今日我開始左對公司啲同事進行復仇大計: 第十三節

喺未查明Miki嘅底細之前，我諗我真係好難再面對Daisy。每一次當我見到Daisy天真無邪，好pure好true嘅無垢臉容之際；我都會聯想到去Miki度，我曾經以為我嘅復仇計劃係天衣無逢，滴水不漏，但對住Miki我就永遠好似棋差一著。其實而家公司都開始四分五裂，雖然唔係由我一手造成，但我都算目標已達呀，如果接住落黎，我肯改變下自己去迎合其他人…唔知算係幸運定不幸，因為有左Miki呢個對手，我知我一停落黎就會畀佢食埋。

 

今朝當我拎早餐畀Daisy果陣，佢睇落有啲唔開心，不過我唔敢去關心佢，去接近佢，我怕我會踩中Miki嘅陷阱，又或者係我怕自己會泥足深陷喺Daisy身上。之前我都曾經以為過我同Sophia有機會，不過當佢連續十日將我送畀佢嘅禮物直接轉贈垃圾桶嘅時候，我當時應該意識到，我嘅愛太濃太烈啦，唔係個個人都受得到。喺諗起黯然離開嘅Sophia嘅時候，我個心都仲會隱隱作痛。當時佢走果陣一定好傷心，佢一定係怕留喺度會愛上我，所以先迫不得以無聲無色咁離開，而且佢為左唔想我再見到會傷心，佢屋又搬埋，電話又改埋。不過好彩Sophia生性孤癖，佢從來都不屑同其他同事有私交，所以無人知道佢同我曾經有段咁可歌可泣，但卻無疾而終嘅愛情。

 

講返Daisy先，佢見到我只係輕輕放低個老麥早餐全餐喺佢張枱果陣，佢拉住我唔畀我離開，佢帶點佻皮咁同我講：「件薯餅好油又熱氣，你幫我食左去。最多我聽晚放工獎你去食拉麵啦。」我聽到之後真係差啲暈低左，Daisy竟然主動約我，正當我如萬非驚愕嘅眼神望住Diasy嘅時候，Daisy面都紅埋口疾疾咁講：「咁…咁你日日都請我食早餐，我想請你食返餐當無數呀嘛，你唔准拒絕架，你唔應承我以後都唔睬你。」佢都講到咁，我仲有得拒絕咩…





 

但喺聽晚赴約之前，我有必要盡快起清Miki個底，既然喺網上一無所知，我又埋到去睇啲HR File，我唯有打左畀Sam姐嘗試問下佢。但就咁問Sam姐一定唔會答，我唯有假意扮對Miki有好感，扮到係為左追佢先對佢尋根問究。Sam姐聽到我想追Miki，帶住啲家姐見到個毒男細佬終於肯出門口識女仔嘅興奮語氣同我講：「見係你先話你知咋，我都唔可以講得太多畀你知，我剩係可以話你知佢喺外國讀大學返黎，而且學歷都唔差架，請佢果陣我都有問佢點解佢肯屈就喺呢個低位，佢話志在學下嘢喎。想追人就好心你增值下自己，唔好咁失禮呀。」我聽到之後虛應左幾句就收線，原來佢係番書妹…但點解佢肯屈就打扮得一萬多啲嘅工呢，睇黎如果我可以解開到呢重謎團，勝利就會屬於我。

 

我決定放工之後跟蹤Miki。可能大家唔知道，我本身可以話係一個跟蹤專家，由中學開始我已經進行過多次嘅跟蹤行動，而大多數都係成功嘅。而最成功果次就要數我中二果年，我地班嘅校花阿紫突然話對我有意思，但佢就唔畀我即刻應承佢，話要用一兩個星期時間畀佢觀察下我會點對佢好。而喺果個星期當我返緊校果陣，我對佢可以話無微不至，什至佢甩鞋帶我會幫佢綁，佢話想食啲咩我直情唔等lunch time，即刻偷走幫佢買。但到左第三日，我開始覺得有啲唔對路，我決定喺放學果陣跟蹤佢。頭幾日都無乜特別，佢放左學都係周圍行下就返屋企。到左一個星期六，我見佢約左我地班幾個女仔出去又一城溜冰，而當溜到攰上左去Food Court食嘢果陣，我終於喺佢地言談之間打聽到佢地嘅陰謀，原來所有嘢都係阿紫為左炫耀佢嘅魅力，話用兩個星期睇下我可以為佢去到幾盡喎。我聽到之後雖然急怒攻心，但我決定都係按兵不動，我要慢慢用誠意去感動佢。之後跟住落黎我對佢越黎越好，當佢上堂舉手去廁所果陣，我會即刻拎包M巾出黎喺眾人面前交畀佢；當有其他男仔行埋去同佢講嘢果陣，我會即刻衝埋去推開個男仔，確保無人可以騷擾佢，搞搞下就連女仔過黎同佢講野我都會照樣推開；而喺Lunch果陣我會買定飯畀佢，坐喺佢隔離一邊同佢講女仔發育時期唔食多啲飯唔長肉，一邊確保佢一粒都無食剩先放佢走。好快佢就頂唔順叫我收手，佢唔會同我一齊。但我唔係一個咁易放棄嘅人，跟住果半年無論佢返學放學，佢去到邊我就跟到去邊。就連星期六日我都會跟住，就連社工介入都阻止唔到我對佢嘅愛，或者係因為佢自卑覺得配唔起我嘅愛啦，大約半年之後阿紫就轉左去間女校讀。







