今日我開始左對公司啲同事進行復仇大計: 第五十三節
今日一返到公司，我已經見到Valarie怒氣沖沖喺會議室度行出黎，而會議室入面就有一臉為難嘅Sam姐，佢見到我返黎即時示意叫我入去。為左唔令Valarie起疑心，我好識做咁扮到一臉惶恐行入去，相信其他人見到我都會以為我係入去等收信封。喺一關埋度門之後，我就大模施樣咁坐左喺主席位張大班椅度，同焦慮到喺房入面不停行黎行去嘅Sam姐講：「得架啦，你唔洗解釋架啦。從Valarie頭先行出房嘅表情睇，你叫我入黎係因為佢頭先迫你炒左我，以你又苦無對策之下唯有拖延住佢先。你而家咁焦慮係因為怕我如果無方法幫你拆招的話，你就會陷入兩難局面：炒左我的話，你就代表要受佢操控，而且你怕我會反轉豬肚隊返你出黎；唔炒我的話，你又唔知點同Valarie交代，到時佢一定會用啲毒辣招素炮製你。你而家咁心急，除左係想做樣畀Valarie睇你有照我肺之外，你仲好希望我有啲咩實際對付Valarie嘅方法畀到你睇，等你唔洗再提心吊膽，我有無講錯？」Sam姐見到我一臉自信咁講左呢一大堆嘢之後，佢睇黎亦好似放心左啲，佢坐低喺我面前同我講：「既然你而家好似咁運籌帷幄，胸有成竹咁，我希望你真係有計去幫我同幫你自己。上面啲高層已經催我快啲決定畀邊個升架啦，我真係唔拖得好耐架啦。」為左令Sam姐可以安心咁交畀我去對付Valarie，我拎左張白紙出黎寫左一封簡短嘅辭職信，之後交左畀Sam姐，我同佢講話：「如果我到時真係對付唔到Valarie，你即管張我呢封辭職信交去畀人事部，咁你咪唔洗怕Valarie會找你晦氣囉，而且封辭職信係我親筆寫嘅，你應該唔洗擔心我有機會反咬你一口啦。」Sam姐拎住我封辭職信果陣，罕有地流露住感激之情，佢行上前捉實我雙手話：「如果今次順利趕得走Valarie的話，升職人選我會推薦你。」我對Sam姐嘅呢一番承諾不置可否，我只係好淡然咁講話：「呢啲嘢之後先算啦，總之呢一刻我希望你會信任我去做我要做嘅事，我嘅要求就係咁多。不過唔該你陣間叫我出去果陣，你記住用惡啲嘅語氣趕我走，做戲做全套呀嘛。」
如我所願，喺開門一刻，Sam姐好大大咁拍枱，之後用盡全身力氣咁大喝我叫我死出去。而我行出會議室門口一刻同即時配合佢扮死狗，我相信除左Miki之外，其他人都會以為我頭先喺房入面畀Sam姐鬧得無地自容。正當我垂頭喪氣咁行返埋位之時，有一個人突然拍我膊頭叫停我，呢個人就係就黎要走嘅Kate姐，佢好緊張咁將我拉左去入佢間房。「Kate姐，你搵我係咪有咩事呀？你都見啦，我頭先畀Sam姐鬧完，我而家心情唔係咁好唔多想講嘢住。」「唔好意思呀James，我都知你頭先應該畀佢鬧得好甘下架啦，不過我想知道點解Valarie同Sam姐講左啲嘢之後，你就即刻畀Sam姐照肺？無理由連Sam姐都畀Valarie收買左掛……」我當然唔可以洩漏任何風聲畀阿Kate知啦，我扮到強顏歡笑咁同講：「Sam姐份人一向公正嚴明，佢應該唔會畀Valarie收買到嘅…….係呢？上次我同你講Valarie係害你果個人單嘢，你而家有無決定點呀？」