今日我開始左對公司啲同事進行復仇大計: 第三十九節
由於逢星期一Sam姐都會上黎公司開例會，為左進行剷除Valarie大計，我喺天未光就買定早餐去Sam姐屋企度同佢食早餐，打算順便落下藥。點知我去到佢屋企門口時，撳極佢門鐘都無人應，打佢電話又無人聽。我一見到咁就覺得奇怪，佢女朋友又喺外地，佢啲生活又咁有規律，佢無理由會出左去玩到成晚唔返屋企架。不過既然佢都唔喺度，我手上又有兩個早餐，我突然諗起都好耐無同過Daisy食早餐，所以我同佢講我買埋早餐畀佢同喺公司等。
由於我咁早出門口，所以我返到公司果陣得我一個喺度。望住空無一人嘅公司，我突然之間覺得有啲感觸。諗起身邊嘅同事因為受到我呢啲良師益友嘅影響之下，好似Judy呀阿輝呢啲都改邪歸正晒，我心入面一有絲滿足感，黎緊我就要教化Valarie，希望我可以令佢做返個聽我話嘅好人啦。隔左一陣，Daisy終於返到黎，我都好一排無同過佢獨處。之前我同佢發生左咁多誤會之後，我都無同佢好好咁傾過計，由於我都係突然約佢食早餐，呢個係一個我自己都無乜考慮過嘅衝動決定，所以我其實都無諗過應該要點去面對佢。同樣地，由於一排無同對方講過嘢，Daisy見到我果陣都好唔知講咩好，正當我打算求其講啲嘢打開話題之後，Daisy突然開口話：「Miki尋日同我解釋左，Valarie係為左升職先中傷你仲煩住Sophia，但點解你唔同我解釋呢？」我聽完佢咁問之後一剎那無語，我決定答佢一個真心答案：「我以為經過左咁多嘢之後，我同你之間會有信任，呢啲嘢唔洗解釋你都會知道……」Daisy聽到我咁答即刻急怒攻心，佢用我從來都無聽過咁惡嘅語氣話：「你唔好講笑啦，我喺你心目中算係咩姐，我連Evans個朋友Jasmine都不如啦。仲有，Miki尋日主動搵我地去幫你辯護，佢為你主動做咁多嘢，睇黎佢同你交情都非淺啦。你叫我點樣信你呀，我知呀，你覺得我係果啲傻女人，好易呃呀嘛。我而家同你講我唔係囉，我有眼睇得出你同身邊啲女人係點架。」講完之後，佢就拎起左個早餐行左去垃圾桶倒晒佢，之後再轉身同我講：「個早餐已經涷晒，睇黎本身都唔係買畀我架啦，係你咁啱請唔到人食先搵我黎攝時間咋嘛。我而家同你講，我唔係畀你攝時間嘅玩物呀，你唔係真心買畀我嘅嘢我唔希罕呀。」睇住發咁大脾氣嘅Daisy，我唔識點反應，我只可以細細聲咁話：「唔係呀，冷氣開得大吹涷左個早餐姐……」而盛怒之下嘅Daisy喺掉左個早餐之後都好似未發洩完，佢行過黎好大力咁打左我一下，而喺佢打我果陣我見到佢眼泛淚光，但為左黎緊嘅事我又唔可以講啲咩。信我，佢打我果下，我個心比我個身更加痛。
Daisy發完脾氣之後就返返埋個位度無出聲，我想行埋去道歉，但所有事又唔知從何講起。過左無耐其他人就陸續返到，除左阿油同Valarie，前者我就知佢仲喺澳門未咁快返到呀，但後者就有啲奇怪，佢通常都唔會遲到，更何況今日係Sam姐上黎開會嘅日子。喺返工時間一個鐘之後，Valarie先返到，不過見佢好似打扮得唔係太整齊，再加上佢個黑眼圈，佢尋晚好似無返屋企咁。而Sam姐同樣姍姍來遲，佢比平時遲左個幾鐘先上黎，雖然佢唔似Valarie咁衣衫不整，但係佢同樣都有個好深嘅黑眼圈。由於我知道Sam姐尋晚無返屋企，所以我即刻起左疑心。Sam姐一上到黎就叫左我單獨入房，我呢個時候心裡暗叫不妙。