今日我開始左對公司啲同事進行復仇大計: 第四十三節
喺半夢半醒之間，我聽到有把聲喺度叫我，呢把聲蒼老得黎又帶點猥瑣，好似熟識但又有啲陌生。我好努力想睜開雙眼，不過唔知點解我無論幾用力都好，雙眼都係挈唔開，正當我開始聽唔到把聲，再次進入去昏迷狀態之際，有陣強烈嘅氣味令我即刻醒晒，當我一睬開雙眼，我見到眼前有個熟識嘅老坑拎住樽阿摩尼亞喺我面前揚黎揚去，而呢個老坑，係公司樓下個看更阿伯。佢見我醒返即刻問我：「你有無事呀，係咪畀人打劫呀，要唔要幫你報警呀？」由於我一起身果刻，個頭又唔知點解痛到諗唔到嘢，我只係用手勢叫佢唔好出聲住，畀我冷靜一陣先。喺努力深呼吸左幾下之後，我望一望周圍，我初初以為我喺公司入面，但周圍嘅環境話我知呢度應該係公司樓下果個空置單位度。突然之間，我感覺到身上有股惡寒來襲，令原本仲係處於一片混沌狀態嘅我即時醒一醒，我望一望自己，發覺自己原來無著衫訓左喺地下度。我喺努力深呼吸左幾下之後，用微弱嘅聲線叫阿老坑幫我搵下我啲衫褲鞋襪喺唔喺周圍，佢即刻轉身出去搵，無幾耐佢就喺個垃圾膠袋度幫我搵返我啲嘢。喺著返衫之後，阿老坑同我講：「如果你無乜事就唔好報警啦，最多我畀返一千幾百蚊你定下驚呀，你喺度發生左啲咩事即係我失職，我會被人炒架。念在上次你送本鍾麗堤寫真過我，我地都相有啲交情呀，我睇你都應該無乜損傷呀，啲嘢又搵得返。」呢個老坑唔止失職，佢份人仲要相當缺德，佢不單止唔關心我有無咩事，佢仲要只係一心驚我帶到麻煩畀佢，不過無端端有錢收我係唔會拒絕，所以我即時同佢講：「一口價，千五蚊，我保證你唔會有手尾跟。」佢喺無奈地畀左錢之後同我講：「好彩唔係你公司啲女畀人搞咋，如果唔係我就大鑊啦，你知啦佢地個個都咁索……」跟佢一提，我即刻諗起Daisy可能仲身陷險境，我即時摷我部電話出黎諗住打畀佢，一望之下，我發覺有十幾個miss call係Daisy打黎，唔通佢真係有事遇險？
我即時打畀佢，但打左兩次佢都未聽電話，心焦如焚嘅我我喺心入面不斷祈求佢無事。而到左第三次終於有人聽，我一聽到Daisy把聲就即刻大叫左出黎話：「Daisy你唔洗驚架，你話我知你喺邊，我即刻黎救你！」點知電話另一方嘅Daisy話：「我問你去左邊至啱呀，成十一點幾都仲未見人，尋晚OT啲嘢做做下又唔知去左邊，打畀你又無人聽。而家Sam姐好嬲呀，佢成朝不停叫我搵你，你仲唔即刻返黎。」由於同我預期嘅事落差太大，我一時間都唔知應該係慶幸Daisy無事定點。喺錯愕左一陣之後我虛應左幾句就收左佢線。我一時間都唔知應該點處理呢件事好，由於太無助，我唔知點解竟然諗起Miki，我即時將尋晚發生嘅事喺whatsapp話左佢聽，但係佢無應我。之後我去左梳一梳洗同落街買左啲頭痛藥之後，就鼓起勇氣行返公司。但係如果你要我老實答，我真係諗唔到應該點樣去解釋我無故失職，不過要面對嘅事始終都係要面對，我唯一希望係Sam姐唔係真係咁嬲……