阿Kate聽完我個問題，轉身行左去望住個窗，沉默左一陣之後佢轉身同我講：「呢件事始終表面上佢係無錯，我做唔到啲咩。但只要你喺對付Valarie一事之上有咩進展，我唔介意再踩多佢兩腳，而且如果你有咩要我幫手的話我都可以考慮一下。」我強掩心中興奮，用平靜嘅語氣答阿Kate：「我明嘅，不過有你呢一句已經足夠架啦。阿Kate呀，你放心，我唔會要你死得不明不白架，你放心你一定可以死得眼閉架。」阿Kate走上前打一打我個頭話：「我唔喺度返工咋，但我仲未死架。不過你相信我，我好快就會捲土重來返返黎。」我心諗你作為高層嘅情婦，到個元配下左啖氣之後，你又可以返返黎架啦，難為我地為左呢件事搞左咁多大龍鳳。
一連畀兩個阿姐叫左入房，我相信公司好多人都會以為我黎被炒不遠矣。作為我喺公司入面嘅真心朋友，Evans當然好擔心我嘅處景。所以一到lunch佢就拉左我去食晏打算開解我同幫我。「James，如果我早啲發力去上位嘅話，你就唔洗被班阿姐無理欺壓你，一日都係我無用……」「要成大事姐，最忌就係好似你而家咁怨自己乜怨自己物。不過我其實都有一樣嘢好想問你，你突然之間要發力嘅原因，係咪真係為左想幫同事爭取權益咁簡單。我要你作為朋友咁老老實實答我，我唔要聽你打官腔呀。」Evans遲疑左一陣，佢深深咁吸一口氣之後答我話：「早排喺我情緒最低落嘅時候，Daisy同我講如果我唔改變下自己大唔透嘅性格，一陣仲係咁無承擔，就唔會有女仔肯對我付託終生。」「你係想去改變自己去追返你果個前度返黎？」「咁又唔係，我已經放棄左佢啦。我搵到一個更加值得我去努力嘅女仔，雖然佢仲未知我鍾意佢，我亦都唔知佢呢一刻會唔會另有心上人，不過我都打算努力左先。」其實從佢一開始提起Daisy呢個名，我已經知佢口中值得佢努力嘅女仔就係Daisy，不過好明顯佢地仲未傾過呢方面嘅問題，所以佢亦都唔知我同Daisy之間發生過嘅事。我唔敢同Evans講話我會全力支持佢，因為我真係講唔出口去支持佢追Daisy。
喺食完晏返到公司之後，我心情一直都好差，我一諗起終有一日要面對我地幾個人之間嘅感情瓜葛就笑唔出。一直到臨放工之前，我都係心不在焉咁坐喺度等時間過，突然，我收到一個無來電嘅電話，我知道係大明終於再出手啦。如果畀著之前我應該會好驚，不過我相信喺不久嘅將來，驚果個會係大明……
我一拎起電話果陣，我就聽到大明把變態笑聲，佢一路笑一路喘氣，聽到我毛管都棟埋。佢笑左一陣之後就話：「掛唔掛住我呀？你梗係一心以為Daisy去左旅行，所以大安旨意以為我無晒符啦，不過你有無確認過Daisy係咪真係走左呀？」我明白大明又打算玩返上次嘅把戲，假設Daisy唔喺香港，佢電話無漫遊的話，我就搵佢唔到；而如果Daisy係喺佢手上的話，我就更加搵佢唔到啦。我無浪費時間去打Daisy電話去搵佢，因為我肯定無論係發生以上邊個情況，大明而家搵得我都係確認左我唔會單靠電話去搵到Daisy。所以我決定不動聲色，睇下大明有咩嘢講：「咩呀？驚都唔敢出聲呀？不過驚都無用架啦，你不如諗下點樣令我心情好啲，你個Daisy就受少啲苦啦。」