今日我開始左對公司啲同事進行復仇大計: 第六十二節
今日雖然唔係話太熱，但都叫有二十幾度。眼前著住英國名牌乾濕褸企背負住雙手喺條街度嘅莊神，雖然係幾有台型，不過我好擔心佢可能會生熱痱。而佢身邊有一個又高佻又沉默寡言嘅美女，睇佢一身男裝西裝加黑超，我估佢應該係莊神嘅保鑣。而家係正午十二點，本身返緊工嘅我突然畀莊神叫左出黎，佢叫佢秘書問阿Kate攞人嘅時候，阿Kate行出黎同我講果陣欲言又止，相信佢真係估唔到我同莊神會有關係。其實我幾不滿本身做做下嘢突然畀莊神叫左出黎，所以我一見到佢都面帶不悅咁講：「莊神你就係高層姐，我其實仲要撈架阿叔，你無端端叫我出黎做咩呀。」點知佢二話不說一掌打左落我天靈蓋度，雖然唔多痛但就幾奇怪，而家拍武俠片咩掌轟天靈蓋，點知佢嘅回答仲痴線，佢話：「見習人類行為觀察者James，你知唔知點解為師要打你？」我略帶憤怒咁答：「我知你老……」點知話口未完第二掌已經轟左埋黎，佢之後一臉嚴厲咁話：「首先，莊神唔係你叫，你係我入室弟子，你要叫我做師父；第二：你身為人類行為觀察者，喺應該用眼觀察，唔係用口問。而家為師就出條問題問你，我身後呢一位女孩子叫咩名？拿，用眼觀察呀，唔好問呀。」我即時上下打量眼前美女，正當我嘅視線喺佢胸口遊走，企圖搵佢會唔會掛住名牌之際，眼前美女一巴打埋黎，好彩當時我地喺處無乜人嘅地方，如果唔係途人見到我畀人打完天靈蓋之後又畀人兜巴星，真係好可能會報警。我一臉無辜咁望住果位美女，果位美女冷冷地講左句：「死淫蟲，再望我就閹左你。」由於畀人無端端打左一巴，怒火中燒嘅我即刻反擊話：「臭八婆你慳啲啦，我小學果陣拎過油尖旺區閹人大賽嘅個人優異獎同團體賽亞軍架，同我James講閹？你無賓同我都可以閹到你有賓周呀。」莊神再次一掌打埋黎之後鬧我話：「收聲呀，我叫你觀察，唔係吹水呀。」我望左眼前條女幾分鐘，點知都係一啲線索都無，我唯有放棄。
莊神見我話放棄就一掌打埋黎，由於真係嬲嬲地所以我今次避開左，佢真係好嬲咁話：「為師真係好失望，我黎問你，呢位小女孩係為師嘅咩人？」「點知姐，睇佢咁作狀一身黑色西裝咁，又咁鬼巴辣，佢唔係你保鑣就係你老母啦。」「保你個頭，佢係我助手，side-kick呀，即係好似蝙蝠俠個羅賓咁，我又有靚車，又靚仔，仲有個秘密基地，你唔係咁都聯想唔到我係香港蝙蝠俠呀，佢係羅賓，Robin呀，佢叫Robin呀。」「唔係呀，你咁Q見無聯IQ題，你換件綠色衫就似謎語人架啦。」莊神講完之後望一望阿Robin，Robin即刻喺袋入面拎左部平版電腦出黎，由於畀阿Robin兜巴星黎，心懷不忿嘅我即刻話：「唔知仲以為你個胸口已經收埋左部平版電腦……」Robin正想再打多我一巴之際，莊神阻止左佢，佢喺部平版電腦度開左個facebook出黎，個facebook account主人應該係眼前呢位Robin，莊神向我講話：「今日係我地第一次觀察人類行為活動，我地嘅觀察對象係Robin喺舊公司嘅一位中年已婚男同事，巴士迷阿腎賢。」我拎喺部平版電腦一望，發覺阿腎賢每次喺facebook打啲咩都好，阿腎賢都有like同回應。就連無聊到Robin話M到唔舒服都好，阿腎賢都會用專家身份去教Robin點減輕痛楚，而且仲誇到話要送埋個暖水袋上Robin屋企畀佢。我望一望Robin，冷笑道話：「你啲士兵都幾犀利呀，yahoo知識咁款，M痛點算都知。