前摸一摸阿秀妹妹個頭表示讚同，但我呢個行為即刻令到佢滿面通紅，佢由突然之間嘅侃侃而談，變到只懂傻笑。
「阿秀妹妹呀，你即管叫嘢食啦，唔洗同我客氣架。」喺我再三詢問之下，阿秀話畀我知因為佢爸爸媽媽要搵食，所以平時一日三餐佢同佢啲細佬妹都係自己搞掂，有見及此，我就帶左佢去食壽司啦。其實我都唔多知時下啲後生女鍾意食啲咩，不過我諗壽司呢樣嘢應該所有港女都鍾意食啦掛。仲著住校服嘅阿秀由於怕畀啲同學老師撞到，所以要求我帶佢去第二區度食，咁我都唯有聽命啦。但點知同佢坐低左之後我先覺得出事，周圍嘅人都用異樣嘅眼神望住我地，我諗當中超過一半應該會以為佢係援交妹，而我呢，我諗佢地都當我一係嫖客一係馬佚架啦。阿秀話晒都係第一日識我，所以佢望住個餐牌果陣都好唔好意思，唔係好敢叫嘢食咁，我忍唔住再同佢講話：「阿秀妹妹，如果有男人帶你去食飯，不論佢係咩意圖都好，你都應該要盡情食佢一餐。如果對方係善意嘅，佢會想你食得盡情同開心；但假若對方係有惡意嘅，你都起碼食左佢一餐拎左著數先呀嘛。總之你以後再遇到呢個情況，喺心裡面默念四字口訣就得架啦。」阿秀一臉不解地反問我：「咩四字口訣？」「食七咁食。」「下…食咩話。」「即係當你心入面再有猶豫唔知點叫嘢食好，你就同自己講，還掂都有人請，就梗係食七咁食，盡情咁叫啦，不吃白不吃呀。」阿秀聽到忍唔住低頭掩住咀笑，雖然我對阿秀妹妹真係心無邪念，不過見到一個妙齡少女喺我面前不住甜笑，我認我作為一個男人其實係覺得開心。突然之間，一個著住校服，身材高大，塊面仲有啲汗毛嘅年青人向住我地嘅方向衝左入黎，而且粒聲都唔出就坐低左。阿秀見到佢即係由一臉笑容變到好嬲，而個男仔就好嬲咁睥住我，而且仲越坐越埋阿秀度，好似要保護佢咁。我而對住呢個突然出現嘅青年人，都知點反應好。而呢位年青人就好大聲咁質問阿秀：「阿秀，呢個麻甩佬係乜水黎架，點解你會同佢單獨食飯嘅？」
阿秀都未黎得切答嘅時候，我已經搶答左話：「呢位同學，你知唔知咩叫禮貌呀？我係外國大學派黎同阿秀小姐進行入學面試嘅，你知唔知你而家打斷緊我地嘅面試呀？」由於我真係衝口而出，我連係咩大學又抑或阿秀全名都唔講清楚，但眼前呢位哥哥仔應該真係好緊張阿秀，佢都無細想到呢啲細節，佢只係好驚咁話：「唔好意思呀……我……我以為你唔係好人，係金魚佬想對阿秀不利咋，我唔知你地做緊啲咁重要嘅嘢呀。」阿秀聽到我呢個說法，原本嬲到面都黑埋嘅佢即刻變左忍笑，我繼續同呢位哥哥仔講：「同學，你知唔知我地收生嘅其中一個標準，就係個考生平生識埋啲咩人，你咁無禮貌嘅人如果係阿秀嘅朋友，我諗我需要喺呢方面再考慮下佢嘅入學申請啦……」「唔係呀，我只係阿秀嘅同班同學咋，我同佢其實唔太熟架，我想追佢咋，不過阿秀一向都多理我架。今次係我自己魯莽咋，唔關阿秀事架。」「咁同學你仲坐喺度做咩呀？你已經打斷左我地嘅面試啦，你係咪要我請埋你食三文魚先肯走呀？」呢位哥哥仔唔知點解突然又好似清醒左啲，佢反問我：「點解你地面試要喺壽司鋪。」我從容不迫咁答：「好簡單，因為阿秀報讀左本校嘅日本研究課程，我而家係黎測試佢對日本飲食文化有幾熟悉。陣間我仲會同佢去信和度測試佢對日本流行文化嘅熟悉程度，你係咪打算跟埋黎呀？先旨聲明，就算你畀我知道你好熟悉日本成人電影，本校都唔會考慮你呢種學生架。」阿秀終於出聲話：「馬雄，你走啦，我要去外國讀書你都黎阻我？你快啲走啦，我地其實唔係好熟架咋。」呢位叫馬雄嘅哥哥仔無奈起身，黯然地步出壽司鋪。望住佢嘅背影，我仿佛學到求學時期畀女飛嘅自己。