「咁你想點呀？」大明聽到我好似受制於佢咁，笑得更加變態：「James呀，出過一次事都仲唔醒水，仲係死要搞咁多嘢嘅。」唔知點解，我心入面有種諗法，我覺得大明係因為Daisy竟然唔喺香港，佢又畀Valarie施壓要佢做啲嘢，佢喺苦無對策之下先會兵行險著，打算再次利用我搵唔到Daisy黎威脅我。佢頭先指控我搞咁多嘢，就更加令我覺得係Valarie急住想剷除我而迫佢做嘢。為左證實我呢個諗法，我故作驚慌咁問：「我呢排搞過啲咩黎又得罪你呀大明哥？無理由架，我連見都無見過你……」本身狂笑緊嘅大明畀我呢個問題問到疾左一疾，好明顯佢無諗過我喺Daisy唔見左嘅情況下都仲有時間分析啲枝節嘢，佢語氣略帶猶豫咁話：「你個賤人好事多為，我而家都不過係替天行道咋。」「咁你要點先肯放過Daisy呀，佢係無辜架。」大明可能都怕我再問落去會聽得出更加多破綻，佢單刀直入咁話：「今日星期一阿Sam姐喺度架嘛，你而家就同我入去同佢講晒你咁耐以黎做過嘅衰嘢，跟住即刻辭職。做左我第一個要求之後，我會再有指示架啦。」由於佢竟然咁單刀直入咁提出呢個要求，我好肯定佢只係為求最快達到左Valarie要佢做嘅嘢先，喺睇通呢一點之後，我就決定反客為主。
「大明呀，你記唔記得阿虎呀，即係果日喺酒店房入面嚇到你差啲陽萎果條友呢？」大明應該估唔到我喺呢個時候，會沒頭沒腦咁冒出呢個問題，我呢一著令到佢嬲到暴跳如雷：「我梗係記得呢個人啦，如果畀我再見到佢我一定會殺左佢呀。你唔係諗住交佢出黎我會放過Daisy呀？唔得，我一定要你辭左職先，之後你先好同我談條件呀。」見到大明一步一步跌入我設嘅陷阱，我忍唔住由心笑左出黎，佢聽到我笑之後又驚又怒，佢忍唔住對住電話咆哮：「你笑乜撚嘢呀，你覺得我去到呢個田地，有咩做唔出呀？你再笑我就即刻老強左你個Daisy先。」「大明講起老強，你估阿晴佢頂唔頂得住阿虎呀啦。」大明聽到阿晴呢個名之後，佢把聲即刻又盛怒變到驚訝，睇黎佢真係無諗過我會有此一著，但佢仲打算死撐：「乜撚嘢阿晴，我都唔知你講乜，而家你再唔走去辭職，你就真係唔洗旨意再見到Daisy啦。」「唔係呀大明，阿晴喎，你個未婚妻呀。無理由架，你明明係怕累佢一世要佢守生寡你先會忍痛同佢分手架喎？你點會唔記得左佢呀？」同大明嘅虛張聲勢唔同，呢一刻阿虎真係埋伏喺阿晴附近，不過我仲未癲到打算傷害一個無辜嘅女仔，阿虎只係喺果度作監視。但如果喺緊急情況下，例如大明真係傷害左Daisy的話，癲起上黎我都唔知自己會做得出啲咩事。不過點都好，我呢一著好明顯行得非常成功，大明控制唔到自己嘅情緒，佢再扮唔到事不關己。大明忍唔住講話：「如果邊個傷害左阿晴，我對天發誓，我一定會將佢碎屍萬段，我唔係講笑架。」見到呢招行得咁順暢，再加上我深信Daisy唔喺大明手上，我決定繼續向佢施壓：「我自問係鍾意Daisy呀，不過同你對阿晴嘅愛相比算係啲咩呀。Daisy有咩事我會傷心內疚，不過應該都係一年半載咁大把。但你唔同呀明哥，你同阿晴真係曾經山盟海誓架。」
