今日我開始左對公司啲同事進行復仇大計: 第七十節
終於再次打得通Taylor嘅電話，但係我竟然發覺佢嘅接駁鈴聲好似唔係喺香港境內。又係打左幾次先有人聽，當電話一有人接嘅時候，我就好緊張咁問Taylor：「喂你唔係玩到棄保潛逃返大陸呀下？多口問句,其實係咪真係去龍鼓灘就有船上架啦……」Taylor好開心咁樣笑住問我:「你連我坐過大飛都知?你又真係幾醒喎James。」我憂心忡忡咁問佢:「你老老實實答我,你處理美美婆果陣,係將佢完整打包定分件上?」「咩打包分件呀?佢而家喺我附近喎,我仲見到佢個頭……」「嘩你殺左佢仲要留返個頭咁變態?」「妖你講咩呀?佢仲生勾勾喺出面鋤緊田喎,我意思係話我喺窗度望出去見到佢個頭咋嘛。」「咩耕田呀，你唔係話帶左佢去咩桃園仙境咩？我以為你令佢早登極樂送左佢歸西咋。」Taylor聞言之後哈哈大笑，佢之後話：「你當我痴線架咩，玩到殺人咁大，不過我又真係有心以大飛去運走個死老嘢，等Valarie報左警都搵唔到佢。至於我身處緊嘅地方真係人間仙境黎架，空氣清新而且周圍唔係山就水，仆你個街你有無試過畀幾舊水可以請全條村食飯先？你得閒上下黎就知架啦。」「你究竟運左佢去邊呀，你大費周章搞咁多嘢究竟係為咩呀？」Taylor：「我只係想以其人之道還施其身姐。」
Taylor開始向我講述返成件事，首先Taylor喺同美美婆婆一齊住果幾個月期間，知道美美同好多屋村老嘢一樣，都係對啲咩蛇齋餅糉有種莫名嘅喜好。即係只要某啲政黨搞親活動，美美婆婆都唔理三七廿一一定會參加。就算佢明明平時對政治一啲認識都無，但佢一睇親電視播新聞，都會對果班爭取民主嘅議員有莫明嘅憎恨，而最大嘅原因就係佢地無乜搞啲旅行呀蛇宴畀佢地一班老人家去嘆。美美婆婆果陣成日都話架：「果班撚樣政棍剩係識搞搞震，日日喺度反中亂港嘈嘈嘈，但平時又唔見佢地黎條村度派下米畀我地。另外一班議員就踏實得多，政府做咩都第一時間會大力支持，仲會關心下我地老人家搞咁多活動畀我地，我地一班老人家就當然會訓身支持佢地啦。」而事實上，當政治無乜興趣嘅美美婆婆，又真係訓晒身去支持所有果類政黨搞嘅活動，基本上一見到海報傳單一出，唔理係叫佢去玩定叫佢落力遊行叫口號，美美婆婆都一定會第一個報名，而且仲迫埋隔離左右去馬。Taylor當時仲做緊佢奴隸果陣，已經一直計劃他朝一早會利用呢一樣嘢去引美美婆落塔。而且美美婆仲有另一個弱點，就係佢幾十歲人都仲係好好男色，而且仲要唔後生唔食。所以當佢見到某啲政黨有後生猛男，仲要成日體貼地帶佢地去玩，美美婆婆通常都會流晒口水，而且仲會落力去抽佢地水。Taylor喺逃離地獄之後，佢靠住食軟飯撈到風生水起，亦都因為喺食軟飯畀有錢有面，所以漸漸就多左班較次等嘅食軟飯業者跟住Taylor搵食。
Taylor嘅計劃其實唔算複雜，佢都只不過係搵左手下其中一個生得比較斯文嘅俊男，扮青年政客搞活動呃左美美婆出黎，之後再搵人出手整暈左美美婆婆運左佢出境。中途其實美美婆都醒過好多次，但佢每一次醒左Taylor都好老實唔客氣咁再打暈佢。到真係畀佢醒嘅時候，美美婆婆已經身處喺中國某個偏遠山區，而由於成條村由上至下都收晒Taylor錢，所以大家都對唔會干預呢一班外來者。美美婆婆一見返Taylor就已經大呼小叫，嬲到好似想殺左Taylor咁，但奈何佢叫天不應，喺無人會救佢之下，美美婆又點係Taylor嘅對手呀。「佢每朝早都要四點起身落田做嘢，做到七八點果陣，就會有人送啲粥水畀佢當早餐；一直做到天黑佢就要煮嘢食畀全條村食，食完就要喺豬欄度訓。你知啦，條死老嘢嘆左好多年架嘛，而且佢又睇唔起其他農村人，佢又點會咁乖肯做嘢呀。不過佢精我都唔笨，我畀左千幾蚊請左個民工黎做管工，如果條死老嘢偷懶唔肯做嘢，個管工就會鞭打佢。我其實都係間唔中先會抽時間上黎睇下佢，但個死老嘢睇黎已經畀呢度啲體力勞動搞到得番半條人命啦，佢初初成日想逃走架，但我同佢講：『呢度周圍全部都係山黎架，而且啲山林連狼都有架，你咪走人囉，你身上一蚊都無，我睇黎走得去邊，你想客死異鄉死無全屍咪隨便走囉。』其實睇住佢越黎越不似人形，我真係幾開心架。」其實Taylor都算幾周到呀，知道美美婆咁愛國，咪畀佢返祖國勞動下去貢獻個國家囉。而且佢咁成日都鬧其他香港人，咁唔愛國咪唔好食國產嘢囉。而家好啦，佢唔只係食國產野，佢仲有機會去親身生產食物畀佢嘅國民食，呢啲簡直係佢地愛國者嘅最高榮譽啦。
「我都以為佢真係咁愛國，點知件死老嘢真係得個樣架咋。佢就算到而家都仲係睇唔起其他村民架，果啲人地住喺農村唔識嘢呀嘛。不過唔緊要，我會繼續喺度幫佢進行教育，佢地咁支持國民教育呀嘛，佢而家可以話係用身體去實踐緊啦。」其實仲唔只要佢做農活，平時Taylor間唔中仲會襯美美婆訓左嘅時候，叫人拎啲豬屎牛屎倒喺佢身上，美美婆婆有好幾次都差啲崩潰想自殺，但Taylor每一次都係話：「你死左嘅話，你個孫女就真係無人無物無晒親人架啦。」雖然美美婆係一個老而不，但佢同Valarie嘅親情應該都係真，而家Valarie雖然想出招對付我地，但礙於佢都估到佢阿婆好大可能喺我地手上，所以佢到而家都唔敢輕舉妄動。