作為一名跟蹤專家，我絕對唔介意晒時間耐心去守候我嘅獵物。所以當Miki剩係行化妝品鋪都行左差唔多四十五分鐘，久經訓練嘅我只係喺遠處默默咁守候住。一直到佢行到去某間百貨公司果陣，我都好有信心佢無發現到我一直跟住佢，我就好似完全融入左周圍嘅人群一樣。而去到睇女裝嘢嘅時候，大家可能好奇怪一個單身麻甩佬唔會好受注目好異相咩。作為一個跟蹤專家，呢啲情形當然唔會難到我啦。經過我長期觀察各大女裝部之後，我發現周圍除左好多專注於搜索心頭好嘅女士之外，周圍仲會有好多雖然唔耐煩，但又被迫喺度等另一半嘅男士。只要你模仿到佢地一臉無奈，雖然想走又唔走得，唯一不斷玩下電話同望天打卦果種我稱為shopping dead嘅類喪屍神緒，就唔會有人懷疑你係單身喺度。喺大約跟左Miki遊左幾個counter之後，我跟到佢去左一個賣女性內衣嘅counter，雖然我只當Miki係我現階段嘅頭號敵人，但因為體內男性基因使然，我都對Miki會揀咩內衣好感興趣。喺望住Miki遊黎遊去揀左一陣之後，佢終於將目標鎖定喺一套幾誘人嘅黑色lingerie，正當我幻想緊著住套lingerie嘅Miki之際。遠處有個女客人帶住個百貨保安向我個方向行過黎，而且好明顯來意不善，而正當我懷疑自己咁完美嘅偽裝竟然畀人揭穿左之際，我發現佢地目標好似唔係我。

 

突然之間我被身後某個人大力咁向住個保安嘅方向推左一下，而我亦都向前仆左一步。我都未企穩個身就已經立刻擰轉頭望下邊個推我，而我見到一個瘦小男人好急忙咁向住人群逃走，憑佢一身裝束我認得果個男人竟然係阿油。老土啲講句，今次真係螳螂捕蟬，黃雀在後。正當我全神貫注咁跟緊Miki之際，阿油竟然喺我身後出現。我覺得自己可以融入人群隱沒自己氣色已經算係高手，但估唔到阿油仲勁，佢直頭無存在感到一直同周圍嘅環境融為一體！畢竟阿油中學畀人杯葛左幾年，喺做隱形人方面佢可以話係專家。如果唔係頭先佢見到Miki行入去揀內衣，令到佢血脈沸點嘅話，相信佢都唔會破功畀人發現到。

 

而本身已阿油作目標嘅保安，經頭先果一推，佢將注意力轉移到我身上。正當我仲以為今次衰硬，諗住上硬差館之際，因為頭先果幾下擾攘而發現左我嘅Miki，行左埋我度拖住我隻手，之後同保安講：「我男朋友等緊我咋，放心無事。」而保安聽到之後同我地解釋因為有女客人懷疑一臉色相流晒口水嘅阿油係色狼，而佢又唔知我會唔會係同黨，所以先過黎了解下，當知道係一場誤會之後，保安向我地道完歉就走左。不過如果你畀我揀，上差館等人保釋定喺呢一刻畀Miki發現，我相信我會選擇前者。保安去左之後，一副勝利者姿態嘅Miki喺我耳邊同我講：「你想知啲咩野問咪得囉，跟左我幾個鐘你唔攰架咩，不過你問唔代表我會答你架哈哈。我走先啦，聽日見，你慢慢諗下點同阿油解釋啦。」今次真係大鑊啦…