大明呢個時候無再出聲，佢應該係嘗試冷靜去判斷形勢，不過我當然唔會畀個機會佢去冷靜分析：「大明呀，你而家係咪好想收我線去搵阿晴，確保佢嘅安危呢？不過而家到我未玩完呀，你試下收線呀，我向你保證你唔會搵到佢架啦。大明，你知唔知你一直都惹緊一個你條廢柴惹唔起嘅人呀？你以為你咁樣自暴自棄下，搞到自己人唔似人鬼唔似鬼咁就叫做痴線呀？大明呀，你同我挽鞋嘅資格都無呀。」大明依然唔出聲，睇黎佢真係好驚我會去對付阿晴，又或者佢係喺心入面盤算緊究竟可以點樣去救阿晴，不過我都唔係第一次將佢趕狗入窮巷，喺得勢之後我當然不饒人：「大明呀，你記唔記得你上次將我鎖住喺房成晚呀？果陣我就係好驚架，我驚係因為你喺果陣竟然可以忍手唔即時玩死我，仲打算慢慢同我打心理戰。我真係以為我造就左個不得了嘅怪物出黎架，但你真係好令我失望呀大明，你竟然選擇喺呢個時候同Valarie合作？我唔知Valarie點樣幫過你啦，不過我可以好肯定同你講，如果你唔係急住要幫Valarie，你而家就唔會前功盡廢啦。大明，你知我份人幾小器架啦，我唔會咁易收手架。」今次輪到六神無主嘅大明問返我：「咁你想點呀？」
「大明呀，你好心急咩？你驚咩姐，你仲有Daisy喺手架嘛，呢個咪係你嘅談判籌碼囉。唔洗咁驚住，你畀我慢慢講埋落去先啦。你係咪以為只要過左而家呢個難關，你確保左阿晴嘅安全之後，我就奈你唔何呢。唔係架大明，我仲未玩完架。你都知我對付人嘅手段架啦，你見我連阿晴嘅底細都知道，你應該明白我要玩落去嘅話，阿晴佢真係好慘架。不如我講個例子畀你知呀，全世界嘅人都知道阿晴幾咁愛你，而你離開佢又有幾傷心……你話如果阿晴知道左，原來所以悲劇嘅起因，都係因為你咸濕搞私影妹，佢會點諗呀拿？我知架大明，你寧願搞咁多嘢無聲無色咁告別阿晴，都係想保護佢同怕傷害佢呀嘛。你話如果佢知道晒所有嘢之後，會唔會傷心到想自殺呀拿？未婚夫出去搞私影妹，搞到最後要同佢分手喎，畀我知道我真係會傷心到自殺架大明。」聽到呢到，大明竟然語帶哭聲咁求我話：「當我認輸啦，好未？我會放左Daisy架啦，亦都唔會再搞住你，我求下你放過阿晴啦，我已經好對佢唔住架啦……」「你同Valarie究竟仲喺背後搞左啲咩？」「只不過係我呢排嘅所有洗費同係佢負責，而且佢會話畀我知你地啲行蹤，我同佢真係無其他嘢架啦……我真係唔會再黎搞你地架啦，我求下你放過阿晴啦。」喺得到我想要嘅嘢，同確定左大明同Valarie嘅關係之後，我深思左一陣之後問：「其實由頭到尾Daisy都唔喺你手上嘅，係咪？」「你都咩都知道晒啦，我真係唔會再黎搞住你架啦，求下你真係唔好搞阿晴呀。」可能係近排接觸得女人多左，見到大明為左阿晴竟然連報仇都可以放棄，我竟然有啲感動同心軟，而且我回想大明今時今日搞到咁，其實唔多唔少都係因為我，我作出左一個我之後可能會後悔嘅決定：「既然知我嘅手段，我係你就唔會再出現喺我面前。竟然係咁愛阿晴，你當日就唔應該走去玩私影妹，玩完之後又要扮情聖，不知所謂。你記住呀，為左你個阿晴嘅安危，唔好再喺我面前出現呀」講完呢番話之後，我無諗過我竟然會會聽到大明同我講左句多謝。