喺一行入公司果陣，我就感覺到有人對我怒目而視，而呢個嬲到好似想殺人嘅眼神，係黎自Daisy嘅。我唔識點樣去同佢解釋，所以我選擇左無視佢，不過見佢無事生勾勾企喺度我其實都有啲感恩，什至覺得我尋晚嘅suffer都係值得嘅。Sam姐喺會議室度見我行入黎就即刻衝左出黎，佢惡狠狠咁指住我話：「如果你畀唔到個合理解釋我，你尋晚點解無啦啦唔見左人，而家又要咁遲返黎，我一定會炒左你。」我估唔到佢嬲到嘅程度係去到要喺大庭廣眾話要炒左我，我仲以為佢都會念在同我嘅交情份上，最多畀封warning letter我，但係我錯估左成件事嘅嚴重程度。我好想即時諗個合理解釋出黎，但奈何我仲係頭痛欲裂，睇黎尋晚大明落藥一定落得好重手。而喺唔知邊度行出黎嘅Valarie，用一副樂觀其成嘅眼神望住我，Sam姐見我諗極都諗唔到，就即刻話：「無解釋啦嘛？即係炒得啦，我對你真係好失望呀。」面對住對我咁絕情嘅Sam姐，我都衝口而出講左句：「我都對你好失望呀。」Sam姐聽到我呢下反駁就更加嬲，佢即時向我拍枱大駡：「即係而家係我怪錯左你啦？好呀，你而家即刻講到個合理解釋畀我，我同你當眾謝罪又點話，講呀！」由於頭先嘅後應都係基於一時衝動，我又點可能畀到個合理解釋佢呀，我嘅心即時向下沉，即時打到輸數等收信走人。呢個時候，突然有把聲話：「Sam姐呀，我可以解釋到，不過可唔可以畀我私下同你講呢。」而呢把聲，係屬於Miki。
在場人士聽到Miki竟然話幫到我作合理解釋，都無一不錯愕。本身諗住等睇我被人炒嘅Valarie，見埋門一腳竟然撻Q，即時嬲到連塊面都紅埋。Sam姐望左我同Miki一陣之後，佢叫左我同Miki入會議室度傾，而喺我諗入去之前我望左Daisy一眼，不過佢知我望佢，又故意擰埋一邊逃避我嘅視線。喺入到房之後，滿臉怒容嘅Sam姐指住Miki話：「如果畀我知你只係包庇佢嘅話，我連你都炒埋。」但Miki好似一定都無驚過咁，佢好從容咁話：「其實件事好簡單，尋晚James因為唔舒服所以佢打左畀我叫我黎接佢，之後我將佢接左返屋企度照顧，咁佢食左藥所以今朝咪唔知醒，我要入黎講係因為我唔想畀人閒言閒語。」Sam姐諗左一陣之後，再問：「我點知你講嘅嘢係咪真。」Miki即時答：「尋晚個看更見住我帶James走，佢仲有幫手扶佢上的士，你問下佢就知啦。」好彩我喺個whatsapp度同左Miki講埋我同看更今朝發生嘅對話，聽明如佢都知個看更為左自己，一定會配合我地講大話。Sam姐喺聽完Miki嘅對話之後，佢望住我問：「咁點解你頭先唔解釋？」我即時答佢：「因為我唔想連累Miki，佢已經仗義黎幫我，我唔想令佢有咩麻煩。再講呀，我覺得病唔係唔做嘢嘅借口，所以我都覺得自己係失職有唔啱，不過我真係諗唔到Sam姐你會想即刻炒我，你都識左我咁耐啦，乜我似係會無故失職嘅人咩？」Sam姐嘅眼神一下子又盛怒變到內疚，佢即係用返把比較溫柔嘅語氣話：「你唔舒服話我知呀嘛，洗咩死頂呢……你要唔要放多半日假呀？」由於我知道如果我太快無事嘅話，就唔似係受左冤屈，我故意黑起塊面話：「有心啦。我而家會出去做返啲嘢，我會盡快交返畀你。如果你仲係要炒我我對無法，無乜事我出返去先啦。」Sam姐想留住我，但我完全無理佢就轉身就走。Valarie頭先應該係企左喺門口偷聽，因為我一開門就差啲撞到佢。但係我無完全無理佢就返左埋位，其實我個頭仲係痛到就黎爆，而且我仲係驚魂未定，我都唔知自己做緊啲咩，但好彩Miki呢一刻係同我同一陣線，我真係唔敢想像佢如果用頭先所表現出黎嘅急智黎對付我的話，我而家會點。