今日我開始左對公司啲同事進行復仇大計: 第十四節
尋晚返到去屋企果陣，正當我思緒仲係處於極度混亂之際，我電話同時間收到三個whatsapp message，第一個係由阿油send畀我嘅，佢話：「聽朝返工之前，上黎我屋企度同我好好解釋，解釋得唔合理的話你等住畀我爆大鑊啦仆街！。」第二個係由Daisy send畀我，佢話：「聽晚放工諗定帶我食咩啦，不過唔好太貴，我請唔起呀:-)」而第三個send畀我嘅，就係Miki，佢話：「送你一個magic word，「大明」，聽日呢個magic word可能可以救你一晚呀呵呵。」係睇完呢三個message之後，我開始懷疑其實我係咪畀人設局玩殘果個呀，阿油明明係推我出去果個，點解而家變左要係我上去負荊請罪咁？Daisy又係，自把自為，喺呢個時候突然約我出黎殺左我一個措手不及，但我又不忍拒絕佢。最痴線都係阿Miki姐，無端端點解可以拉埋去大明度？擺明係有心擾敵，佢就係要我不斷猜疑，可惜我依然係中左佢計…
呢一刻我真係唔可以afford得罪阿油，雖然我諗左成晚都諗唔到可以點兜先合理，不過阿油呢啲毒男應該好易耍，我都係決定見步行步算，而且最壞情況下佢其實都無咩大鑊可以爆而整得死我，喺平衡左各方行害之後，我決定博一鋪上去佢屋企，最多咪向佢動之以情博下佢可憐。而且阿油屋企又近公司，上去敷衍下佢之後應該仲有時間買早餐畀Daisy食，就係咁，我就晨咁早單拖上左去會阿油…
據聞阿油自己一個人住喺公司附近某個洋樓單位，喺去佢屋企途中，我突然驚覺自己失算左，我唔記得帶返個防毒面具先上去佢屋企。一個單身毒男嘅屋企除左滿佈毒物之外，而且仲可能會臭氣沖天…呢個時候，我唔知點解諗起某個當差嘅朋友同我講過，佢人生第一次接觸到死屍嘅時候，係接報調查一單鄰居報案話隔離屋傳出惡臭嘅case，佢話開左門之後，果浸由過左第一段時間嘅屍體傳黎嘅臭味，你真係會畢生難忘，果種臭味既獨特而且非一般人可以接受。唔知點解，我心入面預計到陣間打開阿油屋企度門果陣，都會體驗到類似屍臭嘅味道…
出奇地，當阿油開門畀我入屋果陣，我發現阿油間屋出奇地整潔同少野，而且家居擺設方面都係好平常，不過剩係客廳我都已經見到有幾部Notebook喺度，果然係I.T.毒男呀下！正當我環顧緊四周果陣，阿油突然入左房，而換黎係到一個強壯嘅男人將我從後捉實，我死命反抗都掙脫唔到，個男人拉左我入去廁所，之後用手銬鎖左我喺個鑲喺牆上面嘅毛巾架。整個過程發生得好快，我心諗阿油唔係嬲到搵人雞姦我呀下，我驚到腦袋一片空白，只係識嗌：「大俠唔好搞我屎忽呀，我呢排腸胃差成日屙爛屎架，我好污糟架…」果個強壯男人聽到之後一拳打埋黎，之後用普通話大喝一聲：「閉咀！」呢個時候我先有機會望清呢個大隻佬，一身民工造型嘅佢一臉兇狠，佢身上件充滿鄉土味嘅恤衫應該陪住佢穿洲過省左好多年、從佢個平頭裝我睇得出佢應該係實幹型，唔愛花巧嘅真男人。從佢頭先結結實實打喺我面上果拳，我知道呢個男人應該食過下夜粥。呢個時候阿油拎住個電鑽入黎，佢惡狠狠咁望住我，佢話：「陣間你畀唔到個合理解釋我，你唔洗旨意行得出個門口…」嘩油哥，吊下Miki尾姐，洗唔洗同我玩埋電鑽呀…