喺入到房果陣，平時對我都算係和顏悅色嘅Sam姐突然好認真咁同我講：「阿Kate果度你唔洗再同我費心去查下邊個做架啦。」我聽到之後暗吃一驚，問佢：「你知道係邊個出手？」「唔係，不過既然都過左去，無謂追究啦。仲有呀，聽聞你仲成日死煩住之前走左果個Sophia，既然人地都唔鍾意你，你唔好再浪費時間喺佢身上架啦。仲有，Kate就走人，你幫我安排同佢食餐farewell飯啦。」Sam姐一輪咀講呢堆嘢果陣神色好似有啲唔舒服，我即刻問佢：「睇你個樣好似好唔精神喎，尋晚好夜訓呀？」佢聽到我咁問果陣，佢眼神話畀我知佢有啲心虛，佢略帶緊張咁話：「哦……尋晚夜訓而家有啲頭痛姐，我食啲止痛藥painkiller無事架啦。」「咁…..你已經搵左人頂阿Kate架啦？」佢畀我咁問一問，神色又有啲慌張，佢只係敷衍我話考慮緊就耍走左我。
到開會果陣，大家都好緊張Sam姐會唔會公佈阿Kate嘅繼任人，不過佢始終未有透露個半句。喺頭先Sam姐同我講果番說話度，我覺得有啲奇怪，雖然我唔出奇Valarie應該有喺Sam姐面前插我兩刀，但平時Sam姐都唔係啲咁易聽人是非嘅人，佢頭先竟然捉左我入房講，呢樣真係一反常態。而喺會上，同樣係一臉倦容嘅Valarie成程都無出過聲，佢只係望住Sam姐，而我亦見到Sam姐好明顯係逃避緊Valarie嘅目光。由於佢地兩個嘅舉動實在太有可疑，我呢一刻心裡不禁懷疑佢地尋晚係咪發生過啲咩。不過我唔想因為呢個因素打斷左我對付Valarie嘅大計，
喺會上Sam姐講晒啲例行公事之後，我突然舉手話：「Sam姐，對於上個星期你問我地嘅問題，我而家想延續落去。」由於我覺得Sam姐會拒絕我呢個要求，我無等佢畀反應之後就繼續講落去。「喺經過在深思熟慮之後，我得出左一個結果，我覺得呢個位一定唔可以畀Valarie坐。」Valarie估唔到我會突然向佢正面開炮，佢都相當錯愕我會有此一著。Sam姐即時阻止我話：「拿唔好因為呢件事攻擊同事呀。」我答佢：「你地誤會左啦，我咁樣做係為Valarie著想咋。喺上個星期，我撞到Valarie同佢嘅前夫食飯。呀，我緊係以為佢地係咪有景轟啦。但隔左一陣我就覺得自己係以小人之心度君子之腹，我忘記左Valarie嘅前夫係一位專治不肓嘅產科醫生。經過我嘅細心推理之後，我得出左一個結果，就黎又結婚……」我講個又字果陣專登加強左語氣，Judy聽到之後忍唔住笑左出黎，我繼續話：「又黎第二次結婚嘅Valarie姐應該係想努力造人呀，大家都知Valarie已經一把年紀架啦，佢有左之後就係高齡產婦黎架啦。如果要佢幾十歲人陀住個仔果陣都仲要睇住間公司，有咩事你叫我地一班同事點去負責呀。」眾人聽到我咁講之後都跟住點頭表示認同，Valarie好似想開口解釋，但睇黎佢都唔識點反應。講完之後我就話：「由於我地大家都好敬愛Valarie姐姐，佢對我地黎講，就好似家有一老，如有一寶……」Sam姐喺呢個時候打斷我話：「得啦我明你意思啦，我會考慮下。我有啲唔舒服要走先啦，今日無咩緊要事都唔好搵我。」佢講最後果句果陣專登望一望Valarie，Valarie又好似欲言又止咁。但點都好，由於Valarie已經喪失左頭先喺大家面前作即時解釋嘅機會，佢之後講咩都只會似係大話同掩飾。