今日我開始左對公司啲同事進行復仇大計: 第五十二節
由於尋日同Taylor第一次行動已經嘗到甜頭，我尋晚訓得特別安穩，喺訓左十個鐘之後，我精神飽滿咁起身準備迎接新一天嘅挑戰。喺起身之後，我再次集中精神打算搵大明出黎，就算Daisy呢一刻唔喺香港，但一日未搵到佢出黎我都唔會安心，而且我相信佢喺暗中都會行動。雖然大明已經痴Q左線，要捉到佢路都唔係咁易，不過我相信一個人就算點癲都好，我依然都可以由佢嘅背景呀，生活習慣呀同人際關係方面搵到啲蛛絲馬跡，由於之前一直都只顧防範住大明，以至我一直都處於捱打狀態。但而家Daisy又唔喺香港，再加上我身邊多左咁多強援，我都係時候反客為主架啦。我喺食左個豐富嘅早餐之後，就開始再利用我引以為傲嘅小器簿系統度翻查晒所有關於大明嘅記錄，喺經過一番研究，我發覺自己一直都忽略左兩條顯而易見嘅線索，首先：大明係一個深度攝影發燒友，就算佢而家處於瘋癲狀態，都唔代表佢會放棄佢呢樣最大嘅興趣，而且更可能因為佢長期處於精神咁唔穩定嘅狀態下，佢對攝影呢門興趣有可能變得更加熱，而呢個時候，相機基應該可以幫到我；而第二樣嘢就係，佢受到咁大打擊係因為佢不舉，而最有機會令佢喺呢方面受到打擊嘅，應該係佢果個未婚妻，而且個打擊大到足以令佢痴線的話，就證明佢有幾在意佢嘅未婚妻。喺諗通呢兩點之後，我突然之間變得豁然開朗起黎，大明你咪即管匿埋囉，不過我相信呢個貓捉老鼠嘅遊戲，將會好快玩完。 根據探子(其實都係啲舊同學)回報，相機基而家喺旺角某間電器鋪度賣相機，不過據聞由於佢講嘢口疾疾，所以啲中國豪客開大單通常都無佢份，相反佢就差唔多成副人工都拎晒黎買相機呀鏡頭呀咁。其實我真係好憎喺星期六日出去旺角，因為次次去親我都覺得好似去左香港境外咁，周圍啲人都係講強國語。不過由於喺搵到大明出黎呢件事上真係分秒必爭，所以我都別無選擇決定踩上相機基鋪頭去搵佢。去到間電器鋪度，我好辛苦先穿過果班中國大豪客，喺鋪頭嘅一角搵到無所事事嘅相機基。其實喺頭先行入黎嘅過程，我肯定自己曾經唔小心踩到幾個中國人嘅腳，同撞開左幾個強國細路，不過由於佢地所有人都好投入去買啲佢地未必用得著嘅電器，所以佢地都唔得閒同我爭執。相機基同上次唔同，今次佢一見到我表現得非常高興，佢離遠見到我已經同我喺度揮手叫我過黎。「嘩基哥搞乜你坐左喺度笑笑口又好似唔洗做咁呀，乜你中左六合彩唔洗做咩？」「唔好玩我啦James，不過見到James兄黎我真係有失遠迎呀，如果而家唔係喺大底廣眾，我真係想你受小弟一拜呀。」「我死左你先黎拜我啦，不過睇個款都應該係你死先架啦，搞咩見到我咁開心呀基哥，唔好同我講你影女影厭左想搵我私影呀，我唔會濕身影架。」相機基畀我奚落完兩句都好似無影響到心情，佢依然係笑笑口咁望住我，我忍唔住問佢：「拿你好老老實實同我講，做咩無端端對住我烚熟狗頭咁先，你唔老實答我我大叫非禮架。」「喂James我真係唔知你對大明做過啲咩黎，不過無論你做過啲咩我都對你甘拜下風呀。我早兩日見過佢，佢真係變左第二個人咁。」 聽到大明搵過阿基，我心中暗地同自己講左聲bingo，不過我表面上依然係不動聲色，我好淡然咁話：「係咩？自從佢辭左職之後我地成間公司啲人都搵佢唔到啦，係呢佢而家變到點呀？」「佢早排突然喺攝影界完全絕跡左，正當我以為你做左啲咩令佢連相機都唔玩咁犀利，點知佢早兩日竟然黎左搵我喎。」「唔好賣關子啦基哥，佢黎搵你做咩呀？」「佢早兩日黎搵我果陣，由於佢人唔似人鬼唔似鬼咁，我初初直頭唔認得佢咁滯。平時佢見到我都會串我兩句架嘛，點知佢早兩日一黎到就拎左疊銀紙出黎話要買晒幾支好貴嘅鏡頭，我就好奇佢點解會突然咁捨得買呢啲貴鏡頭啦。佢就話佢想喺最後一刻，幫佢果個未婚妻阿晴去影最靚最靚嘅畢業相還自己一個心願，佢講到好似交代遺願咁。挑明明聽聞佢同阿晴都分左手啦，佢仲搞咁多野扮情聖。」從阿基口中覆述大明果番話，睇黎佢大有與我同歸於盡之勢，我喺諗左三十秒之後，喺銀包度拎左五百蚊出黎畀阿基，之後問佢：「我唔理咁多，我要知道晒果個阿晴嘅所有嘢，包括佢喺邊住，喺邊讀書等等，如果你可以話到畀我知我再畀多幾百蚊你都無問題。」點知阿基只係笑笑口咁推返啲錢畀我，之後話：「傻啦James哥，你幫我報左大明呢個仇我都未多謝你啦。你仲搞到佢癲唔癲喪唔喪咁黎幫我開左張大單，我而家咁Q得閒無畀班大佬捽數都係因為果日開到單咋。James你真係好彩，因為阿晴以前都係做私影妹，我之前同佢都算係幾好朋友，我又真係知道阿晴唔少嘢喎，拿我一陣寫畀你當係報恩啦。不過James哥我想再麻煩你多一樣嘢，如果你想搞阿晴記住唔好咁重手，啱啱好令到佢受驚嚇等我可以乘虛而入去安慰佢就最good fit啦。你知啦James哥，一陣玩大左搞到佢有咩心理創傷怕左男人，我就無行架啦。」「阿基哥，其實我自問都唔算係一個咩正人君子黎，不過你頭先果番說話，真係賤格到連我都講唔出口呀大佬。不過點都好啦，你放心，我唔係想傷害果個阿晴。」「唔係呀James哥，你真係唔怕傷害阿晴喎，喺非常時期有非常手段都係可以理解嘅，不過你記住留返小小餘地就ok架啦。」呢個時候，我發覺我咁多年都睇漏左阿基，可能咁多年以黎，佢先係真正嘅賤人之霸。