「表弟，你要幹掉他嗎？」件民工造型大陸佬見到阿油拎住個電鑽果陣都大吃一驚，阿油不耐煩咁答佢：「幹幹幹幹你老娘咩，你做咩無端端打到佢變熊貓咁，我叫你鎖住佢咋嘛。落左黎咁耐，平時食我嘅住我嘅，叫你做小小野都搞唔掂…」阿民工哥畀阿油咁鬧完之後都係笑笑口：「那表弟，沒什麼事我要去找個妹子爽一爽啦。」阿油之後畀左幾百蚊阿民工哥，民工哥收左錢就歡天喜地咁走左。其實我一直叫緊救命，不過奇怪阿油同民工哥都無阻止我，到民工哥走左阿油回左我一句：「晒氣啦，之後為左搞Home Theater，我一早做晒隔音啦，而且周圍啲人返晒工無人喺度架啦，慳返啖氣答我問題啦。」呢一刻嘅阿油就好似變左第二個人咁，除左講野無口疾疾之外，而且佢語氣中果種冷漠令人我心都寒埋。「唔好殺我呀油哥，我真係唔係想同你爭Miki架…」阿油聽到之後失笑左一下：「你當我痴線咩，殺人犯法野我唔會做架。」喂你而家非法禁錮緊我咪一樣犯法，仲未計你頭先搵人打我，你畀我走得到，我一定報警拉你件痴線佬！「不過呢，對你呢啲連朋友妻都唔放過嘅賤人，我點都要懲罰下你架啦…」佢一路講果陣，佢手上個電鑽就越拎越埋…
唔知幾時阿油另一隻手竟然多左舊磚頭，阿油開始用個電鑽鑽個磚頭，我雖然唔知佢搞乜，不過我都慶幸佢鑽嘅係磚頭而唔係我個頭。佢一路鑽，我一路隱約聽到佢講：「聽成個鐘電鑽鑽野聲，我包保你到時一定肯講真話呀。」原來佢所謂嘅懲罰，竟然係要我聽成個鐘電鑽聲？佢真係好惡毒呀，我寧靜畀佢個民工老表打一聲都唔想聽一個鐘電鑽聲。喺鑽左五分鐘阿油突然發現唔對路，原來佢自己都唔記得帶耳塞，佢停左電鑽之際我即刻聲淚俱下咁求饒：「油哥，我鍾意嘅根本唔係Miki，我跟蹤佢唔係因為我鍾意左佢呀…」「咁你講你點解要跟佢呀，唔好同我講係你為左幫我呀，你估我唔知你一直利用緊我呀！」我唯一嘅籍口未講出口已經收左皮，我呢一刻就算講真話都無用，唔通我話佢知我想起清Miki個底再對付佢呀。喺呢一刻我突然諗起Miki果個Magic Word大明，我無情況之下唯有亂講話：「係大明，我咁做係為左對付大明。」阿油聽到之後大為緊張，佢撲上黎問：「大明同Miki真係有路？你係咪知道啲乜？」唔係呀嘛，咁格硬嘅答案竟然真係有用？
阿油唔等我回答，已經開始喺度自說自話：「我都奇怪架啦，我見到Miki同大明喺公司特別多email來往，明明佢地公事上都無關係，但我又唔知佢地講咩…」我聽到之後本身諗住順佢意講兩句大明壞話就脫身走去報警，阿油無理我繼續講：「你陣間唔洗諗住陣間報警呀痴線佬，我真係知你大把野架，你記唔記得你次次壞電腦老點我幫你整，你估我真係維修咁簡單呀，你大把野喺我手呀仆街，我唔出聲你就成日利用我，你其實同所有人一樣，你都係衰人黎架！」今次真係陰溝裡翻船，以前諗住縮數老點毒男同事幫我整機，估唔到最後竟然衰喺佢手上！？
喺未知道阿油掌握左我啲咩之前，我決定唔再開口去試探佢，阿油見狀話：「口硬呀嘛，我而家就去返工順手幫你請埋假，你唔洗怕悶呀，我會一直不停咁播汪阿姐唱嘅少女的祈禱幫你解悶架啦，放工返黎再慢慢問你啦。」我一聽到佢話汪阿姐唱嘅少女的祈禱即刻驚到叫左出黎，我唯有答阿油：「你都知我幾憎大明架啦…我留意左佢好耐架啦，佢對Miki有意左好耐，我果日吊住Miki尾就係想睇下佢搵唔搵到咩蛛絲馬跡架咋。阿油聽到之後好似唔係好信我，我繼續落咀頭：「你記唔記得早幾日Judy個公仔斷頭單野呀？大明見Miki竟然幫住我果陣仲要反駁佢果陣個錯愕樣呀，係因為佢估唔到Miki竟然會咁落佢面。但呢幾日大明同Miki又好似照常咁傾計，我咪懷疑佢地私下會唔會…」阿油即刻好激動咁插話：「你講咩呀，一定係大明死纏住Miki咋，我警告你呀，點玩大明都得，總之唔好影響到Miki呀，如果唔係我唔會放過你。」「咁油哥你肯放過我未呀，畀我走啦，我地陣間仲要返工架。」
