今日我開始左對公司啲同事進行復仇大計: 第四十五節

我咁大個仔都唔試過咁擔心一個人，喺尋日睇完大明留低嘅字條後，我真係好擔心佢會搞Daisy。為此，我喺星期日嘅下午忍唔住約左Daisy喺佢屋企樓下度食嘢，諗住提醒下佢。佢初初聽到我約佢出黎都遲疑左一陣，不過我同佢講我有啲好緊要嘅野要同佢講，所以佢最後都肯出黎。今日其實都算係幾風和日麗，如果我同Daisy係情侶關係嘅話，我應該會帶佢去西貢度食個tea，望下人地放狗又或者玩下人地隻狗，到左夜晚就帶佢返屋企叫佢玩下我條狗。不過可惜呀，我都唔知我呢一刻喺佢心目中算係啲咩。我成日都有個感覺，就算我有一日有幸同度Daisy一齊，我地都無乜可能會開花結果，好快我地就會唔知點解分左手，佢又會遇到另一個更好嘅男人。Daisy對我黎講，可能真係too good to be true。不過點都好，我都唔想佢受到任何傷害，事到如今，我係有責任保護佢。 Daisy同平時一樣，都係比約定時間更早出現。雖然佢只不過係喺屋企落樓下，不過都睇得出佢係有打扮過。喺望住佢嘅俏臉時候，我不禁望得出神，不過呢一刻佢對住我嘅神情，由好似返返以前咁，不安中又帶點厭惡。我諗左一諗，同佢講：「Daisy呀……我有啲嘢想同你講。」佢好冷淡咁講：「你講啦。」「我之前對大明做左啲嘢，令佢想對我報復。而佢覺得我鍾意你，所以佢想對付埋你，我知我對你唔住，連累左你……」我初初以為Daisy聽到我話大明會對佢不利嘅時候佢會陷入恐慌，點知佢嘅著眼點唔係呢度，佢好認真咁問我：「咁你係咪鍾意我呀？」我真係無準備過今日會面對住呢個問題，喂而家有人對你不利喎Daisy，你竟然走黎問我係咪鍾意你？我即時口疾疾咁話：「鍾意，你地班同事對我咁關心，我個個都鍾意啦……不過你聽我講先啦，大明真係想對付你呀……」Daisy聽到我呢個答案之後即時黑面，佢面上嘅厭惡之情就更加明顯，佢靜左一靜之後再問我：「我問多你一次，你係咪鍾意我呀？」喺佢呢下進迫之後，我心入面突然生出左一下反感，我用同佢一樣冷淡嘅語氣話：「係又點唔係又點，而家都唔係最重要嘅事？我知你係無辜，無端端畀我連累左，你絕對有權發我脾氣同嬲我。不過你可唔可以聽我講埋先，大明條友痴線架，佢為左對付我咩都做得出架。一陣你有咩事你叫我點算呀？」佢聽到我個答案只係冷笑左一下話：「如果你只係出於內疚先關心我，咁我可以同你講你唔洗再擔心我，我識保護自己，而且就算發生左咩事都唔會怪你，咁得未？」「我唔係咁嘅意思……」「咁你係咩意思？你有膽搞咁多嘢出黎，但竟然連承認鍾意我都無膽，咁又係咩意思？」聽到佢咁講，我靜左落黎無反駁，我仲可以反駁啲咩？同佢講我鍾意佢？我已經連累到佢成為埋大明嘅目標，唔通我仲要再將佢索涉埋我一片混亂嘅生活入面？Daisy望坐粒聲都唔出嘅我，佢好似想狠狠咁鬧我一餐，但喺沉默對視左一陣之後，佢最後都係選擇左唔再理我，起身想走。 喺望住佢嘅身影漸漸遠去果陣，我好憎自己，而且我亦突然放棄左理智咁，起左身衝左埋去拉住佢，同佢講左句：「係，我係鍾意你。」點知佢用力咁甩開我隻手，之後轉身同我講：「你口話鍾意我係無用架，你表現出黎嘅一切都係話緊畀我知，你最鍾意嘅唔係我。」「我同Jasmine真係無嘢架，自從上次你撞到我同佢之後，我都無再搵過佢啦……仲有Sophia單嘢真係Valarie作故仔砌我架咋，喺佢辭左職之後我就無再搵過佢啦。」「我唔係講緊Jasmine同Sophia。」「咁無啦，我最鍾意果個真係你呀Daisy。」佢擰轉頭，望左我一陣，佢之後好堅定咁講：「你唔係，你心入面最著緊果個根本唔係我，你唔好呃自己啦？」見到佢咁肯定去否定我，我不禁扯火，我好大聲咁話：「咩呃自己姐，你叫我認係鍾意你，我咪認左囉。認完之後你又話我最鍾意果個唔係你，你想我點呀？」Daisy見我發晒脾氣咁都無讓步，佢依然係好冷漠咁望住我，我本身想繼續發火咁鬧落去，不過望住Daisy，我都係強壓行自己嘅怒火，深呼吸左一下，再問佢：「你點解覺得我唔係最鍾意你？我真係好想知點解你有咁嘅結論。」「你每次有事果陣，你第一個搵嘅係邊個？遠嘅唔講，你早兩日突然唔見左人，你有無同我解釋過發生左咩事，如果你係緊張我嘅話你唔在意我點諗架咩？你除左無同我解釋過之外，呢件事最後幫你手解決嘅更加唔係我，而係Miki。你有咩事嘅時候，你第一個諗到嘅係Miki而唔係我。我信你地之間未發生過任何嘢，不過喺你個心入面，佢嘅地位已經喺我前面。我好攰啦，我畀我個ex已經玩到無晒心機，我唔想再同你玩埋啲三角錯愛呀，如果你係鍾意我的話，你返去好好諗清楚啦。」「件事唔係咁架……」Daisy揮手示意我唔好講嘢：「夠啦，我唔想聽你啲大話，你諗清楚再搵我啦。大明果度我自己會小心啲架啦，你走先啦，我而家唔想再見到你。」講完之後佢就頭也不回地走左人，留低左無言而對嘅我。