仲要係巴士專家黎，你以後唔怕搭錯車啦。」Robin想反擊之際，莊神喺一邊點頭話：「唔錯呀，望左幾眼就大約了解到阿腎賢係咩人。今日我地約左阿腎賢出黎，係想觀察一名中年巴士迷一心以為可以偷情同舊同事開房梳乎之際，發現對方竟然極度鄙視公共交通工具佢會有咩反應，究竟佢嘅性慾會唔會掩蓋左佢對巴士嘅熱愛呢？呢個就係我地今日嘅觀察課題啦。唔好講咁多啦，Robin快啲開著個咪同個cam啦。James，你快啲跟為師上蝙蝠車啦。」當我仲滿心歡喜，呢個又有錢又痴線嘅阿叔會唔會改裝左架超級跑車黎做蝙蝠車之際，點知佢口中嘅蝙蝠車係就係黑色，不過係一架黑色客貨van。
「嘩，你呢架黑色Hiace如果喺外國畀人見到，應該會畀人以為你係準備想綁架邊個。我包保你如果著埋蝙蝠俠套衫揸呢架車的話，一定會畀人以為係戀童變態佬整色整水想捉走啲細蚊仔。」「客貨車除左喺條街度普通唔會引人起疑之外，而且仲有大量空間可以放置監視儀器同變裝易容用嘅衫。咁你都唔明？有無搞錯呀。」正當我想開口笑佢之際，佢示意叫我收聲，原來阿腎賢已經黎到同Robin會面，一開始佢地講啲嘢都係普通客套說話，不值一提，但喺坐低左食嘢之後佢地嘅對話開始有趣。阿腎賢話：「Robin呀，我老婆出左trip呀，你想唔想上我屋企坐下呀？我可以開你上次話想睇果套杜魯福電影畀你睇架喎。」我同莊神喺餐廳對出嘅馬路之外，小心翼翼咁用望遠鏡睇住Robin有咩反應，Robin睇黎其實好唔耐煩，好想快啲完事，佢一黎就單刀直入反問：「你屋企係咪好多巴士模型架腎賢哥哥？」阿腎賢好開心咁答：「係呀Robin你有興趣呀？我可以逐架逐架介紹畀你睇架喎？」Robin冷冷地話：「啱啱相反呀，我一諗起巴士上面載住啲連車都唔起嘅男人就想嘔，咩mood都無晒啦。其實腎賢哥哥我有啲想同你曳曳架，不過諗起啲巴士就咩都唔想啦，都唔明點解會有人鍾意巴士架。」阿腎賢聽到Robin侮辱佢嘅心頭好，面色一沉，但奈何佢身體某一部份應該充緊血，佢而家應該好想喺Robin身上發洩，佢強忍住怒火同Robin講：「咁不如唔好去我屋企啦，我地去時鐘酒店曳曳啦好唔好？」Robin一臉不屑地道：「要我同你去九龍塘爆房？你而家當我係雞呀？腎賢哥哥呀，如果我上到你屋企見到你為左我整爛晒啲巴士模型，我到時咁開心一定咩都聽晒你話架，你要我玩咩都可以架？我一諗起你踩爛晒啲巴士就…..咦怕醜呀唔講啦。」腎賢聽到之後，深思掙扎左一陣，佢最後都係企起身話：「Robin你雖然誘人，但都係唔夠死氣喉醒神。算啦，我同你都係情深緣淺架啦，唔好掛住我，再見啦。」
腎賢走左之後，我一路忍唔住狂笑，莊神亦都好滿意咁同我講：「James你腳頭真係幾好，第一次行動就觀察到啲咁有趣嘅人類行為。原來男人鳩硬果陣再心軟，但都唔會軟到為左造愛放棄心頭好，有趣有趣。」我一路笑住咁話：「果然痴埋你條痴線有錢佬度真係幾過癮呀下，好啦我就繼續同你一齊觀察下其他傻佬啦。」點知莊神又係一掌打落我度話：「首先，我係你師父，你要學下尊師重道；第二：我地而家唔係玩，你今晚返去寫返個report畀我。好啦，你而家返公司做嘢先啦，為師約左幾個model去遊水呀。」「咩model呀？唔好同我講係童裝model呀，你一身造型再加埋你架車，話你係戀童變態佬我都信呀，你件乾濕褸下面有無著衫架……」未講完我就畀剛返到Robin踢左落車，佢地好快就開車絕塵而去。