阿油聽到我目標唔係Miki，而係大明之後，諗左一諗之後，佢突然變返平時果個毒男阿油，陰聲細氣咁講：「James，其實我吊住Miki尾都係想保護佢咋，你知啦，佢咁單純好易蝕底畀人架嘛。好彩你唔係大明果類賤人咋，如果唔係我都唔知自己會做啲乜架…」我即時點頭附和，只係想佢快啲講完畀我甩身先。佢續道：「不如咁啦阿James，我全力幫助你對付大明，事成之後我會咪銷毀晒你喺我手上啲嘢囉…基本上你喺屋企用電腦做過啲咩我都知架，唔少野架果度。你幫我搞掂大明，我都識做架啦…」「不如你放左我先啦…」「你乖乖地應承我咪放你囉，我請埋你搭的士返工都無問題…呀不過都係唔好，你隻眼瘀左，你都係返屋企休息下啦。」喺別無選擇之下，我唯有答應佢，佢放我走果陣仲塞左千幾蚊畀我夠我去買藥膏揸下隻眼…不過我突然記起我今晚約左Daisy，喺脫身之後，我就打返公司請假話整親要去睇醫生，之後私下同Daisy講我今晚會照赴約。而喺見Daisy之前，我除左要拿拿臨返屋企換左部電腦之外，仲要好好計劃下點樣對付大明…
夜晚赴約去見Daisy果陣，為左遮住隻畀人打瘀左嘅熊貓眼，我偷偷地拎左細妹果幅Chanel太陽眼鏡黎戴，諗住話晒都係名牌，實無死啦。但唔知點解出到去果陣，周圍啲人都望住我，我心諗肯定係啲窮人無見過貴嘢啦，所以話人靠衣裝，呢一刻我真係行步路都自信過人，直頭令我將今朝發生嘅不快事件拋諸腦後。
今朝件事真係發生得太突然，我之後冷靜咁諗一諗，阿油會唔會係拋我浪頭呢？佢手上啲所謂爆大鑊野好可能都係知我平時睇開邊套成人藝術片，又或者知我上淘寶買開咩。不過點都好啦，佢要求我對付大明，本身都叫係我目標之一，佢只係推動左我去加快進行呢件事。
其實我都無乜plan過今晚同佢點過，我都係打算盡快食完就走人，連食邊間餐廳都係Daisy安排埋。去到同Daisy約定嘅地點，由於周圍相當多人，以佢嘅身高，尋找佢果陣其實真係有啲困難。喺電話度擾攘左幾分鐘之後，我終於見到佢。雖然今朝要返工，但睇得出佢都悉心打扮過，一身日系少女打扮相當襯佢，再加上佢哈比人身高同果一臉稚氣嘅童顏，我開始擔心周圍啲人會以為我同未成年少女援交…Daisy一見到我即刻忍唔住笑問我：「乜你習慣鍾意戴女裝太陽眼鏡架咩？」唔怪得頭先個個都望住我啦，原來副太陽眼鏡係女裝…我聞言即時除左副太陽眼鏡，仲嬲到想踩爛副鏡。點知Daisy見到我隻熊貓眼，即刻好緊張咁問：「你做咩畀人打呀？」我答：「無呀，今朝我本身扶緊個阿婆過馬路，點知佢老公見到以為我輕薄佢愛妻，醋意大發之下咪黎打左我一拳囉。其實果陣我有足夠時間避開架，不過我就一避開個阿伯就會整親條腰骨，所以咪硬食一拳囉。」Daisy聽到點一點頭，話：「幫人還幫人，下次小心啲啦。」
我同Daisy去左尖沙咀區一間拉麵鋪，第一次同Daisy出街，其實我真係有啲緊張。食食下Daisy突然靜左，佢望住眼前果碗豚肉拉麵(加蛋)嘅時候，眼神突然變得幽怨同哀傷，雖然只係一閃即逝，不過都暪唔過我隻眼。雖然我好想關心佢問佢點解咁唔開心，不過基於而家局勢咁混亂，我真係好怕自己會對Daisy投入左太多感情。成餐飯我同佢都只係閒話家常，而當佢講到自己同前男友嘅事，我都會有意無意咁轉去其他話題。到差唔多食完果陣，佢同我講：「不如你乖乖地唔好再成日整蠱人啦，如果你可以成熟啲就好。」我果一刻其實有好多野想同佢講，例如我為左你會成熟啲呀，什至想講為左你我可以唔再報仇…不過每當臨說出口，我腦海都會浮現左Miki個樣出黎…我想問佢究竟同Miki有咩關係，不過如果就咁問只會打草驚蛇。食完之後我好快就同Daisy講左byebye，而佢都堅持叫我唔洗送佢返屋企。
而喺呢個時候，我收到Miki嘅message，佢話：「你欠左我咁多個人情，我記得架，不過唔洗急住還，我地總有大把時間。」我有預感，我好快就會知道Miki搞咁多野嘅真正目的…